啊！陳先生娘！
Ah! Tân Sian-siⁿ niû!
文獻資訊
| 項目 | 資料 |
|---|---|
| 作者 | 劉振芳 Lâu Chín-hong |
| 卷期 | 台灣教會公報 |
| 卷期 | 第595卷 |
| 日期 | 1934/10 |
| 頁數 | 20-21 |
白話字（原文數位化）
Ah! Tân Sian-siⁿ niû!
- 10, no. 595, pp. 20-21
Lâu Chín-hong
Kin chá-khí (7:23), ū siu-tio̍h tuì Ji̍t-pún lâi ê tēng-kî-chûn, só͘ phoè-ta̍t ê Tâi-oân-piān kuí-nā tiuⁿ. Chiông-tiong chi̍t-tiuⁿ khah tāng, khah toā-tiuⁿ ê phoe, sī Tâi-tiong Kàu-hoē Lîm Chhut-choâⁿ Tiúⁿ-ló kià--ê. Kuí-jti8-chêng, chiah chiap-tio̍h i thong-ti koh siat-li̍p 3 miâ ê sin Tiúⁿ-ló ê phoe, taⁿ koh-chài kià--lâi; hut-jiân seⁿ-chhut chi̍t-chéng put-kiat ê û-kám[sic.]. Kàu thiah-khui chi̍t-ē khoàⁿ, chiah chai Tâi-tiong Kàu-hoē, I-su Tân Sok-hong hu-jîn; goân Kàu-hoē Iú Chip-sū Chiu--sī Sioh, pia̍t-sè ê thong-ti. Tī Tâi-oân chiaⁿ goe̍h-ji̍t-chêng koè-sin ê sū sī kū, m̄-kú phoe kàu goá chia chiaⁿ goe̍h-ji̍t āu sī sin. uī-tio̍h sī bô phah-sǹg sū-piàn, chi̍t-sî hóng-hut lia̍h-chò sī bîn-bāng; kàu-hoē iā-sī giâm-siok ê sū-si̍t. O͘-ho͘! Tân Sian-seⁿ-niû taⁿ chò thaⁿ-kài ê lâng. Lī-khui hiān-sè bí-boán ê ke-têng, pàng só͘ thiàⁿ iú-hàu sì-ê lēng-jiōng; kap î-it ê tông-phoān-chiá Tân Sian-seⁿ. Ta Ni í-keng soah i ê tio̍h-boâ, tńg-khì Pē tau. Lūn i ê chò lâng:-
Lú-kài sian-khu-chiá ê Sian-siⁿ-niû:
M̄-nā Hu-kun Tân Sian-seⁿ sī chò Chhī ê Hia̍p-gī hoē-oân nā-tiāⁿ, chiū i pún-sin iā-sī chò Tâin-tiong chhī-lāi Hū-jîn-hoē ê kàn-sū. ē-kì-tit 6 nî chêng, Tâi-tiong chhī-lāi Pún-tó lâng siōng-liû ke-têng ê hū-jîn kan, ū siaⁿ teh chú-chhiòng ài cho͘-chit hū-jîn-hoē. Bo̍k-tek káⁿ-sī thang hiòng-siōng hū-jîn ê tē-uī, khé-hoat tì-lêng, seng-oa̍h kái-siān, í-ki̍p cheng-sîn-siōng ê siu-ióng. Tng-sî Sian-seⁿ-niû sī chò hoat-kí-jîn ê chi̍t--ê[sic.]. Liáu-āu, hoē sêng-li̍p, iā tiòng-soán chò kàn-sū. Tī hit tiong-kan kiaⁿ-liáu hām-lo̍h “Hó͘-thâu niáu-chhú-boé” ê chhiò-pèⁿ, ke̍k-le̍k kap Kàu-hoē sò͘-miâ ê kuì-hu-jîn, saⁿ thê-hê. uī-rio̍h Pún-hoē tong-phun se-chó͘, toā-toā hoat-hui te̍k-pia̍t ê īⁿ-chhái, kòng-hiàn tī hū-jîn-hoē. Só͘-í thang kóng i m̄-nā sī chi̍t-ke ê hu-jîn, iā-sī siā-hoē lú-kài ê siān-khu-chiá. Uí-tāi ah! Sian-seⁿ-niû!
