真便宜
Chin Pan-gî
文獻資訊
| 項目 | 資料 |
|---|---|
| 作者 | 郭朝成 Koeh Tiâu-sêng |
| 卷期 | 台灣教會公報 |
| 卷期 | 第594卷 |
| 日期 | 1934/9 |
| 頁數 | 10 |
白話字（原文數位化）
Chin Pan-gî
(Koeh Tiâu-sêng)
- 9, no. 594, pp. 10
Sio̍k-gú kóng, “Hó-hoè bô pan-gî, pan-gî bô hó-hoè.” Bô tek-khak, a-phiàn siōng-kuì, sī hāi-sí lâng ê to̍k-io̍h. Chuí kài-sio̍k, sī iúⁿ-chhī oa̍h-miā ê ím-liāu. Sèng-keng siōng kài-sio̍k, sī poê-iúⁿ tō-tek, hō͘ lâng lêng-hûn tit-kàu ê oa̍h-miā chheh.
Tâi-tiong chiū, ū chhòng-siat kàu-hoà liân-bêng, lāi-iông is7 bûn-hoà, su-siúⁿ hiòng-siōng, tû bê-sìn, kái-liông song-hí-sū. Tuì kè-chhoā, tì-kàu pîn-kiông ê lâng, sī chin-chē. Só͘-í Chháu-tun Kàu-hoē liân-bêng kā chí-tēng, koāⁿ-tiāⁿ ê piáⁿ tēng 12 kho͘, phèng-kim tēng 120 kho͘, kî-û iáu ū só͘-huì, pí chêng chám-jiân séng. Ū cha-bô͘-kiáⁿ thang kè--ê kóng, koh hiah pan-gî; ū hāu-seⁿ beh chhoā--ê kóng, sio̍k chin hó. Kî-si̍t si̍t-hêng chun-siú ê lâng, m̄-chai ū loā-chē?
Ki-tok-tô͘ sī chò siā-hoē ê chí-tō-chiá, kong-ek ê sū bô m̄ chìn-chêng lâi chò. Lūn hí-sū ê kái-liông, ū-sî soà toè lâng ê āu-bīn, kiám m̄-sī kiàn-siàu mah?
Pè-hoē jīm-chit-chiá, ū kám-kak-tio̍h kè-chhoā kái-liông ê pit-iàu. Só͘-í chêng-pang Jīm-chit-hoē ū koat-tēng phèng-kim 100 kho͘, kî-û it-chhè lé-mi̍h 100 kho͘ (bô piáⁿ). Hoè-tû tńg-chhù ê bí-ko-thô, sī ài hō͘ hí-sū chin kán-tan. Che oân-choân uī-tio̍h thiàⁿ hoē-iú, thiàⁿ kiáⁿ-sài, thiàⁿ cha-bó͘-kiáⁿ. Chóng-sī chit hō hoat-tō͘, hoān-uî kan-ta tī pè-hoē nā-tiāⁿ, put-kò pa̍t kàu-hoē nā beh kiōng-hêng, tông-chêng, goán sī chin hoaⁿ-hí.
Kīn-lâi ū pa̍t kàu-hoē ê sìn-chiá lâi pè-hoē kiû-hun, ài chhái-iōng goán só͘ tēng ê hoat-tō͘. Kî-si̍t goán chia ê ì-sù, nā ū sàn-chhiah ê pē-bó, ū khiàm-ēng chîⁿ, chiong phèng-kim kā siu--khí-lâi, bô siáⁿ chng-liâm, lâm-ka m̄-thang hiâm bô mi̍h. Hó-gia̍h ê pē-bó, beh kah káng-chheng kho͘ hō͘ i ê cha-bó͘-kiáⁿ, Jīm-chit-hoē iā bô pān i sī m̄-tio̍h. Goán chia ê hoē-iú ū lí-kái, bô kóng pa̍t kàu-hoē ê hoē-iú lâi kiû-hun, kè-sò͘ beh khah koân.
Chóng-is7 goán chia ê hoē-iú, kuí-nā ê khì pa̍t kàu-hoē kiû hun, kiat-kio̍k bē hó-sè, m̄-chai sī kiaⁿ-liáu beh sàng nn̄g pah, it-pau-chhang, hiâm siuⁿ chió á m̄-sī?
