瑞芳教會
Suī-hong Kàu-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報/芥菜子 |
| 卷期 | 第595卷 |
| 日期 | 1934/10 |
| 頁數 | 30-31 |
白話字（原文數位化）
Suī-hong Kàu-hoē
- 10, no. 595, pp. 30-31
Suī-hong sī Tâi-oân chi̍t ê chhut-miâ ê só͘-chāi. Thâu chi̍t-hāng ê chhut-miâ chiū-sī chhut-kim. Tī chit ê pháiⁿ kéng-khì ê sî-chūn Suī-hong it-hoat hó thàn-chia̍h; in-uī chin choē lâng tuì sì-kè lâi ku̍t-kim. Koh chi̍t-hāng ê chhut-miâ chiū-sī hō͘-chuí; chi̍t-nî ê tiong-kan lo̍h hō͘ ū poàⁿ-nî khah ke. Sui-jiân sī kāu hō͘-chuí ê só͘-chāi, iáu-kú Thian-kok ê ké-chí chin khoài chhut; ta̍k nî lóng ū ke-thiⁿ lâng-gia̍h.
Lūn Suī-hong Kàu-hoē, chiū-sī Iûⁿ Chiong Sian-siⁿ tī 1919 n5i 6 ge̍h 17 hō, lâi choè Thoân-tō-su. Tī nn̄g nî chêng, chiū àn-sǹg beh kiàn-tiok chi̍t-keng ê sin pài-tn̂g khǹg tī sin Suī-hong. uī-tio̍h tāi-ke ê jia̍t-sêng, phí-jîn chiū hó-taⁿ kā tāi-ke bō͘-chi̍p kià-hù kim; iā ū bō͘-chi̍p nn̄g-chheng thóng gûn. Tāi-ke chiū chham-siông ēng tâu-phiò, to-sò͘ lâi kái-koat hit ê uī-tì. āu-lâi ū tâu-phiò siá ta̍k-lâng ê ì-kiàn, ài sin Suī-hong-ê ū 47 phiò; ài kū Suī-hong-ê ū 24 phiò. āu-lâi Tióng-chip-hoē kan-ta kái-koat siu-lí kū pài-tn̂g, án-ni soà bô khí sin--ê. Sui-jiân pài-tn̂g khí bô chiâⁿ, iáu-kú Siōng-tè ê kok ti̍t-ti̍t khoah-toā, kàu-hoē ji̍t-ji̍t chìn-pō͘. Tī kū-nî niá Soé-lé ji̍p Sèng-hoē kiōng ū 26 miâ. Hiān-sî muí lé-pài ê chhut-sek-chiá ū chi̍t-pah lâng í-siōng; lé-pài hiàn-kim, pêng-kun chi̍t lé-pài ū 1.50 sián. M̄-nā án-ni, koh-chài muí ge̍h-ji̍t ê thâu lé-pài ū te̍k-pia̍t hiàn-kim; muí ge̍h-ji̍t ū 3 kho͘ teh î-chhî kan-khó͘ lâng. M̄-nā án-ni, ū 200 kho͘ ê ki-pún-kim kià tī Iû-piān-kio̍k. Kin-nî Thoân-tō sok-kim, muí ge̍h-ji̍t tam-tng 35 kho͘. Hiān-jīm Tiúⁿ-ló chi̍t miâ, chiū-sī Lîm En̂g-bō͘. Chip-sū nn̄g-miâ, chiū-sī Liāu Thian-hô, koh chi̍t ê sī Kán Chheng-hái.
漢羅（Ùi原文改寫）
瑞芳教會
- 10，no. 595，pp. 30-31
瑞芳是台灣一个出名的所在。頭一項的出名就是出金。佇這个歹景氣的時陣瑞芳益發好趁食；因為真濟人對四界來掘金。閣一項的出名就是雨水；一年的中間落雨有半年較加。雖然是厚雨水的所在，猶久天國的果子真快出；逐年攏有加添人額。
論瑞芳教會，就是楊將先生佇1919年 6月17號，來做傳道師 。佇兩年前，就按算欲建築一間的新拜堂囥佇新瑞芳。為著大家的熱誠，鄙人就好膽共大家募集寄付金；也有募集兩千桶銀。大家就參詳用投票，多數來解決彼个位置。後來有投票寫逐人的意見，愛新瑞芳的有47票；愛舊瑞芳的有24票。後來長執會干焦解決修理舊拜堂，按呢紲無起新--的。雖然拜堂起無成，猶久上帝的國直直闊大，教會日日進步。佇舊年領洗禮入聖會共有26名。現時每禮拜的出色者有一百人以上；禮拜獻金，平均一禮拜有1.50 sián。毋若按呢，閣再每月日的頭禮拜有特別獻金；每月日有3箍咧維持艱苦人。毋若按呢，有200箍的基本金寄佇郵便局。今年傳道束金，每月日擔當35箍。現任長老一名，就是林En̂g-bō͘。執事兩名，就是廖天和，閣一个是簡清海。