Thâi-iâⁿ A-má-le̍kPermalink

文獻資訊Permalink

白話字（原文數位化）Permalink

Thâi-iâⁿ A-má-le̍k

(Chhut 17:11-13)

(I. S. I.)

1. 11, no. 596, pp. 11-12

Í-sek-lia̍t peh-sèⁿ tuì chhut Ai-ki̍p liáu-āu, ū tú-tio̍h kuí-nā khoán ê kan-khó͘. Ū-sî chhuì-ta, bô chuí thang lim; pak-tó͘ iau, bô mi̍h thang chia̍h. Chiah ê kan-khó͘, Siōng-tè lóng ū siat-hoat pang-chān in. Chóng-sī choè te-it hō͘ in kiaⁿ-hiâⁿ--ê, chiū-sī tuì-te̍k. Khí-thâu tī āu-bīn ū Hoat-ló ê kun-peng teh tui, kàu āu-lâi tī chêng-bīn ū Ka-lâm ê pún-tē lâng teh chó͘-tòng. Chiah ê tuì-te̍k ê tiong-kan, hō͘ in chin kan-khó͘--ê, chiū-sī A-má-le̍k lâng.

Mô͘-se chhoā peh-sìⁿ tī Lí-hui-thêng kap A-má-le̍k cho̍k kau-chiàn. Hit-sî Iok-su-a teh tok-chiàn. Mô͘-se chiūⁿ soaⁿ, chhiú nā 攑 koân, Í-sek-lia̍t lâng chiū iâⁿ; chhiú nā pàng kē, peh-sìⁿ chiū su. In-uī Mô͘-se, chhiú nā sng, chiū pàng kē, só͘-í A-lûn Hō͘-ní soá chio̍h hō͘ i chē, soà hû i ê chhiú. Tuì án-ni peh-sìⁿ toā thâi-iâⁿ A-má-le̍k cho̍k.

Nā chiong Í-sek-lia̍t lâng pí-phēng hoē-lāi ê sìn-tô͘, A-má-le̍k cho̍k thang pí-phēng mô͘-kuí. Í-sek-lia̍t lâng tī khòng-iá ū tú-tio̍h iau, chhuì-ta: lán tiàm sè-kan iā ū chéng-chéng ê hoān-lān chhi-chhám. Che ū-sî ē éng-hióng kò-jîn kap kàu-hoē; chóng-sī choè-toā ê chó͘-gāi, chiū-sī mô͘-kuí ê hām-hāi lâng. Mô͘-kuí sī chhin-chhiūⁿ A-má-le̍k cho̍k.

Chhiáⁿ siūⁿ nn̄g hāng:-

1. A-má-le̍k-cho̍k ê kong-kek

A-má-le̍k sī chin hiong-béng ê bîn-cho̍k, tiàm tī Âng-hái kap Sí-hái hit tiong-kan ê tē-kài. Ū-sî sì-kè kiâⁿ chhoē chia̍h, óng-lâi bô tiāⁿ-tio̍h. I Pí-tek 5:8 kóng, “Mô͘-kuí sī chhin-chhiūⁿ háu ê sai, sì-kè kiâⁿ teh chhoē só͘ thang thun-chia̍h--ê.” Mô͘-kuí siông-siông tī kàu-hoē lāi kap kò-jîn ê tiong-kan teh chhoē khoàⁿ ū sím-mi̍h ki-hoē thang hām-hāi. Khoàⁿ kàu-hoē teh heng, i chiū hō͘ hoē-lāi ê lâng put-hô, seⁿ-khí chéng-chéng ê kiáu-jiáu. Tuì án-ni lâi chhia-tò hit ê kàu-hoē. Só͘-í lán tio̍h put-sî tî-hông. iā ū-sî hō͘ kò-jîn siū bê-he̍k; kiám-chhái hō͘ in tī ū-chîⁿ ū-sè ê sî lâi hām-lo̍h choē, kiat-kau pháiⁿ pêng-iú. Jia̍t-sim ê sî tú-tio̍h kan-khó͘ hoān-lān, hō͘ i ê sim sit-chì, sìn-gióng tuī-lo̍h. Chhin-chhiūⁿ chit hō, lán lóng tio̍h tî-hông.

