Khàu Chhun-bíPermalink

文獻資訊Permalink

白話字（原文數位化）Permalink

Khàu Chhun-bí

(Koeh Chuí-lêng)

1. 11, no. 596, pp. 29-30

Goá só͘ thiàⁿ ê Chhun-bí, lí sī lāu-bú ko͘ siⁿ ê kiáⁿ, lí bú siú-chiat, chīn-sim chai-poê lí, kàu Tâi-lâm Lú-o̍h chut-gia̍p liáu, hōng-chit tī Sin-iâⁿ Iù-tī-hn̂g, chīn lí ê gī-bū choè-kang. 1933 nî 8 ge̍h, tuì Ko-hiông lín sì-kū Tiuⁿ Jīm-kuì Sian-siⁿ siāu-kài, goá thàm-thiaⁿ So͘ Iûⁿ--sī Khiam-bí Chip-sū, chiàu i chèng-bêng, kap lí 4 nî choè tông-chhong, sù-tek chiâu-pī, thiâm-chēng, un-sûn, hó sèng-chêng, gâu thiàⁿ lâng, choè-kang bín-chia̍t ū chhù-sū, chīn-la̍t chàn-sêng, sī chin hó.

Kin-nî chiaⁿ-ge̍h tī Sin-tiàm kiat-hun, chi̍t lé-pài kú chiū lâi Pîn-tong. 6 ge̍h 16 ji̍t tò-tńg lâi Tâi-pak, tī Tâi-pak Pēⁿ-īⁿ chiū-i. 7 ge̍h khì Ngāu-san-oân thái-ko pēⁿ-īⁿ choán-tē liâu-ióng, tuì ka-têng ê sī-toā-lâng iú-hàu, gâu sūn-thàn, tuì toā-soè chiàu lé-sò͘ pêng-hô kè ji̍t. 10 ge̍h 6 ji̍t kap toā-soè saⁿ-sî, hoaⁿ-hí chiū-chhia khì Pîn-tong. 10 ge̍h 13 ji̍t chá-khí 4 tiám cheng, khí-lâi chú-pn̄g, ài hù kip-hêng-chhia tńg-khì Tâi-pak, ēng Chiú-cheng khí-hé, hut-jiân chiú-cheng po̍k-hoat, choân-sin to̍h-hé, chhám-chōng hō͘ lâng put-jím khoàⁿ, che̍k-sî phah-si̍t, kng-ji̍p Hoán-thióng I-īⁿ tī-liâu. Ē-po͘ 3 tiám goā cheng, siū Chú tiàu-khì, pia̍t-sè. ài ah! Khó-lîn Chhun-bí, lí tú-tio̍h chit hō chhám-sí, hō͘ goá ê sim chhin-chhiūⁿ li̍h-khì, beh cháiⁿ-iūⁿ hō͘ goá oē an-uì ah!

Sì-tiám goā kng lí tńg-lâi koaⁿ-sià, hit-mî Tī-suí kang-sū chit-oân, 6 lâng tī lí ê koan-chêng kò͘ kàu thiⁿ-kng, 10 tiám cheng ūn-koan kàu Pîn-tong ia̍h, Tī-suí kang-sū Chú-jīm í-hā 40 goā lâng, kap Pîn-tong Kàu-hoē tāi-piáu sàng kàu ia̍h-lāi, kàu Tâi-lâm ia̍h, 30 goā lâng lâi-tán-chih, chē chū-tōng-chhia, chhiú-chhia sàng kàu An-pêng lé-pài-tn̂g kò-pia̍t-sek. Su-hoē-chiá Siau Bêng-chiok Thoân-tō-su, gîm-si, kî-tó, tha̍k Sèng-chheh, soat-kàu, lí-le̍k, tiàu-sû. Tī-suí kang-sū tāi-piáu Bo̍k-iá Chú-jīm, Tâi-lâm Kàu-hoē tāi-piáu Ko Hâu--sī lú Tiúⁿ-ló, tiàu-tiān chin choē thong, hoē-chòng-chiá pah-goā lâng sàng kàu bōng-toē, m̄-kam lâu ba̍k-sái, kā lí ai-tō, toā-hiaⁿ Khé-te̍k, toā-só Sìn-sio̍k, toā-ko͘ Léng-lī, saⁿ-ko͘ Sio̍k-bín, sì-chek Hō͘-seng, sì-ko͘ Chhian-kim, gō͘-chek Î-sin, hu Khé-sû. O͘-ho͘ ai-chāi, lí khì ah! Chhin-chhiūⁿ khoe-chuí lâu-lo̍h, chhin-chhiūⁿ hong-chhe tn̄g-soàⁿ, lí éng-oán kap Chú khiā khí tī Bêng-kiong.

漢羅（Ùi原文改寫）Permalink

哭春美

(郭水龍)

1. 11，no. 596，pp. 29-30

我所疼的春美，你是老母孤生的囝，你母守節，盡心栽培你，到台南女學卒業了，奉職佇新營幼稚園，盡你的義務做工。1933年8月，對高雄恁四舅張任貴先生紹介，我探聽蘇楊--氏謙美執事，照伊證明，佮你4年做同窗，四德齊備，恬靜，溫純，好性情，gâu疼人，做工敏捷有次序，盡力贊成，是真好。

今年正月佇新店結婚，一禮拜久就來屏東。6月16日倒轉來台北，佇台北病院就醫。7月去樂山園thái-ko病院轉地療養，對家庭的序大人有孝，gâu順趁，對大細照禮數平和過日。10月6日佮大細相辭，歡喜就車去屏東。10月13日早起4點鐘，起來煮飯，愛赴急行車轉去台北，用酒精起火，忽然酒精暴發，全身著火，慘狀予人不忍看，即時拍熄，扛入Hoán-thióng醫院治療。下晡3點外鐘，受主召去，別世。ài ah！可憐春美，你拄著這號慘死，予我的心親像裂去，欲怎樣予我會安慰啊！

四點外扛你轉來官舍，彼暝Tī-suí工事職員，6人佇你的棺前顧到天光，10點鐘運棺到屏東驛，Tī-suí工事主任以下40外人，佮屏東教會代表送到驛內，到台南驛，30外人來等接，坐自動車，手車送到安平禮拜堂告別式。司會者蕭Bêng-chiok傳道師，吟詩，祈禱，讀聖冊，說教，履歷，弔詞。Tī-suí工事代表牧野主任，台南教會代表高Hâu--氏lú長老，弔電真濟通，會葬者百外人送到墓地，毋甘流目屎，共你哀悼，大兄Khé-te̍k，大嫂Sìn-sio̍k，大姑Léng-lī，三姑Sio̍k-bín，四叔Hō͘-seng，四姑Chhian-kim，五叔Î-sin，夫Khé-sû。嗚呼哀哉，你去啊！親像溪水流落，親像風吹斷線，你永遠佮主徛起佇明宮。