講壇
Káng-toâⁿ
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 台灣教會公報/芥菜子 |
| 卷期 | 第595卷 |
| 日期 | 1934/10 |
| 頁數 | 22-23 |
白話字（原文數位化）
Káng-toâⁿ
(Tân Chheng-gī)
- 10, no. 595, pp. 22-23
Chè-si-tiúⁿ ê sò͘-siōng, kap Pí-lia̍p-to ê chhâi-phoàⁿ (Má-khó 15:1-15).
Chú Iâ-so͘ tī sè-kan ê sî, chiu-iû sù-hong thoân-tō. āu-lâi ū hō͘ Iû-thài lâng ah-sàng kàu Pí-lia̍p-to ê bīn-chêng. Chit ê Pí-lia̍p-to sī sím-mi̍h lâng, chiū-sī Lô-má Hông-tè só͘ phài lâi Iû-thài choè Chóng-tok--ê. I ê chit-jīm sui-bóng sī siu-sè, iáu-kú iā ū tī-lí ê koân; só͘-í ū siat Kong-thiaⁿ lâi chhâi-phoàⁿ peh-sìⁿ ê tāi-chì. Tng-sî Iû-thài ê chè-si-tiúⁿ, lām-sám kò Iâ-so͘, só͘-í ah-sàng Iâ-so͘ kàu Pí-lia̍p-to ê bīn-chêng.
Lūn chè-si-tiúⁿ ê sò͘-siōng ū 3 hāng:
-
Iú-he̍k jîn-bîn. Chiū-sī kóng, Iâ-so͘ thoân īⁿ-toan ê kàu, lâi iú-he̍k peh-sìⁿ, kiáu-jiáu chèng-lâng, chit-ê sī poē-ge̍k ê ì-sù, ēng án-ni lâi bû-kò, ài hō͘ Iâ-so͘ sí. Iâ-so͘ tī sè-kan ê sî, sì-koè thoân tō-lí, i-pīⁿ, koáⁿ-kuí, lóng sī lī-ek lâng, m̄-bat hāi lâng; Iû-thài lâng án-ni kò Iâ-so͘, si̍t-chāi sī lām-sám ê kò-sò͘.
-
Kìm la̍p kok-sè. Chiū-sī kóng, Kìm-chí la̍p-sè tī Kai-sat, chit-ê chiū-sī lām-sám kóng Iâ-so͘ ū bô͘-hoán ê ì-sù. Chóng-sī Iâ-so͘ m̄-bat kiâⁿ án-ni, I bêng-bêng kóng tio̍h la̍p-sè tī Kai-sat, bat kiò ha̍k-seng khì tiò hî, tit-tio̍h kim lâi la̍p-sè, choân bô kìm-chì ê ì-sù; iā bat kóng, ēng Kai-sat ê mi̍h la̍p Kai-sat; ēng Siōng-tè ê mi̍h la̍p Siōng-tè. In si̍t-chāi sī lām-sám kò.
-
Chhiàm-chheng chò ông. Chiū-sī kóng, Iâ-so͘ chū-chheng choè Iû-thài ông, ì-sù sī ài hō͘ Pí-lia̍p-to thiaⁿ-liáu toā siū-khì, lâi pān Iâ-so͘ ū bô͘-hoán tāi-ge̍k ê choē, kè-bô͘ si̍t-chāi káu-koài. Chóng-sī Iâ-so͘ ê choè ông, kap sè-kan jîn ông put-tông, I tuì Pí-lia̍p-to kóng, Goá ê kok bô sio̍k tī sè-kan, sī choè thian-kok ê ông, án-ni Pí-lia̍p-to boē-tit-thang gí i bô͘-hoán ê choē. Chit ê si̍t-chāi sī mō͘-kò.
Chit 3 hāng sī chè-si-tiúⁿ mō͘-kò ê lí-iû. Taⁿ lâi khoàⁿ Pí-lia̍p-to cháiⁿ-iūⁿ ê chhâi-phoàⁿ.
Lūn Pí-lia̍p-to ê chhâi-phoàⁿ ia̍h ū 3 hāng:
-
Bô chiàu kong-gī. In-uī kì-jiân bêng-bêng chai tio̍h, m̄-tio̍h, chiàu-lí èng-tong phoàⁿ-toàn chú-koat, hoán-tńg tì-chi tō͘-goē, kan-ta kóng, Goá khoàⁿ chit ê lâng bô choē, án-ni nā-tiāⁿ.
-
Poē liáu kok-hoat. Chiàu kok-hoat, ū choē, eng-kai tio̍h pān; bô choē, eng-kai tio̍h khai-hòng. Cháiⁿ-iūⁿ chhut-chāi chèng-lâng ê só͘ ài, lâi sūn chèng-lâng ê ì-sù.