A-má-le̍k lâng ū-sî bih tī soaⁿ-khang, in-uī Ka-lâm-tē ū chē-chē soaⁿ. In bih tī-hia, nā tú-tio̍h lâng tuì hia keng-koè, chiū chhiúⁿ in ê mi̍h, hāi-sí lâng ê sèⁿ-miā. Si̍t-chāi guî-hiám. Mô͘-kuí iā siông-siông teh tng-tán lán, thàn lán bô chù-ì, tuì i ê hia̍t keng-koè ê sî chiū chhut-lâi. A-má-le̍k-cho̍k ū-sî chio-chi̍p chin chē lâng tiàm pò͘-pêⁿ lāi, kiat-sok in e sè-le̍k, lâi kong-kek[sic.] Í-sek-lia̍t lâng: pàng hoé sio chhù, chhiúⁿ in ê mi̍h, thâi-sí in ê kiáⁿ. Khoàⁿ hiān-sî sè-kan siā-hoē ê chōng-thài chiū chai, pháiⁿ ê sè-le̍k chin toā. Sui-jiân bûn-bêng ti̍t-chìn, tì-sek ti̍t khui, iáu-kú Mô͘-kuí ê sè-le̍k, siā-hoē ê pháiⁿ, kiám m̄-sī chin kiông mah? Ki-tok-tô͘ ah! Tāi-ke tio̍h khí-lâi, piàⁿ-tīn kiat-sok lán ê lêng-le̍k lâi kap i su-iâⁿ!

1. Í-sek-lia̍t lâng thâi-iâⁿ

Hit ji̍t in thâi-iâⁿ, sī tuì kuí-nā hong-bīn ê khuì-la̍t:-

(a) Mô͘-se ê kî-tó. Mô͘-se khiā tī soaⁿ-téng, chhiú 攑 koân, chiū iâⁿ; pàng lo̍h, peh-sèⁿ chiū su. Chhiú 攑 koân sī teh kî-tó. Tuì án-ni Siōng-tè pang-chān chiū khah-iâⁿ. Kàu-hoē nā ài heng, tio̍h ū oa̍h-khì ê kî-tó. Kò-jîn nā ài tek-sèng, tio̍h siông-siông kap Chú kau-poê. Chhiáⁿ tāi-ke chhiú tio̍h put-sî gia̍h koân, uī kàu-hoē kap pún-sin kî-tó. Sêng-kong ê bo̍k-su sī oá-khò kî-tó.

(b) A-lûn kap Hō͘-jíⁿ ê pang-chān. Mô͘-se gia̍h chhiú kî-tó kui-ji̍t ē siān, tòng-bē-tiâu, chiū ài pàng kē. Bí-kok Uí-ní-sùn Chóng-thóng kap i ê hu-jîn, in-uī sin-nî chiap-thāi lâng-kheh kap lâng tùn-chhiú, hit mî chhiú toā sng. Mô͘-se ê chhiú iā chin sng. Kai-chài hit-sî ū A-lûn Hō͘-jíⁿ soá chio̍h hō͘ i chē, nn̄g lâng hû-chhah i ê chhiú, tì-kàu bô pàng-lo̍h-lâi, peh-sèⁿ chiū khah-iâⁿ. Lia̍t-uī tng-chit--ê kap chèng hoē-iú, tāi-ke tio̍h tàu pang-chān thoân-kàu ê lâng, he̍k-sī pang-chān chò kang, he̍k-sī thè kî-tó. án-ni kàu-hoē chiū ē heng-ong.

(c) Peh-sìⁿ chīn-la̍t kau-chiàn. Siat-sú kan-ta Mô͘-se kî-tó, in m̄ hû-chhah, iā peh-sèⁿ tiām-tiām bô tín-tāng. án-ni kiám ē iâⁿ? Koat-toàn bē. Lâng iā tio̍h chhut-la̍t, Siōng-tè chiah beh pang-chān. Se-iûⁿ ū sio̍k-gú kóng, “Siōng-tè pang-chān kut-la̍t ê lâng.” Hit ji̍t hiah ê pe-sèⁿ chin chhut-la̍t, tī soaⁿ-kha kau-chiàn, Iok-su-a chò chí-hui-koaⁿ. In piàⁿ sèⁿ-miā, só͘-í toā tek-sèng.

