公館教會

Kong-koán Kàu-hoē

文獻資訊

項目	資料
作者	劉阿秀 Lâu A-siù
卷期	台灣教會公報/芥菜子
卷期	第595卷
日期	1934/10
頁數	29-30

白話字（原文數位化）

Kong-koán Kàu-hoē

1. 10, no. 595, pp. 29-30

Lâu A-siù

Tuì Chú-āu 1900 nî, chiū-sī Bêng-tī 33 nî 1 ge̍h kiàn-siat pún kàu-hoē. Tī Bêng-tī 32 nî chhun-thiⁿ, tī Kong-koán Hok-ki téng toē-hng, ū Siā Hōng-lông, Lîm ōng-heng, Lîm Sìn-heng, Chiam A-hián, Lîm Chiok-hōng, Tiuⁿ Tek-si̍t, la̍p Chok-khiân, Kang Thoân-lo̍k, Lô ùn-lâi, Lâu A-siù téng him-bō͘ tō-lí ê lâng, khì Biau-le̍k ê Chhân-liâu chng lé-pài. Ta̍k lé-pài ài khì lé-pài ê lâng tio̍h chá-khí sî 4 tiám chhut-hoat, kàu hit ē-po͘ 5 tiám chiah oē tńg kàu chhù. Hit-sî sī Chiong A-moē Sian-siⁿ tī Chhân-liâu choè Thoân-tō-su. āu-lâi him-bō͘ tō-lí ê lâng ná ke-thiⁿ, chèng sìn-tô͘ kak-ngō͘ tī Kong-koán chng tio̍h siat pài-tn̂g ê pit-iàu, chiū tāi-ke saⁿ hia̍p-gī toê-iân. Tī 1899 nî 10 ge̍h kan tio̍k-chhiú siat-hoat pài-tn̂g, kap pài-tn̂g lâi ê pī-phín, soà thok Chiong Thoân-tō tuì Kai Bo̍k-su pín-chhéng siat-kàu tī Kong-koán chng; tit-tio̍h Kai Bo̍k-su ê hó-ì ún-chún, soà phài Chiong A-moē Sian-siⁿ lai siat-hoat. Kàu 1900 nî 1 ge̍h pài-tn̂g kap mi̍h-kiāⁿ lóng oân-pī, chiū khui lé-pài. Hit-ji̍t ū Kai Bo̍k-su kap Koa Î-su Sian-siⁿ lâi, kap tī-chia ê sìn-tô͘ 100 goā lâng tâng-sim lé-pài, kèng-uì Siōng-tè. Kai Bo̍k-su soat-kàu kóng, 10 nî chêng goá beh khì chio̍h-iû-khòng khoàⁿ chio̍h-iû, tuì chia kè, hit-sî chia iáu-bē ū kàu-hoē, chèng-lâng kiò goá kóng âng-mô͘-hoan, âng-mô͘-hoan.

Kin-á-ji̍t ū pài-tn̂g, ū kàu-hoē tâng-sim kèng-pài to̍k-it chin Siōng-tè, goán chin hoaⁿ-hí, khui pài-tn̂g liáu-āu, phài Chiong A-moē Sian-siⁿ tī-chia choè thoân-tō.

1. Tuì 1900 nî, chiū-sī Bêng-tī 33 nî 1 ge̍h siat-li̍p kàu-hoē; Chiong A-moē choè thâu chi̍t-jīm ê Thoân-tō-su.

2. Le̍k-jīm ê Thoân-tō-su kap nî-piáu.

(1) Tuì Bêng-tī 33 nî 1 ge̍h kàu 4 nî 6 ge̍h Chiong A-moē chāi-jīm.

(2) Tuì Bêng-tī 40 nî 6 ge̍h kàu Tāi-chèng 3 nî 6 ge̍h Chiong Thian-ki chāi-jīm.

(3) Tuì Tāi-chèng 3 nî 6 ge̍h kàu 8 nî 4 ge̍h Siā Chhun-muî chāi-jīm.

(4) Tuì Tāi-chèng 8 nî 4 ge̍h kàu 11 nî 3 ge̍h Tân Pit chāi-jīm.

