附錄：英台俗語對照
Hū-lio̍k: Eng Tâi Sio̍k-gú Tuì-chiàu
文獻資訊
| 項目 | 資料 |
|---|---|
| 作者 | 林茂生 Lîm Bō͘-seng |
| 卷期 | 台灣教會公報 |
| 卷期 | 第596卷 |
| 日期 | 1934/11 |
| 頁數 | 10 |
白話字（原文數位化）
Hū-lio̍k: Eng Tâi Sio̍k-gú Tuì-chiàu
(Lîm Bō͘-seng)
- 11, no. 596, pp. 10
Thâu-sū: Chi̍t-kù oē chhián-chhián-hiān-hiān tàu-kù tàu-kù lâi kóng-phoà jîn-chêng sū-lí ê ò-biāu, che kiò-chò “Sio̍k-gú”. Put-lūn tó-chi̍t kok, tó-chi̍t só͘-chāi, to ū sio̍k-gú teh liû-thong. Siāng tē-it sim-sek--ê, chiū-sī Eng-kok ê sio̍k-gú ê tiong-kan, iā ū chē-chē u kap Tâi-oân ê sio̍k-gú saⁿ-tâng--ê: ū-ê sī choân-jiân siāng ì-sù, ū-ê sī àm-ha̍p. Che sī teh chèng-bêng chit nn̄g só͘-chāi ê jîn-chêng sū-lí iû-goân ū saⁿ-tâng ê só͘-chāi. Taⁿ goá tī-chia ū chū-chi̍p tām-po̍h, lâi chò chit-ê “Sin Tâi-oân-oē” noâ ê “Hū-lio̍k”, hō͘ lia̍t-uī chò chham-khó; nā ū e̍k m̄-tio̍h, iā kiû lia̍t-uī chí-kàu.
All is well that ends well. (Chit kù sio̍k-gú sī tuì Shakespeare ê chi̍t-ê hì-chhut ê miâ lâi--ê. Ì-sù sī kóng, Soah-boé nā hó, chiū bān-sū lóng hó). Hó-thâu put-jû hó-boé.
Strike while the iron is hot: (Tāi-ì: tio̍h thàn thih teh jia̍t ê sî kā i phah). Phah-thih sūn jia̍t.
When at Rome, do as the Romans do: (Tāi-ì: nā toà-tī Lô-má, tio̍h chiàu Lô-má lâng ê só͘ kiâⁿ). Ji̍p kang suî oan, ji̍p hong suî sio̍k.
The pot calls the kettle black: (Tāi-ì: oe-á beh chhiò tê-kó͘ o͘). Ku chhiò pih bô bô boé.
Peⁿy wise and po͘nd foolish: (Tāi-ì: sió-khoá chîⁿ teh gâu, toā-chat chîⁿ chiū gōng). Kiàn siáu-lī, sit tāi-sū.
The more haste, the worse speed: (Tāi-ì: sī ná chheⁿ-kông, án bān cháu). Kín pháng bô hó se, kìn kè bô hó ta-ke.
Money makes the mare to go: (Tāi-ì: chîⁿ-gîn ē hō͘ bé-bó cháu). Ū chîⁿ sái kuí iā ē e-bō.
Many a little makes a mickle: (Tāi-ì: sió-khoá--ê, nā chiām-chiām chek-chū, ē pìⁿ-chiâⁿ chin chē). Chek-siáu sêng to.
Make hay while the sun shines: (Tāi-ì: tio̍h thàn hó-thiⁿ-sî pī-pān ta-chháu). Bí ū sian tiû-biû.
Good wine needs no bush: (Tāi-ì: hó chiú m̄-bián kóng-kò). Thô-lí put-giân, lō͘ chū sêng khe. (Thô-á lí-á m̄ bián kóng-oē, chū-jiân chē-chē lâng ài lâi chhoē in, tì-kàu in ê hoe-kha pìⁿ-chiâⁿ sió-lō͘).
First come first served: (Tāi-ì: tāi-seng lâi, tāi-seng tit-tio̍h). Sian-tek-sian, hō͘-tek-hō͘.
Fine feathers make fine birds: (Tāi-ì: chiáu-mn̂g suí, ē hō͘ chiáu-á suí). Chò pu̍t tio̍h kng, chò lâng tio̍h chng.
Every one to his taste: (Tāi-ì: ta̍k lâng lóng ū i-ê chhù-bī). Ū lâng ho͘N3 sio-chiú, ū lâng ho͘N3 thô͘-tāu.
Early birds catch worms: (Tāi-ì: khah chá cheng-sîn ê chiáu-á, ē lia̍h-tio̍h thâng). Chia̍t-chiok sian-tek (sian teng).