Lia̍t-uī, goān lán tâng-sim hia̍p-le̍k, uī Chú ê kàu-hoē lâi chīn-tiong. Siōng-tè ān pang-chān, lán chiū ē tek-sèng.

漢羅（Ùi原文改寫）Permalink

刣贏亞瑪力

(出17：11-13)

(I. S. I. )

1934。11，no。596，pp。11-12

以色列百姓對出埃及了後，有拄著幾若款的艱苦。有時喙焦，無水通啉；腹肚枵，無物通食。遮的艱苦，上帝攏有設法幫贊in。總是做第一予in驚惶--的，就是對敵。起頭佇後面有法老的軍兵咧追，到後來佇前面有迦南的本地人咧阻擋。遮的對敵的中間，予in真艱苦--的，就是亞瑪力人。

摩西chhoā百姓佇Lí-hui-thêng佮亞瑪力族交戰。彼時約書亞咧督戰。摩西上山，手若攑懸，以色列人就贏；手若放低，百姓就輸。因為摩西，手若酸，就放低，所以亞倫戶珥徙石予伊坐，紲扶伊的手。對按呢百姓大刣贏亞瑪力族。

若將以色列人比並會內的信徒，亞瑪力族通比並魔鬼。以色列人佇曠野有拄著枵，喙焦：咱踮世間也有種種的患難悽慘。這有時會影響個人佮教會；總是最大的阻礙，就是魔鬼的陷害人。魔鬼是親像亞瑪力族。

請想兩項：-

1. 亞瑪力族的攻擊

亞瑪力是真兇猛的民族，踮佇紅海佮死海彼中間的地界。有時四界行揣食，往來無定著。彼得前書5：8講，「魔鬼是親像哮的獅，四界行咧揣所通吞食--的。」魔鬼常常佇教會內佮個人的中間咧揣看有甚物機會通陷害。看教會咧興，伊就予會內的人不和，生起種種的攪擾。對按呢來捙倒彼个教會。所以咱著不時持防。也有時予個人受迷惑；檢采予in佇有錢有勢的時來陷落罪，結交歹朋友。熱心的時拄著艱苦患難，予伊的心失志，信仰墮落。親像這號，咱攏著持防。

亞瑪力人有時覕佇山空，因為迦南地有濟濟山。In 覕佇遐，若拄著人對遐經過，就搶in的物，害死人的性命。實在危險。魔鬼也常常咧當等咱，趁咱無注意，對伊的穴經過的時就出來。亞瑪力族有時招集真濟人踮布棚內，結束in的勢力來攻擊以色列人：放火燒厝，搶in的物，刣死in的囝。看現時世間社會的狀態就知，歹的勢力真大。雖然文明直進，智識直開，猶過魔鬼的勢力，社會的歹，敢毋是真強mah？基督徒啊！大家著起來，拚陣結束咱的能力來佮伊輸贏！

1. 以色列人刣贏

彼日in刣贏，是對幾若方面的氣力：-

(a)摩西的祈禱。摩西徛佇山頂，手攑懸，就贏；放落，百姓就輸。手攑懸是咧祈禱。對按呢上帝幫贊就較贏。教會若愛興，著有活氣的祈禱。個人若愛得勝，著常常佮主交陪。請大家手著不時攑懸，為教會佮本身祈禱。成功的牧師是倚靠祈禱。

(b)亞倫佮戶珥的幫贊。摩西攑手祈禱規日會siān，擋袂牢，就愛放低。美國Uí-ní-sùn總統佮伊的夫人，因為新年接待人客佮人扽手，彼暝手大酸。摩西的手也真酸。佳哉彼時有亞倫戶珥徙石予伊坐，兩人扶插伊的手，致到無放落來，百姓就較贏。列位當職--的佮眾會友，大家著鬥幫贊傳教的人，或是幫贊做工，或是替祈禱。按呢教會就會興旺。

(c)百姓盡力交戰。設使干焦摩西祈禱，in毋扶插，也百姓恬恬無振動。按呢敢會贏？決斷袂。人也著出力，上帝才欲幫贊。西洋有俗語講，「上帝幫贊骨力的人。」彼日遐的百姓真出力，佇山跤交戰，約書亞做指揮官。In拚性命，所以大得勝。

列位，願咱同心協力，為主的教會來盡忠。上帝若幫贊，咱就會得勝。