林仔邊教會
Nâ-á-piⁿ Kàu-hoē
文獻資訊
| 項目 | 資料 |
|---|---|
| 作者 | 陳思聰 Tân Su-chhong |
| 卷期 | 台灣教會公報 |
| 卷期 | 第594卷 |
| 日期 | 1934/9 |
| 頁數 | 16 |
白話字（原文數位化）
Nâ-á-piⁿ Kàu-hoē
- 9, no. 594, pp. 16
Chit ê kàu-hoē pún sio̍k Hōng-soaⁿ chò chi-hoē; tī kū-nî kui Tiong-hoē ti̍t-hat. Soà chún lēng-goā siat miâ-phō͘, kì-sū-chheh. Taⁿ ū chhong hó-sè. Hiān-sî ji̍p kàu-hoē ê hoē-oân 46 miâ, siáu-jî niá sé-lé ê 27 miâ. Choân kàu-hoē ê chóng-sò͘ káⁿ ū pah-goā miâ. Tī 6 goe̍h 10 ji̍t, ū kú-hêng tián-lé. Ngó͘-chêng kiâⁿ sé-lé hō͘ 8 ê toā-lâng, 7 ê siáu-jî; ngó͘-hō͘ ū siat Boán-chhan, poê-chhan-chiá lâm-lú 32 miâ. Hiàn-kim 4 kho͘, ài chò Soan-tō-hoē ê lō͘-ēng. iā ū siat N̂g lú-hok Sian-seⁿ kap Chhoà iāu-chong Sian-seⁿ jī-uī chò Tiúⁿ-ló. Hiān-sî ū 4 ê tiúⁿ-ló, nn̄g ê chip-sū. Chit lé-pài lâi chhut-se̍k ê lâng-gia̍h, ngó͘-chêng 82 miâ, ngó͘-hō͘ 100 miâ.
Chit ê kàu-hoē teh chū-chi̍p lé-pài, hiān-sî siuⁿ e̍h; koh joa̍h-thiⁿ ê chin joa̍h, in-uī án-ni, ū teh kè-e̍k beh khí sin ê pài-tn̂g, in ka-tī bō͘-chi̍p chiâⁿ-chheng kho͘, bô kú beh khí. Chiàu khoàⁿ hoē-iú oa̍h-tāng, chiong-lâi sī ū hō͘-bōng. (Tân Su-chhong pò).
漢羅（Ùi原文改寫）
林仔邊教會
1934.9，no.594，pp.16
這个教會本屬鳳山做支會；佇舊年歸中會直轄。紲準另外設名簿，記事冊。今有創好勢。現時入教會的會員46名，小兒領洗禮的27名。全教會的總數敢有百外名。佇6月10日，有舉行典禮。午前行洗禮予8个大人，7个小兒；午後有設晚餐，陪餐者男女32名。獻金4箍，愛做宣道會的路用。也有設黃lú-hok先生佮蔡iāu-chong先生二位做長老。現時有4个長老，兩个執事。這禮拜來出席的人額，午前82名，午後100名。
這个教會teh聚集禮拜，現時傷阨；閣熱天的真熱，因為按呢，有teh計劃欲起新的拜堂，in家己募集成千箍，無久欲起。照看會友活動，將來是有厚望。(陳思聰報)。