(5) Tuì Tāi-chèng 11 nî 4 ge̍h kàu hiān-kim Lâu A-siù chāi-jīm.

1. Khí-thâu siat-kàu bô loā-kú, ū nn̄g ê thó͘-huí-thâu lâi kui-sūn chèng-hú, chiū-sī Lâu Chìn-hoat, kap Lâu A-hái in nn̄g lâng choè thâu hoán-tuì Ki-tok-kàu, siat kè-bô͘ pek-hāi kàu-hoē, in ê sim-chì ài koáⁿ-chhut chit ê kàu, lī-khui chit ê toē-hng. Ū chi̍t àm, nn̄g lâng kia̍h-chhèng bih tī pài-tn̂g āu ê thang-á kha, beh tng-tán Chiong Thoân-tō i nā chhut-lâi, chiū beh khui chhèng phah-sí i; kai-chài Chiong Thoân-tō hit àm lóng bô chhut-khì, só͘-í bián tit siū hāi. āu-lâi bô loā-kú Chèng-hú chai nn̄g ê thó͘-huí-thâu m̄-sī si̍t-chāi kui-sūn ê sim, chiū ín-iú chia̍h-chiú, kàu chiú-chuì ê sî chiū ēng soh-á pa̍k in, ah-sàng kàu Ku-soaⁿ khoe-pà ēng chhèng kā i phah sí, kàu-hoē ê hāi-thâng; í-āu kàu-hoē lóng tit-tio̍h pêng-an.

2. Pún kàu-hoē ê sìn-chiá: Siū Soé-lé--ê, tuì chho͘ siat-kàu kàu taⁿ, toā-lâng 86 lâng, siáu-jî 88 lâng; kiōng 174 lâng. Hiān-sî ê sìn-tô͘ sò͘, siū Soé-lé ê toā-lâng 58, siáu-jî 49, kiû-tō-chiá 35; kiōng 142 lâng.

3. Tuì siat-kàu í-lâi le̍k-jīm ê Tióng-Chip: Chiū-sī Lîm ōng-heng, Siā Hōng-lông, Chiam A-hián, Kang Thoân-lo̍k, Kán A-seng, Siā Chhun-muî, Tân Pit, Lô A-hô, Liāu Khiam-tiong, Chiam Kiàn-liông. Hiān-jīm Tiúⁿ-ló: Lô A-liông; Luî--sī A-bún. Hiān-jīm Chip-sū: Lô A-hô, Liāu Khiam-tiong; Chaim[sic.] Kiàn-liông.

4. Pún kàu-hoē ê kàu-sè: Tī pún nî chiaⁿ-ge̍h tit-tio̍h Tiong-hoē jīm-khó, seng-keh choè Tông-hoē. Pún kàu-hoē ê ki-pún-kim Y3140.00, chiah ê chîⁿ tuì 1905 nî, chiū ū chek-li̍p 100 khòng kho͘. Kàu Tāi-chèng 11 nî (1922) ê sî, chiū ū chûn-kim Y547.93, hit-sî kàu-hoē ū kak-ngō͘, nā ài to̍k-li̍p tek-khak tio̍h ū ki-pún-kim, chiū koh bō͘-chi̍p 400 goā kho͘, kàu hit nî-bé ū chûn-kim Y985.53. Hit-sî Lâu Tiong-kian Bo̍k-su choē-choē nî choè goán ê gī-tiúⁿ, i put-chí tì-ì chit chân-sū, í-āu nî-nî ū ka-ji̍p kim, kap só͘ siu ê lī-sek kim, kàu pún-nî chiū ū Y3140.00. Tī kin-nî kàu-hoē tâng-sim ài tok-li̍p[sic.], Sió-hoē chiū koat-gī ta̍k nî só͘ siu ê lī-sek beh the̍h chhut Y300, choè to̍k-li̍p ê keng-huì, soà phài lâng hiòng Tiong-hoē pín-chhéng ài to̍k-li̍p chhiáⁿ bo̍k-su. Ū tit-tio̍h Tiong-hoē ún-chún, chiū tī 1934 nî 4 ge̍h 24 ji̍t téng-po͘ 10 tiám, khui Te̍k-hoē tī Pún kàu-hoē Lé-pài-tn̂g; siat-li̍p Lâu A-siù Kàu-su choè pún Tông-hoē ê Bo̍k-su.

