教會發展策
Kàu-hoē Hoat-tián Chhek
文獻資訊
| 項目 | 資料 |
|---|---|
| 作者 | 主筆 Chú-pit |
| 卷期 | 台灣教會公報 |
| 卷期 | 第594卷 |
| 日期 | 1934/9 |
| 頁數 | 1-2 |
白話字（原文數位化）
Kàu-hoē Hoat-tián Chhek
(Chú-pit)
- 9, no. 594, pp. 1-2
Joa̍h ê Hē-thiⁿ í-keng koè-khì, chhiu-chhìn koh hó oa̍h-tāng ê chhiu-thiⁿ saⁿ-soà lâi. Chheng-liân ê ha̍k-seng, lóng koh tò-tńg-khì in ê ha̍k-hāu teh bián-kióng. Sū, lông, kong, siong, iā sūn chit ê hó ê ki-hoē, chéng-tùn sin tīn-iông, teh chīn in ê pún-hūn. Lia̍t-uī sìn-tô͘ ah! lán iā m̄-thang sit-lo̍h chit ê pó-poè ê kong-im, in-uī jîn-seng sī bô kú, iū-koh chiok Lâm-pō͘ Thoân-kàu 70 chiu-nî ê kî-ji̍t ná pek, lán suî-lâng tio̍h ka-poē uī-tio̍h kàu-hoē lâi phah-piàⁿ.
Chū-jiân lán chin him-bō͘ kàu-hoē tit-tio̍h toā hoat-tián. Taⁿ hit ê hoat-tián ê hong-chhek tī tó-loh? Chí-ū 2 tiâu lō͘: (1) Kàu-hoē tio̍h ū chi̍t chéng ke̍k toā ê khi̍p-ín-la̍t. Ná chhin-chhiūⁿ khip-chio̍h, ē khip-ín lâng, hō͘ lâng ka-tī ē lâi kui-oá Ki-tok.
(2) Sin tiau-liû tiong, teh phû-tōng ê jîn-luī, kì-jiân khip-ín bē-tit lâi, chiū lán pún-sin tio̍h chhiong-ji̍p chiàn-tīn, hó-táⁿ chìn-chêng, phoe-sí khì kiù in, hō͘ in lâi tâu-hâng tī Ki-tok.
Chhì-mn̄g, thiàⁿ Chú Iâ-so͘ ê Ki-tok-tô͘ ah! Lí sī kiâⁿ tē-it tiâu lō͘, á-sī kiâⁿ tē-jī tiâu lō͘? Á-sī siāng-sî teh kiâⁿ chit nn̄g-tiâu lō͘? Goá siuⁿ[sic.] nn̄g-tiâu lō͘ pun-khui lâi kiâⁿ, che sī phian-phó bô kiān-choân ê pān-hoat. Tī sū-si̍t-siōng, iā sī bē thang án-ni-tit. Chiàu gû-kiàn teh siūⁿ, iû-goân tio̍h siāng-sî chhái-chhú chit nn̄g ê hong-hoat, pêⁿ-pêⁿ chìn-chêng khì.
Lán nā ū khip-ín-la̍t, khiok sī chin hó; chóng-sī iā bē thang kan-ta chē tī ke-lāi, á-sī kò͘-siú tī pài-tn̂g-lāi, nā sin-si chi̍t-poaⁿ. Iû-goân tio̍h ài khí-lâi kiâⁿ, phah-ji̍p siā-hoē chiah ē ēng-tit. M̄-kú iā tio̍h ū khip-ín-la̍t, chiah ē thang hō͘ in hoaⁿ-hí hâng-ho̍k.
Tī Tiong-hoa-bîn-kok Ki-tok-kàu 5 nî ê toā ūn-tōng. In ê phiau-gú chiū-sī: “Kiû Chú hùn-heng kàu-hoē, tāi-seng hùn-heng gaó.” In-uī hùn-heng goá ka-tī, chiah ū khip-ín-la̍t thang khip-ín lâng. Hùn-heng goá pún-sin, chiah ū khip-ín-la̍t thang khui chi̍t tiâu sin ê lō͘, toè Ki-tok lâu jia̍t-hiat ê kha-pō͘ khì kiù jîn-luī. Iâ-so͘ kóng, “Hō͘ lâng khoàⁿ-kìⁿ lín ê hó só͘ kiâⁿ, lâi kui êng-kng hō͘ lín tī thiⁿ-nih ê Pē” (Thài 5:16).
Beh si̍t-hêng Hùn-heng lán ka-tī, choè kán-tan ū 3 hāng tio̍h chù-ì:-
1) Séng-chhat pún-sin: Goá ū chun-thàn Siōng-tè ê tō-lí bô? Goá ū thiàⁿ chèng-lâng bô? Goá tī siā-hoē ū kan-chèng Ki-tok bô? Tuì tī koè-khì, hiān-chāi, chiong-lâi goá ū chaiⁿ-iūⁿ the êng-kng Siōng-tè ê Sèng-miâ?