Ū lâng teh ki-chhì kóng, Chháu-tan Kàu-hoē ê cha-bó͘-gín-ná teh piàⁿ pan-gî. Che chin gō͘-kái, pa̍t kàu-hoē ê lú-chú, kè-sò͘ nā ài khah koân, sī iû in ê tō͘-ha̍p, pè Jīm-chit-hoē to bô koân thang kan-sia̍p. Lióng-ka nā hoaⁿ-hí chiū hó, suî-chāi in beh ài loā-chē, goán chia ê hoē-iú, tuì-thāi chú-lú sī chin kong-pêⁿ, lú-jî to-sò͘ ū ji̍p Kong-ha̍k-hāu, iā bô thiaⁿ-tio̍h pháiⁿ ê hong-phêng, hó koh pan-gî chiàⁿ ū kè-ta̍t, m̄-sī pháiⁿ hoè, chiàⁿ teh piàⁿ pan-gî.
Chháu-tun ê hoē-iú, í-chêng tuì kè-chhoā, sī chin káⁿ khai, bó͘ lâng chhoā sim-pū, iù-toh kuí-cha̍p tè, bó͘ lâng chio kiáⁿ-sài kuí-cha̍p kǹg, ga̍k-tuī, toā-kó͘ nāu, pa̍t-im chhoe kuí-nā tīn, hiⁿ-hiⁿ haⁿ-haⁿ, lin-lin lōng-lōng, lāu-jia̍t kún-kún. Kiat-kio̍k ū siáⁿ lō͘-ēng, lô-bîn siong-châi nā-tiāⁿ. Taⁿ í-keng ū kak-ngō͘, hoān-sū ài siu-sok, ài kán-tan, m̄-ài lōng-huì, án-ni kiám m̄-sī chin hó mah?
漢羅（Ùi原文改寫）
真便宜
(郭朝成)
1934.9，no.594，pp.10
俗語講，「好貨無便宜，便宜無好貨。」無的確，鴉片上貴，是害死人的毒藥。水蓋俗，是養飼活命的飲料。聖經上蓋俗，是培養道德，予人靈魂得教的活命冊。
台中州，有創設教化聯盟，內容是文化，思想向上，除迷信，改良喪喜事。對嫁娶，致到貧窮的人，是真濟。所以草屯教會聯盟共指定，捾定的餅訂12箍，聘金訂120箍，其餘猶有所費，比前嶄然省。有查某囝通嫁--的講，閣遐便宜；有後生欲娶--的講，俗真好。其實實行遵守的人，毋知有偌濟？
基督徒是做社會的指導者，公益的事無毋進前來做。論喜事的改良，有時紲綴人的後面，敢毋是見笑mah？
敝會任職者，有感覺著嫁娶改良的必要。所以前班任職會有決定聘金100箍，其餘一切禮物100箍(無餅)。廢除轉厝的米糕桃，是愛予喜事真簡單。這完全為著疼會友，疼囝婿，疼查某囝。總是這號法度，範圍干單佇敝會若定，不過別教會若欲共行，同情，阮是真歡喜。
近來有別教會的信者來敝會求婚，愛採用阮所定的法度。其實阮遮的意思，若有散赤的父母，有欠用錢，將聘金共收起來，無啥妝奩，男家毋通嫌無物。好額的父母，欲佮講千箍予伊的查某囝，任職會也無辦伊是毋著。阮遮的會友有理解，無講別教會的會友來求婚，價數欲較懸。
總是阮遮的會友，幾若个去別教會求婚，結局袂好勢，毋知是驚了欲送兩百，一包蔥，嫌傷少抑毋是？
有人teh譏刺講，草屯教會的查某囡仔teh拚便宜。這真誤解，別教會的女子，價數若愛較懸，是由in的都合，敝任職會都無權通干涉。兩家若歡喜就好，隨在in欲愛偌濟，阮遮的會友，對待子女是真公平，女兒多數有入公學校，也無聽著歹的風評，好閣便宜正有價值，毋是歹貨，正teh拚便宜。
草屯的會友，以前對嫁娶，是真敢開，某人娶新婦，幼桌幾十塊，某人招囝婿幾十卷，樂隊，大鼓鬧，八音吹幾若陣，hiⁿ-hiⁿ haⁿ-haⁿ，lin-lin lōng-lōng，鬧熱滾滾。結局有啥路用，勞民傷財若定。今已經有覺悟，凡事愛收束，愛簡單，毋愛浪費，按呢敢毋是真好mah？