(Lâu A-siù kì)

漢羅（Ùi原文改寫）

公館教會

1. 10，no. 595，pp. 29-30

劉阿秀

對主後1900年，就是明治33年1月建設本教會。佇明治32年春天，佇公館Hok-ki等地方，有謝Hōng-lông，林旺興，林信興，詹阿顯，林祝奉，張德實，葉Chok-khiân，江傳鹿，羅ùn-lâi，劉阿秀等欣慕道理的人，去苗栗的田寮庄禮拜。逐禮拜愛去禮拜的人著早起時4點出發，到彼下晡5點才會轉到厝。彼時是將A-moē先生佇田寮做傳道師。後來欣慕道理的人那加添，眾信徒覺悟佇公館庄著設拜堂的必要，就大家相協議題捐。佇1899年10月間著手設法拜堂，佮拜堂來的備品，紲託將傳道對偕牧師稟請設教佇公館庄；得著偕牧師的好意允准，紲派將A-moē先生來設法。到1900年1月拜堂佮物件攏完備，就開禮拜。彼日有偕牧師佮柯維思先生來，佮佇遮的信徒100外人同心禮拜，敬畏上帝。偕牧師說教講，10年前我欲去石油礦看石油，對遮過，彼時遮猶未有教會，眾人叫我講紅毛番，紅毛番。

今仔日有拜堂，有教會同心敬拜獨一真上帝，阮真歡喜，開拜堂了後，派將A-moē先生佇遮做傳道。

1. 對1900年，就是明治33年1月設立教會；將A-moē做頭一任的傳道師。

2. 歷任的傳道師佮年表。

(1)對明治33年1月到4年6月章A-moē在任。

(2)對明治40年6月到大正3年6月章Thian-ki在任。

(3)對大正3年6月到8年4月謝春梅在任。

(4)對大正8年4月到11年3月陳筆在任。

(5)對大正11年4月到現今劉阿秀在任。

1. 起頭設教無偌久，有兩个土匪頭來歸順政府，就是劉進發，佮劉阿海in兩人做頭反對基督教，設計謀迫害教會，in的心志愛趕出這个教，離開這个地方。有一暗，兩人攑銃覕佇拜堂後的窗仔跤，欲當等將傳道伊若出來，就欲開銃拍死伊；佳哉將傳道彼暗攏無出去，所以免得受害。後來無偌久政府知兩个土匪頭毋是實在歸順的心，就引誘食酒，到酒醉的時就用索仔縛in，押送到龜山溪壩用銃共伊拍死，教會的害蟲；以後教會攏得著平安。

2. 本教會的信者：受洗禮--的，對初設教到今，大人86人，小兒88人；共174人。現時的信徒數，受洗禮的大人58，小兒49，求道者35；共142人。

3. 對設教以來歷任的長執：就是林旺興，謝Hōng-lông，詹阿顯，江傳鹿，簡阿生，謝春梅，陳筆，羅阿和，廖謙中，詹Kiàn-liông。長老：羅阿龍；雷--氏A-bún。現任執事：，廖謙中；詹建龍。

4. 本教會的教勢：佇本年正月得著中會認可，升格做堂會。本教會的基本金Y3140.00，遮的錢對1905年，就有責立100空箍。到大正11年(1922)的時，就有存金Y547.93，彼時教會有覺悟，若愛獨立的確著有基本金，就閣募集400外箍，到彼年尾有存金Y985.53。彼時劉中堅牧師濟濟年做阮的議長，伊不止致意這層事，以後年年有加入金，佮所收的利息金，到本年就有Y3140.00。佇今年教會同心愛獨立，小會就決議逐年所收的利息欲提出Y300，做獨立的經費，紲派人向中會稟請愛獨立請牧師。有得著中會允准，就佇1934年4月24日頂晡10點，開特會佇本教會禮拜堂；設立劉阿秀教師做本同會的牧師。

(劉阿秀記)