-
Khoàⁿ-khin sìⁿ-miā. Lâng ê sìⁿ-miā sī tē-it iàu-kín, hoán-tńg chiong lâng ê sìⁿ-miā choè thit-thô mi̍h, ka-kī soé-chhiú, kóng i bô choē. Si̍t-chāi chin toā chhò-gō͘.
Lūn thiaⁿ sò͘-siōng ê sū kap chhâi-phoàⁿ, ia̍h ū 3 hāng ê iàu-kín:
-
Tio̍h ēng liông-sim, thèng-chhat sī-hui.
-
Tio̍h chiàu chèng-lí, m̄-thang phian-su.
-
Tio̍h khoàⁿ oan-óng ê sū-chêng, tio̍h siat-hoat, bián kiaⁿ. Pí-lia̍p-to choân bô chiàu chit ê kui-kú, só͘-í Iâ-so͘ bô choē lâi siū-sí, si̍t-chāi hián-chhut i chhâi-phoàⁿ Iâ-so͘ ê pē-pēng. Chú Iâ-so͘ sui-jiân siū bû-lí ê chhâi-phoàⁿ lâi siū sí-hêng tī si̍p-jī-kè, hoán-tńg kiù-lêng sio̍k-choē ê toā kong-lô, hō͘ bān-sè ê choē-jîn thang tit-tio̍h Chú ê kiù-sio̍k, lâi hióng-siū éng-seng ê toā hok-khì. Lán tio̍h siông-sè siūⁿ, chit 3 chām. Thâu-chi̍t chām: Chè-si-tiúⁿ ê só͘-siōng. Tē-jī chām: Pí-lia̍p-to ê chhâi-phoàⁿ. Tē-saⁿ chām: Thiaⁿ sò͘-siōng kap chhâi-phoàⁿ tio̍h sím-mi̍h khoán. Nā siông-sè siūⁿ, chin khoài bêng-pe̍k.
漢羅（Ùi原文改寫）
講壇
(陳清義)
- 10，no .595，pp .22-23
祭司長的訴訟，佮彼拉多的裁判(馬可15：1-15)。
主耶穌佇世間的時，周遊四方傳道。後來有予猶太人押送到彼拉多的面前。這个彼拉多是甚物人，就是羅馬皇帝所派來猶太做總督--的。伊的職任雖罔是收稅，猶久也有治理的權；所以有設公廳來裁判百姓的代誌。當時猶太的祭司長，濫糝告耶穌，所以押送耶穌到彼拉多的面前。
論祭司長的訴訟有3項：
-
誘惑人民。就是講，耶穌傳異端的教，來誘惑百姓，攪擾眾人，這个是悖逆的意思，用按呢來誣告，愛予耶穌死。耶穌佇世間的時，四界傳道理，醫病，趕鬼，攏是利益人，毋捌害人；猶太人按呢告耶穌，實在是濫糝的告訴。
-
禁納國稅。就是講，禁止納稅佇該撒，這个就是濫糝講耶穌有謀反的意思。總是耶穌毋捌行按呢，伊明明講著納稅佇該撒，捌叫學生去釣魚，得著金來納稅，全無禁止的意思；也捌講，用該撒的物納該撒；用上帝的物納上帝。In實在是濫糝告。
-
僭稱做王。就是講，耶穌自稱做猶太王，意思是愛予彼拉多聽了大受氣，來辦耶穌有謀反大逆的罪，計謀實在狡獪。總是耶穌的做王，佮世間人王不同，伊對彼拉多講，我的國無屬佇世間，是做天國的王，按呢彼拉多袂得通擬伊謀反的罪。這个實在是冒告。
這3項是祭司長冒告的理由。今來看彼拉多怎樣的裁判。
論彼拉多的裁判亦有3項：
-
無照公義。因為既然明明知著，毋著，照你應當判斷主決，反轉置之度外，干單講，我看這个人無罪，按呢nā-tiāⁿ。
-
背了國法。照國法，有罪，應該著辦；無罪，應該著開放。怎樣出在眾人的所愛，來順眾人的意思。
-
看輕性命。人的性命是第一要緊，反轉將人的性命做thit迌物，家己洗手，講伊無罪。實在真大錯誤。
論聽訴訟的事佮裁判，亦有3項的要緊：
-
著用良心，聽察是非。
-
著照正理，毋通偏私。
-
著看冤枉的事情，著設法，免驚。彼拉多全無照這个規矩，所以耶穌無罪來受死，實在顯出伊裁判耶穌的弊病。主耶穌雖然受無理的裁判來受死刑佇十字架，反轉救靈贖罪的大功勞，予萬世的罪人通得著主的救贖，來享受永生的大福氣。咱著詳細想，這3站。頭一站：祭司長的訴訟。第二站：彼拉多的裁判。第三站：聽訴訟佮裁判著甚物款。若詳細想，真快明白。