舊城的神跡
Kū-siâⁿ ê Sîn-jiah
文獻資訊
| 項目 | 資料 |
|---|---|
| 作者 | 林金柱 Lîm Kim-thiāu |
| 卷期 | 台灣教會公報 |
| 卷期 | 第594卷 |
| 日期 | 1934/9 |
| 頁數 | 16-17 |
白話字（原文數位化）
Kū-siâⁿ ê Sîn-jiah
(Lîm Kim-thiāu)
- 9, no. 594, pp. 16-17
Tī bûn-hoà ê ke-chhī ēng lí-lūn thang chèng-bêng chin-lí, tī lông-chhoan nā m̄-sī ēng si̍t-giām, chiū oh-tit ín-chhoā lâng bat Kiù-chú. ēng sîn-jiah thang chèng-bêng oa̍h ê Chú, teh kap lán chò kang (Khó 16:20). Ū sìn ê kî-tó beh kiù phoà-pēⁿ ê lâng (Ngá-kok 5:15). Chit kù sī goán ê phiau-gú, iā kó-jiân ū án-ni thé-giām. Taⁿ chiong si̍t-sū pâi-lia̍t kuí-nā hāng:-
-
Hoān kuí, kuí thè. La̍k nî chêng goá tú á kàu Kū-siâⁿ bô loā-kú, ū Hōng-soaⁿ ê chí-moē Chio̍h-chím, chhoā i ê pêng-iú Hùn-só chi̍t ke lâi lé-pài, in-uī i ê tiōng-hu Chhî Hùn hiaⁿ hoān-kuí kuí-nā nî, chia̍h io̍h, mn̄g pu̍t, hē hû, chîⁿ-gîn phoà-huì chin-chē bô kiàn kong-hāu. Lán kàu-hoē hoē-iú chio thoân-thé khì in hia chò ka-têng lé-pài, tâng-sim kî-tó kuí-nā pái. Bô loā-kú kuí thè, kiâⁿ-ta̍h pêng-siông. Hiān-sî choân-ke sìn Chú thang khó-chhú.
-
Âng-î hoán-hoé. Khok-só pún-jiân sī pún-chng chhut-miâ ê âng-î. Pō͘-sò͘ kài chē, thàn-chîⁿ bē chió, khó-sioh choân-ke tài pēⁿ, thàn chîⁿ bô hù chia̍h io̍h. Ū-ê he-ku tām-tū, ū-ê tó-chhn̂g kha̍h-chhio̍h, ū-ê n̂g-sng chéng-hàm. Gō͘ nî chêng choân-ke toàn-jiân hoán-hoé, tit-tio̍h Siōng-tè thiaⁿ i ê khún-kiû. Taⁿ sī chiâⁿ chò chi̍t ke chin ióng-kiāⁿ ê ka-têng. Moá bīn chhun-hong, put-sî chhiò gī-gī, sì-kè pò-iông chin-lí, sìn-gióng jia̍t-jia̍t gâu ín-chhoā lâng.
-
Pēⁿ tāng suî hó. a) Sì nî chêng Tè Thian-hí Chip-sū ê hū-jîn-lâng phoà-pēⁿ nn̄g lé-pài, chin siong-tiōng, chiàu khoàⁿ bô ǹg-bāng. Kha ti̍t chhiú ti̍t, gê-chô ngē khok-khok, ba̍k-chiu kheh siân-siân, beh chia̍h io̍h tio̍h ēng gō͘-siang tī kiāu chiah ē khui. Chhe lâng lâi chhiáⁿ goá kap N̂g ûn Sian-siⁿ khì kap in kî-tó, suî-sî ē khí-lâi chē, hit ē-hng ū chia̍h nn̄g oáⁿ han-chû-kho͘ thng, keh lé-pài ióng-ióng tī pài-tn̂g chò kan-chèng. Tuì án-ni i ê chhin-lâng tiong, ū lâng chek-sî hoán-hoé lâi sìn Chú; hoē-iú ê sìn-gióng ná kian-kò͘, ná bêng Siōng Chú ê toā koân-lêng.
b) Kū-nî Tek-thâu só tú-tio̍h hek-suí-jia̍t, pēⁿ-sè guî-kip, i-seng toàn bē hó. Kó-jiân hit mê-hng me̍h sit, hūn--khì. Kui ke lâng kuī-lo̍h kî-tó kóng, “Chú ah, kiù lè!” Chhù-piⁿ ê sè-sio̍k lâng khoàⁿ-kìⁿ in ê jia̍t-sêng ê ai-kiû, iā kap in tâng-sim, kuí-nā cha̍p lâng lóng kuī-lo̍h khì saⁿ-kap kiû. Kó-jiân koh hoê-hûn, liâm-piⁿ ióng-kiāⁿ. Hiān-sî choân-ke sìn Chú, m̄-káⁿ bē kì-tit Chú ê thiàⁿ. (Boē-oân)
漢羅（Ùi原文改寫）
舊城的神跡
(林金柱)
1934.9，no.594，pp.16-17
佇文化的街市用理論通證明真理，佇農村若毋是用實驗，就oh得引chhoā人捌救主。用神跡通證明活的主，teh佮咱做工(可 16：20)。有信的祈禱欲救破病的人(雅各5：15)。這句是阮的標語，也果然有按呢體驗。Taⁿ將實事排列幾若項：-
1.犯鬼，鬼退。六年前我拄á到舊城無偌久，有鳳山的姊妹石嬸，chhoā伊的朋友Hùn嫂一家來禮拜，因為伊的丈夫徐Hùn兄犯鬼幾若年，食藥，問佛，下符，錢銀破費真濟無見功效。咱教會會友招團體去in遐做家庭禮拜，同心祈禱幾若擺。無偌久鬼退，行踏平常。現時全家信主通可取。
2.紅姨反悔。Khok嫂本然是本庄出名的紅姨。步數蓋濟，趁錢袂少，可惜全家帶病，趁錢無赴食藥。有的 he-ku tām-tū，有的倒床kha̍h-chhio̍h，有的黃酸chéng-hàm。五年前全家斷然反悔，得著上帝聽伊的懇求。Taⁿ是成做一家真勇健的家庭。滿面春風，不時笑義義，四界報揚真理，信仰熱熱gâu引chhoā人。
3.病重隨好。A) 四年前綴天喜執事的婦人人破病兩禮拜，真傷重，照看無向望。跤直手直，牙槽硬khok-khok，目睭kheh siân-siân，欲食藥著用五雙箸kiāu才會開。差人來請我佮黃ûn先生去佮in祈禱，隨時會起來坐，彼ē昏有食兩碗蕃薯箍湯，閣禮拜勇勇佇拜堂做干證。對按呢伊的親人中，有人即時反悔來信主；會友的信仰ná堅固，ná明上主的大權能。
b)舊年竹頭嫂拄著hek-suí熱，病勢危急，醫生斷袂好。果然彼暝昏脈失，昏--去。規家人跪落祈禱講，「主ah，救lè！」厝邊的世俗人看見in 的熱忱的哀求，也佮in同心，幾若十人攏跪落去相佮求。果然閣回魂，連鞭勇健。現時全家信主，毋敢袂記得主的疼。(袂完)