Kàu-hoē tok-sìn-chiá ê Sian-seⁿ-niû
I m̄-nā sìn-chiá ê chi̍t-hūn-chú, tī phí-jîn ê chāi-jīm-tiong, ū siū tiòng-soán chò lú chip-sū. Sui-jiân ka-têng toā, pēⁿ-īⁿ khoah, sū-bū ê sat-tò. iáu-kú tī Chú-ji̍t nā m̄-sī hui-siông ê-chó͘-tòng, tiāⁿ-tio̍h tī Kàu-hoē ê se̍k-siōng ū khoàⁿ-tio̍h i ê bīn, lâi teh kau-poê Siōng-tè. Tân Sian-seⁿ pún-lâng, uī-tio̍h chit-bū-siōng ê to-toan, kīn-lâi khah hán-tit lâi kàu-hoē. iáu-kú tī lé-pài ē-po͘, lé-pài ê sî-kan nā kàu, siông-siông pau Si, Sèng-keng piān-piān pek i tio̍h khì kàu-hoē. uī-tio̍h chhit-ji̍t chi̍t pái ê lé-pài bô boán-chiok, put-sî iau-kiû thoân-kàu ê lâng, muí lé-pài chì-chió chi̍t pái tī i ê ka-têng; thang chhoā toā-sè chò ka-têng ê lé-pài. Te̍k-pia̍t tī hioh-joa̍h lēng-ài kui Tâi ê sî, koh khah tì-ì. Ū-sî goán uī-tio̍h sū-kò͘ tio̍h khì pa̍t-uī, hit àm nā bô khì, chiū liâm-piⁿ koh lâi pài-thok. Tī-chia soà kóng-bêng, ū-sî thoân-kàu ê lâng ná chhin-chhiūⁿ siông-siông tī-hia, chiū-sī uī-tio̍h i ê chù-bûn; goán chiū hoaⁿ-hí kiong-kip. Tuì án-ni thang chai chit-khoán ê thài-tō͘, bô m̄-sī tuì i ê chong-kàu koan-liām ê chhim-khek, sìn-gióng seng-oa̍h ê chin-kiàm; kap cheng-sîn seng-oa̍h bí-hoà ê ko-tiau.
I ê jiat-sêng ê hoān-uî, m̄-nā chāi-tī pún-sin kap ka-têng. I siông-siông bat chhoā iú-sek kai-kip ê hū-lú lâi kàu-hoē. Pit-chiá uī-tio̍h ha̍k-sek, keng-giām khah chió, bat kui-nā-pái siū-tio̍h i àm-chīⁿ tiong-khok thoân-tō ê hoat-tō͘. Chi̍t-sî ná-chún chia̍h-tio̍h tiⁿ-bī, kàu pak-tó͘ pá. Tuì tī i pún-sin sī hū-jîn-hoē uí-oân, pit-chiá bat siū i ê phèng-chhiáⁿ khì Chhī-bîn-koán, ēng “Ki-tok-kàu kap hū-jîn ê tē-uī”, lâi káng-ián hō͘ Hū-jîn-hoē chèng Hoē-oân thiaⁿ. Chit khoán ê hiān-siōng, m̄-sī jîn-kang, hêng-sek kap phoê-siòng. Sī sio̍k tī pún-chit-tek, loē-pō͘-tek; iā-sī tuì tī sìn-gióng cheng-hoa só͘ kiat ê koé-chí. Kám-kek ah! Sian-seⁿ-niû!
Tián-hêng-tek, hiân-chhe liông-bó ê Sian-seⁿ-niû: Jū-gú kóng, “Sè-kan-lâng bô siang-têng châi.” Í-siōng pit-chiá ū sió-khoá kóng-khí kò͘-jîn, sī siā-hoē lú-kài chi̍t ê sian-khu-chiá. I m̄-nā sī chò siā-hoē lâng, tī ka-têng lāi, tuì tī chú-lú sī chi̍t ê chû-ài gâu kà-sī ê lāu-bó. m̄-nā tì-ì tī kiáⁿ-jî ê cheng-sîn kàu-io̍k, iā put-chí koan-sim tī in ê hiān-tiā kàu-io̍k. Sui-jiân pún-sin uī-tio̍h sî-tāi ê chìn-hoà koan-hē, bô siū-tio̍h choan-bûn ê tì-sek. iáu-kú ài i ê kiáⁿ-jî, lóng siū choan-bûn í-siōng ê kàu-io̍k, só͘-í hiān-sî sì ê lēng-ài lóng tī Tang-kiaⁿ. Tióng-lú Siok-cheng tī Lú I-choan, Chhù-lú Siok-loân tī Lú-chú Khí-kho I-choan. iáu-nn̄g--ê, tī Ko-lú chāi-ha̍k tiong.
M̄-nā tuì tī kiaⁿ-jî sī liông-bó, iū-koh tuì tī tiōng-hu sī hiân-chhe. Tī ka-têng choân-pō͘ sī ka-tī liāu-lí siat-hoat. Tī ka-têng siông-siông sī chò tiōng-hu ê pī-lān-só͘, an-sek-só͘, kap chò siā-hoē seng-chûn kēng-cheng ê an-choân tē-tài. Só͘-í thang kóng, tī-ke kà-kiáⁿ, ho̍k-chiông tiōng-hu, bô si̍t-lo̍h hiân-chhe liông-bó ê pún-chit. Tuì chit kuí hāng chóng ha̍p khit-lâi[sic.], tī Siā-hoē sī chò Pek-tāi-nî ê Má-tāi. Tī ka-têng káu-io̍k sī chò Má-līa. Tī ka-têng kàu-io̍k sī ná-chún Bēng-bó. Tī chong-kàu kàu-io̍k, oán-jiân tē 4 sè-kí Kàu-hū Au-gū su-tin ê lāu-bó Mô͘-ní-kah. Tok-sìn ah! Sian-seⁿ-niû!
