人生的幸福
Jîn-seng ê Hēng-hok
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 台灣教會公報/芥菜子 |
| 卷期 | 第597卷 |
| 日期 | 1934/12 |
| 頁數 | 22-23 |
白話字（原文數位化）
Jîn-seng ê Hēng-hok
(Tân Chheng-gī)
- 12, no. 597, pp. 22-23
Thê-mô͘-thài Chiân-su, 4 chiuⁿ 8 chat. Lūn tiau-chè sin-khu ê sū, sī kóng tio̍h thoàn-liān bú-gē, lâi tiau-ióng sin-thé.
Lūn kèng-khiân tī Chú ê sū, sī kóng tio̍h liān kèng-khiân ê tek-hēng, lâi ho̍k-sāi Siōng-tè; nn̄g hāng lóng ū lī-ek. Chóng-sī lī-ek sin-khu-ê sī khah sió-khoá, lī-ek kèng-khiân ê tek-hēng lâi ho̍k-sāi Siōng-tè, sī khah toā; in-uī kim-sè, lâi-sè lóng ū tit-tio̍h hok-khì. Tuì án-ni lâi khoàⁿ, jîn-seng ê hēng-hok ū 3 hāng toā iàu-kín:-
- Sin-thé kiān-khong
Ū chi̍t-kù-oē sī án-ni kóng, “Pēng-sî hong-tī kiān sī sian.” Ì-sù sī kóng phoà-pīⁿ ê sî, chiah chai ióng-kiāⁿ sī sian; in-uī lâng nā bô ióng-kiāⁿ, chiū bô chin-chiàⁿ ê uì-an. Só͘-í lâng nā bô phoà-pēⁿ ê sî, m̄-chai-iáⁿ kiān-khong sī sím-mi̍h. Sin-thé kiān-khong ê lâng, khoàⁿ sè-kài sī chin bí-lē; sui-bóng tú-tio̍h sím-mi̍h chhì-liān, sún-sit, chai-hāi, iā m̄-chai i ê kan-khó͘. Sin-thé nā soe-lám ê lâng, chiū chi̍t-tiám-á iā put-jû-ì. Siōng-tè siúⁿ-sù lâng ê hok-khì chin choē, tē-it toā chiū-sī kiān-khong; choē-choē lâng m̄-bat tú-tio̍h pēⁿ-thiàⁿ, iā m̄-bat poàⁿ kù lâi kám-siā siúⁿ-sù pêng-an ê Siōng-tè. Lâng nā chai sin-thé bô pêng-an, mî-sî boē khùn-tit, hit-tia̍p lí chiū ài uī-tio̍h lí ê kiān-khong kám-siā Siōng-tè. Só͘-í lâng tio̍h ài kèng-khiân ho̍k-sāi Siōng-tè, sī chin iàu-kín.
- Ka-têng khoài-lo̍k
Khoài-lo̍k ê ka-têng, sī Sè-kài tē-it chhàn-lān kng-bêng ê tiám. Ka-têng tiong ê hô-ài pêng-an, put-lūn cháu kàu sím-mi̍h só͘-chāi, lóng oē siā-chhut i ê kng. Ka-têng tiong nā jiáu-loān, oàn-miā, put-lūn cháu kàu sím-mi̍h só͘-chāi, boē bián hoat-seng chhiⁿ-chhám, tāi-ke nā saⁿ pang-chān, ka-lāi saⁿ hô-hó, ka-têng ê tiong-kan, chhiong-moá pêng-chēng ê khong-khì, án-ni kèng-khiân oē hō͘ lâng ê ka-têng chhù-sū pêng-hô.
- Sim-chì Sèng-kiat
Téng-bīn só͘ kóng sin-thé ê kiān-khong, ka-têng ê khoài-lo̍k, lóng sī hēng-hok nn̄g hāng tiōng-iàu ê tiâu-kiāⁿ. Jîn-seng choè ko ê hēng-hok, chiū-sī sim-sîn ê sèng-kiat. Lâng nā ū sèng-kiat ê sim, chhin-chhiūⁿ chuí-choâⁿ ū chheng-kiat ê chuí, thang ū sèng-kiat ê hêng-uî. Sèng-kiat ê seng-bēng lâu chhut-lâi, chit khoán ê seng-bēng ū chin-chiàⁿ ê pêng-an, ū ko-siōng ê hi-bōng. Siōng-tè só͘ goān ài lâng ū chit khoán ê sim; só͘-í lâng iàu-kín tio̍h kèng-khiân, ho̍k-sāi--i.
Má-thài 5 chiuⁿ 8 chat. Ū kóng, Chheng-khì sim-koaⁿ ê lâng ū hok-khì; in-uī i beh kìⁿ-tio̍h Siōng-tè.
Tuì án-ni lâi khoàⁿ, jîn-seng ê hēng-hok, ū chit 3 hāng ê toā iàu-kín.
-
Sin-thé Kiān-khong.
-
Ka-têng Khoài-lo̍k.
-
Sim-chì Sèng-kiat.
Nā ū chit 3 hāng ê kiat-kó, chin ū hok-khì.
漢羅（Ùi原文改寫）
人生的幸福
(陳清義)
1934.12，no.597，pp.22-23
提摩太前書，4章8節。論調劑身軀的事，是講著鍛鍊武藝，來調養身體。
論敬虔佇主的事，是講著練敬虔的德行，來服事上帝；兩項攏有利益。總是利益身軀的是較小可，利益敬虔的德行來服事上帝，是較大；因為今世，來世攏有得著福氣。對按呢來看，人生的幸福有3項大要緊：-
- 身體健康
有一句話是按呢講，「病時方知健是仙。」意思是講破病的時，才知勇健是仙；因為人若無勇健，就無真正的慰安。所以人若無破病的時，毋知影健康是甚物。身體健康的人，看世界是真美麗；雖罔拄著甚物試煉，損失，災害，也毋知伊的艱苦。身體若衰荏的人，就一點仔也不如意。上帝賞賜人的福氣真濟，第一大就是健康；濟濟人毋捌拄著病疼，也毋捌半句來感謝賞賜平安的上帝。人若知身體無平安，暝時袂睏得，彼霎你就愛為著你的健康感謝上帝。所以人著愛敬虔服事上帝，是真要緊。
- 家庭快樂
快樂的家庭，是世界第一燦爛光明的點。家庭中的和愛平安，不論走到甚物所在，攏會射出伊的光。家庭中若擾亂，怨命，不論走到甚物所在，袂免發生淒慘，大家若相幫贊，家內相和好，家庭的中間，充滿平靜的空氣，按呢敬虔會予人的家庭次序平和。
- 心志聖潔
頂面所講身體的健康，家庭的快樂，攏是幸福兩項重要的條件。人生最高的幸福，就是心神的聖潔。人若有聖潔的心，親像水泉有清潔的水，通有聖潔的行為。聖潔的生命流出來，這款的生命有真正的平安，有高尚的希望。上帝所願愛人有這款的心；所以人要緊著敬虔，服侍--伊。
馬太5章8節。有講，清氣心肝的人有福氣；因為伊欲見著上帝。
對按呢來看，人生的幸福，有這3項的大要緊。
-
身體健康。
-
家庭快樂。
-
心志聖潔。
若有這3項的結果，真有福氣。