Every dog has his day: (Tāi-ì: put-lūn sím-mi̍h káu to ū i ê ji̍t; ì-sù sī, khah pháiⁿ-ūn ū-sî iā ū ē tú-tio̍h hó-ūn ê ji̍t). Ū-sî chheⁿ kng, ū-sî goe̍h kng.
A barking dog bites little: Tú-tú sī Ē puī ê kàu bē kā lâng.
To come a day after the fair: (Tāi-ì: chiūⁿ-chhī ê keh-tńg-ji̍t chiah beh lâi). Hoé koè pû ō͘. Lâng lâi chiah beh sàu-tè, lâng khì chiah choaⁿ-tê.
To send coals to Newcastle: (Newcastle sī chhut thô͘-thoàⁿ ê só͘-chāi; lí beh tian-tò chhia thô͘-thoàⁿ khì hia, che sī chhin-chhiūⁿ tī Sek-khia-hu̍t ê bīn-thâu-chêng teh kóng hu̍t-hoat). Pan-bûn lōng bú.
Birds of a feather flock together: (Tāi-ì: siāng khoán mng ê chiáu-á ài chū-chi̍p chò-tui). Lêng kau lêng, hōng kau hōng, ún-ku kau tòng-gōng. Bu̍t í luī chū, jîn í kûn hun.
A bird in the hand is worth two in the bush: (Tāi-ì: chhiú lāi só͘ ū ê chi̍t chiah chiáu-á sī khah-iâⁿ nn̄g chiah bih tī chhiū-nâ-lāi). Chi̍t-chheng sia, m̄-ta̍t-tio̍h peh-pah hiān; peh-pah hiān, m̄-ta̍t-tio̍h la̍k-pah piān.
漢羅（Ùi原文改寫）
附錄：英台俗語對照
(林茂生)
- 11，no. 596，pp. 10
頭序：一句話淺淺現現鬥句鬥句來講破人情事理的奧妙，這叫做「俗語」。不論佗一國，佗一所在，都有俗語咧流通。上第一心適--的，就是英國的俗語的中間，也有濟濟有佮台灣的俗語相同--的：有的是全然siāng意思，有的是暗合。這是咧證明這兩所在的人情事理猶原有相同的所在。今我佇遮有聚集淡薄，來做這个「新台灣話」欄的「附錄」，予列位做參考；若有翻毋著，也求列位指教。
All is well that ends well。(這句俗語是對Shakespeare的一个戲齣的名來--的。意思是講，煞尾若好，就萬事攏好)。好頭不如好尾。
Strike while the iron is hot：(大意：著趁鐵咧熱的時共伊拍)。拍鐵順熱。
When at Rome，do as the Romans do：(大意：若蹛佇羅馬，著照羅馬人的所行)。入江隨彎，入風隨俗。
The pot calls the kettle black：(大意：堝仔欲笑茶鈷烏)。龜笑鱉無尾。
Peⁿy wise and po͘nd foolish：(大意：小可錢咧 gâu，大節錢就戇)。見小利，失大事。
The more haste，the worse speed：(大意：是那生狂，那慢走)。緊紡無好紗，緊嫁無好大家。
Money makes the mare to go：(大意：錢銀會予馬母走)。有錢駛鬼也挨磨。
Many a little makes a mickle：(大意：小可--的，若漸漸積聚，會變成真濟)。積少成多。
Make hay while the sun shines：(大意：著趁好天時備辦焦草)。未雨先綢繆。
Good wine needs no bush：(大意：好酒毋免廣告)。桃李不言，路自成蹊。(桃仔李仔毋免講話，自然濟濟人愛來揣in，致到in的花跤變成小路)。
First come first served：(大意：代先來，代先得著)。先的先，後的後。
Fine feathers make fine birds：(大意：鳥毛媠，會予鳥仔媠)。做佛著光，做人著裝。
Every one to his taste：(大意：逐人攏有伊的趣味)。有人好燒酒，有人好土豆。
Early birds catch worms：(大意：較早精神的鳥仔，會掠著蟲)。捷足先得 (先登)。
Every dog has his day：(大意：不論甚物狗都有伊的日；意思是，較歹運有時也有會拄著好運的日)。有時星光，有時月光。
A barking dog bites little：拄拄是會吠的狗袂咬人。
To come a day after the fair：(大意：上市的隔轉日才欲來)。火過pû芋。人來才欲掃地，人去才煎茶。
To send coals to Newcastle：(Newcastle是出土炭的所在；你欲顛倒車土炭去遐，這是親像佇釋伽佛的面頭前咧講佛法)。班門弄斧。
Birds of a feather flock together：(大意：siāng款毛的鳥仔愛聚集做堆)。龍交龍，鳳交鳳，隱痀交侗戇。物以類聚，人以群分。
A bird in the hand is worth two in the bush：(大意：手內所有的一隻鳥仔是較贏兩隻覕佇樹林內)。一千賒，毋值著八百現；八百現，毋值著六百便。