Choè-āu kiû thiàⁿ-thàng ê Thiⁿ-pē an-uì i ê uî-cho̍k. Bô-kú beh saⁿ-kìⁿ tī Thiⁿ.
Chāi Pak Bí: Lâu Chín-hong.
漢羅（Ùi原文改寫）
啊！陳先生娘！
- 10，no. 595，pp. 20-21
劉振芳
今早起(7：23)，有收著對日本來的定期船，所配達的台灣便幾若張。從中一張較重，較大張的批，是台中教會林出泉長老寄--的。幾日前，才接著伊通知閣設立3名的新長老的批，taⁿ閣再寄--來；忽然生出一種不吉的預感。到拆開一下看，才知台中教會，醫師陳Sok-hong夫人；原教會女執事周--氏惜，別世的通知。佇台灣正月日前過身的事是舊，毋久批到我遮正月日後是新。為著是無拍算事變，一時彷彿掠做是眠夢；教會也是嚴肅的事實。嗚呼！陳先生娘taⁿ做他界的人。離開現世美滿的家庭，放所疼有孝四个lēng-jiōng；佮唯一的同伴者陳先生。今伊已經煞伊的著磨，轉去爸兜。論伊的做人：-
女界先驅者的先生娘：
毋若夫君陳先生是做市的協議會員nā-tiāⁿ，就伊本身也是做田中市內婦人會的幹事。會記得6年前，台中市內本島人上流家庭的婦人間，有聲teh主倡愛組織婦人會。目的敢是通向上婦人的地位，啟發智能，生活改善，以及精神上的修養。當時先生娘是做發起人的一个。了後，會成立，也當選做幹事。佇彼中間驚了陷落「虎頭老鼠尾」的笑柄，極力佮教會數名的貴夫人，相提攜。為著本會東奔西走，大大發揮特別的異彩，貢獻佇婦人會。所以通講伊毋若是一家的夫人，也是社會女界的先驅者。偉大啊！先生娘！
教會篤信者的先生娘
伊毋若信者的一份子，佇鄙人的在任中，有受當選做女執事。雖然家庭大，病院闊，事務的殺到。猶過佇主日若毋是非常的阻擋，定著佇教會的席上有看著伊的面，來teh交陪上帝。陳先生本人，為著職務上的多端，近來較罕得來教會。猶過佇禮拜下晡，禮拜的時間若到，常常包詩，聖經便便迫伊著去教會。為著七日一擺的禮拜無滿足，不時要求傳教的人，每禮拜至少一擺佇伊的家庭；通chhoā大細做家庭的禮拜。特別佇歇熱令嬡歸台的時，閣較致意。有時阮為著事故著去別位，彼暗若無去，就連鞭閣來拜託。佇遮紲講明，有時傳教的人那親像常常佇遐，就是為著伊的注文；阮就歡喜供給。對按呢通知這款的態度，無毋是對伊的宗教觀念的深刻，信仰生活的真劍；佮精神生活美化的高潮。
伊的熱誠的範圍，毋若在佇本身佮家庭。伊常常捌chhoā有識階級的婦女來教會。筆者為著學識，經驗較少，捌幾若擺受著伊暗靜忠告傳道的法度。一時若準食著甜味，到腹肚飽。對佇伊本身是婦人會委員，筆者捌受伊的聘請去市民館，用「基督教佮婦人的地位」，來講演予婦人會眾會員聽。這款的現象，毋是人工，形式佮皮相。是屬佇本質的，內部的；也是對佇信仰精華所結的果子。感激啊！先生娘！
典型的，賢妻良母的先生娘：喻語講，「世間人無雙重才。」以上筆者有小可講起故人，是社會女界一个先驅者。伊毋若是做社會人，佇家庭內，對佇子女是一个慈愛gâu教示的老母。毋若致意佇囝兒的精神教育，也不止關心佇in的現代教育。雖然本身為著時代的進化關係，無受著專門的智識。猶過愛伊的囝兒，攏受專門以上的教育，所以現時四个令嬡攏佇東京。長女Siok-cheng佇女醫館，次女Siok-loân佇女子齒科醫館。猶兩--个，佇高女在學中。
毋若對佇囝兒是良母，又閣對佇丈夫是賢妻。佇家庭全部是家己料理設法。佇家庭常常是做丈夫的避難所，安息所，佮做社會生存競爭的安全地帶。所以通講，治家教囝，服從丈夫，無失落賢妻良母的本質。對這幾項總合起來，佇社會是做伯大尼的馬大。佇家庭教育是做馬利亞。佇家庭教育是若準孟母。佇宗教教育，宛然第4世紀教父Au-gū su-tin的老母Mô͘-ní-kah。篤信啊！先生娘！
最後求疼痛的天爸安慰伊的遺族。無久欲相見佇天。
在北美：劉振芳。