甚物上gâu
Sím-mi̍h siōng gâu
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第596卷 |
| 日期 | 1934/11 |
| 頁數 | 15-16 |
白話字（原文數位化）
III. Sím-mi̍h siōng gâu
(L. P. T.)
- 11, no. 596, pp. 15-16
Ū chi̍t pái, ū 5 ki ê chéng-thâu-á teh khui hoē-gī, saⁿ-kap chham-siông kóng, lán tiong-kan sím-mi̍h lâng thang chò thâu lâi koán-hat lóng-chóng ê chéng-thâu-á.
Toā-ku-bú khí-lâi chiū kóng hiaⁿ-tī-á, goá siūⁿ goá ē kham-tit chò thâu lâi koán; in-uī goá siāng ū lō͘-ēng, koh siāng ū la̍t! Siat-sū nā beh the̍h chi̍t pún chheh iā-sī goá ka-tī, lín tio̍h sì-ê; só͘-í goá, tī lín tiong-kan siāng ū la̍t!
Kí-cháiⁿ kóng, Kan-ta ū la̍t ū sím-mi̍h lō͘-ēng? Lín khoáⁿ goá put-lūn sím-mi̍h sî goá tio̍h lóng chhut-thâu. Nā-sī lâng m̄-chai lō͘ iā-sī goá kā i pò lō͘, mē gín-ná iā-sī goá kā i kí, nā bô goá, lí toā-ku-bú pí khoàⁿ lè!
Tiong-cháiⁿ khiā khí-lâi chiū kóng, lín só͘ kóng sī lóng tián lín ê pún-sū nā-tiāⁿ, lí khoàⁿ goá chiah koân; iū-koh goá put-sî lóng khiā tī lín tiong-kan sī tī tiong-ng, lín lióng-pêng lóng sī goá kin-suî ê pō͘-hā.
Bô-miâ-cháiⁿ thiaⁿ liáu put-chí siū-khì, chiū kóng, lín só͘ kóng suī-jiân sī ū la̍t, iā-sī kóng siāng toā-ê ū sím-mi̍h lō͘-ēng? Si̍t-chāi sī chun-kui tē-it hó lah!! Lí khoàⁿ, lín tiong-kan kiám ū lâng pí goá khah chun-kuì? Lâng nā ū chhiú-chí put-lūn loā kuì--ê, lóng sī koà tī goá chit ki; só͘-í goá siāng tit lâng thiàⁿ, goá ē kham-tit lâi chò thâu.
Boé-chńg-cháiⁿ chiū kóng, goá sui-jiân sī sè-ki, goá siāng gâu ho̍k-sāi lán ê chú-lâng; in-uī hī-khang chiūⁿ iā tio̍h goá khàng, phiⁿ-khang-sái iā tio̍h goá, nā bô goá, lín sì-ê kiám ē ēng tit?
Chú-lâng chiū kóng, lín só͘ kóng--ê lóng ū lí-khì. Chóng-sī lín ē thang chò-kang sī tāi-ke ū saⁿ pang-chān ê iân-kò͘; só͘-í lín m̄-thang siūⁿ “Goá siāng gâu, siāng ū lō͘-ēng,” Sio̍k-gú kóng, Lám-lám bé iā-sī ū chi̍t pō͘ that. ǹg-bāng lín m̄-thang saⁿ khoàⁿ-khin, ē thang saⁿ pang-chān--ê, sī siāng gâu.
漢羅（Ùi原文改寫）
III. 甚物上gâu
(L. P. T. )
- 11，no. 596，pp. 15-16
有一擺，有5枝的指頭仔teh開會議，相佮參詳講，咱中間甚物人通做頭來管轄攏總的指頭仔。
大ku母起來就講兄弟仔，我想我會堪得做頭來管；因為我上有路用，閣上有力！設使若欲提一本冊也是我家己，恁著四個；所以我，佇恁中間上有力！
指指講，干焦有力有甚物路用？恁看我不論甚物時我著攏出頭。若是人毋知路也是我共伊報路，罵囡仔也是我共伊指，若無我，你大ku母比看lè！
中指徛起來就講，恁所講是攏展恁的本事若定，你看我遮懸；又閣我不時攏徛佇恁中間是佇中央，恁兩爿攏是我跟隨的部下。
無名指聽了不止受氣，就講，恁所講雖然是有力，也是講上大的有甚物路用？實在是尊貴第一好啦！！你看，恁中間敢有人比我較尊貴？人若有手指不論偌貴--的，攏是掛佇我這支；所以我上得人疼，我會堪得來做頭。
尾chńg指就講，我雖然是細支，我上gâu服事咱的主人；因為耳孔上也著我khàng，鼻空屎也著我，若無我，恁四个敢會用得？
主人就講，恁所講--的攏有理氣。總是恁會通做工是大家有相幫贊的緣故；所以恁毋通想「我上gâu，上有路用，」俗語講，荏荏馬也是有一步踢。向望恁毋通相看輕，會通相幫贊--的，是上gâu。