2) Siu-ióng pún-sin: Siu-ióng sī Ki-tok-tô͘ oa̍h-miā ê hân-loán-kè. Kan-ta séng-chhat, nā bô siu-ióng, che sī khiàm-khoeh oa̍h-miā ê khuì-la̍t. Tuì chá kàu taⁿ, hiah ê sian-ti, sian-kak-chiá, ē thang kan-chèng Ki-tok, chhián-bêng Hok-im, kiàn-siat uí-tāi ê sū-gia̍p ê, bô m̄-sī tuì lêng-siu chò chhut-hoat-tiám. Tio̍h cháiⁿ-iūⁿ siu-ióng? Chiū-sī tio̍h sî-sî tha̍k Sèng-keng kap kî-tó; koh tit-tio̍h Sèng Sîn ê chhiong-moá, chiuy7 bān-sū tek-khak ē toā sêng-chiū.
3) Hi-seng pún-sin: Ta̍k ji̍t séng-chhat, ta̍k sî siu-ióng sī chin hó; chóng-sī tio̍h thiàⁿ-sioh tông-pau bô kè-pó ê lêng-hûn. Pó-lô kóng, “In-uī goá uī-tio̍h goá ê hiaⁿ-tī, goá ê kut-jio̍k ê chì-chhin, chiū nā pún-sin siū chiù-chó͘ lī-khui Siōng-tè iā kam-goān” (Lô 9:3). Tio̍h oân-choân hiàn ka-tī hō͘ Chú ēng, thiaⁿ Chú ê chí-hui, ho̍k-chiông Chú ê chí-ì lâi chín-kiù chèng tông-pau. Bô-lūn kéng-gū cháiⁿ-iūⁿ, tio̍h hi-seng it-chhè, hi-seng pún-sin lâi chò soan-thoân Hok-im ê khì-khū.
Chhim-chhim ǹg-bāng lán chèng sìn-tô͘, kiōng-tông ló͘-le̍k, séng-chhat chū-kí, siu-ióng chū-kí, hi-seng chū-kí, lâi hō͘ Chú ê Kàu-hoē toā-toā heng-ōng; hō͘ Siōng-tè kok kín lîm-kok tī tē-chiuⁿ. Sim-só͘-goān.
漢羅（Ùi原文改寫）
教會發展策
(主筆)
- 9，no. 594，pp . 1-2
熱的夏天已經過去，秋凊閣好活動的秋天相續來。青年的學生，攏閣倒轉去in的學校teh勉強。士，農，工，商，也順這个好的機會，整頓新陣容，teh盡in的本份。列位信徒啊！咱也毋通失落這个寶貝的光陰，因為人生是無久，又閣祝南部傳教70週年的期日那逼，咱隨人著加倍為著教會來拍拚。
自然咱真欣慕教會得著大發展。今彼个發展的方策佇倒落？只有2條路：(1)教會著有一種極大的吸引力。那親像吸石，會吸引人，予人家己會來歸倚基督。
(2)新潮流中，teh浮動的人類，既然吸引袂得來，就咱本身著衝入戰陣，好膽進前，phoe死去救in，予in來投降佇基督。
試問，疼主耶穌的基督徒啊！你是行第一條路，抑是行第二條路？抑是siāng時teh行這兩條路？我想兩條路分開來行，這是偏頗無健全的辦法。佇事實上，也是袂通按呢得。照愚見teh想，猶原著相時採取這兩个方法，平平進前去。
咱若有吸引力，卻是真好；總是也袂通干焦坐佇家內，抑是顧守佇拜堂內，若身屍一般。猶原著愛起來行，拍入社會才會用得。毋久也著有吸引力，才會通予in歡喜降服。
佇中華民國基督教5年的大運動。In的標語就是：「求主奮興教會，代先奮興我。」因為奮興我家己，才有吸引力通吸引人。奮興我本身，才有吸引力通開一條新的路，綴基督流熱血的跤步去救人類。耶穌講，「予人看見恁的好所行，來歸榮光予恁佇天裡的父」(太5：16)。
欲實行奮興咱家己，做簡單有3項著注意：-
1)省察本身：我有遵趁上帝的道理無？我有疼眾人無？我佇社會有干證基督無？對佇過去，現在，將來我有怎樣teh榮光上帝的聖名？
2)修養本身：修養是基督徒活命的寒暖計。干焦省察，若無修養，這是欠缺活命的氣力。對早到今，遐的先知，先覺者，會通干證基督，闡明福音，建設偉大的事業的，無毋是對靈修做出發點。著怎樣修養？就是著時時讀聖經佮祈禱；閣得著聖神的充滿，就萬事的確會大成就。
3)犧牲本身：逐日省察，逐時修養是真好；總是著疼惜同胞無價寶的靈魂。保羅講，「因為我為著我的兄弟，我的骨肉的至親，就若本身受咒詛離開上帝也甘願」(羅 9：3)。著完全獻家己予主用，聽主的指揮，服從主的旨意來拯救眾同胞。無論境遇怎樣，著犧牲一切，犧牲本身來做宣傳福音的器具。
深深向望咱眾信徒，共同努力，省察自己，修養自己，犧牲自己，來予主的教會大大興旺；予上帝國緊臨國佇地上。心所願。