白話字文獻館

PE̍H-ŌE-JĪ BÛN-HIÀN KOÁN

Kám-sióng Cha̍p-lio̍k

文獻資訊

項目 資料
作者 周天來 Chiu Thian-lâi
卷期 台灣教會公報
卷期 第594卷
日期 1934/9
頁數 13-14

白話字（原文數位化）

III. Kám-sióng Cha̍p-lio̍k

(Chiu Thian-lâi)

  1. 9, no. 594, pp. 13-14

  2. Sìn-gióng m̄-sī kan-ta sêng-jīn, chiū-sī tio̍h niá-siū. Sèng-jīn sī tì-sek, niá-siū sī keng-giām. Tì-sek sī chiàu liû-thoân, bô oân-choân, bô kú-tn̂g; keng-giām sī to̍k-chhòng-tek, sī ū khak-si̍t ê chèng-kù, sī éng-kiú-tek. Chong-kàu-tek keng-giām sī khiam-pi lâi niá-siū, sī tuì téng-bīn ê khé-sī; sī hō͘ lân tit-tio̍h boán-chiok, tit-tio̍h kng-bêng, koh oē kian-kò͘ tì-sek; nā-sī kan-ta ū tì-sek, bô ū ti̍t-chiap ê keng-giām, oē tì-kàu chhia-tó sìn-gióng (Ngá-kok 2:19. Má-thài 7:21. Lô-má 8:9. I Lîm 12:3. II Lîm 12:9. Ka-lia̍p-thài 1:11, 12).

  3. Sìn-gióng seng-oa̍h m̄-sī chi̍t-lé-pài, chi̍t-pái á nn̄g pái, sī muí-ji̍t, sī sî-sî khek-khek kap Chú bô lī. Sìn-gióng seng-oa̍h sī kî-tó ê seng-oa̍h, sī tuì téng-bīn niá-siū khuì-la̍t, lâi ji̍t-ji̍t uī-tio̍h thian-kok hùn-tò͘ ê seng-oa̍h (Hān 15:4, 5. Thài 6:33. Hui 4:13). Sī choa̍t-tuì-tek ê sìn-nāi kap ho̍k-chiông ê seng-oa̍h (Khó 14:36).

  4. Ki-tok-tô͘ hoān-sū só͘ choè bô ài hō͘ lâng o-ló, hō͘ lâng kì-liām, bô phoe-phêng lâng, khoàⁿ-khin lâng, bô oàn-hūn lâng, bô ko͘-hū lâng, bô chiù-chó͘ lâng. Chiū-sī o-ló lâng, kì-liām lâng, khoàn-bián lâng, tuì-tiōng lâng (Hui 2:3), thiàⁿ lâng, ho̍k-sāi lâng, chiok-hok lâng. Lóng-chóng ê hó só͘ kiâⁿ sī tuì bat Siōng-tè ê thiàⁿ, kì-liām Chú ê un, tuì thiàⁿ Chú ê sim siⁿ-chhut . “Lín ài lâng cháiⁿ-iūⁿ khoán-thāi lín, lín ia̍h tio̍h án-ni khoán-thāi lâng.” (Thài 7:12).

  5. Kīn-tāi lí-sióng-tek, Ki-tok-kàu-tek ê lú-sèng, chiū-sī kng-bêng, hoaⁿ-hí, kèng-khiân, siú-kí (Lō͘-ka 1:46, 47; I Thê 2:9, 10). Un-jiû, khiam-sùn (I Pí-tek 3:3, 4; 5:5). Sèng-kiat kap sûn-ài ê hōng-sū (Lō͘-ka 8:2, 3; 23:55-24:1). Sim-koaⁿ ê suí, chiàⁿ-sī si̍t-chāi ê suí. Put-sî ū chhiò-iông, hoaⁿ-hí ê bīn-sek; kam-goān pang-chān pa̍t-lâng, thé-thiap lâng, lîn-bín lâng, hó khoán-thāi lâng, chiū oē hián-chhut chin-si̍t ê suí chhut-lâi. “Hó jîn-châi sī hu-ké--ê, suí iā-sī khang-khang; To̍k-to̍k kèng-uì Iâ-hô-hoa ê hū-jîn-lâng beh tit-tio̍h o-ló” (Chim-giân 31:30).

  6. Hó-gia̍h-lâng sī chiàu Siōng-tè ê in lâi tit-tio̍h hó-gia̍h, chiū tio̍h ū kám-siā, ū chiat-chè, bô chhiâ-chhí hòng-sù, gâu lī-iōng kim-chîⁿ, chhoē ki-hoē lâi chín-chè, lī-ek lâng, chek-chū châi-pó tī thiⁿ-ni̍h, chiah bô ko͘-hū Siōng-tê ê in (Thài 6:19, 20; I Thê 6:17-19).

  7. Sòng-hiong lâng bo̍h-tit thó͘-khuì, in-uī thiⁿ-ni̍h ū chhù-the̍h, sī n̂g-kim ê tiān-tn̂g, chiū-sī thiàⁿ bô hān ê Chú, uī-tio̍h sin I ê lâng só͘ pī-pān--ê (Hān 14:1-3). “Hó-gia̍h iā ū khoà-lū; m̄-ta̍t-tio̍h sòng-hiong lâi kèng-uì Iâ-hô-hoa” (Chim-giân 15:16). oá-khò Iâ-hô-hoa ê lâng ū hok-khì” (Chim-giân 16:20). (Chham-khoàⁿ Si-phian 37:25; Khó 10:29, 30).

  8. Bô-lūn hó-gia̍h, sòng-hiong, bô lūn sím-mi̍h kéng-gū, sím-mi̍h tē-uī; bô him-siān lâng, bô ài lâng him-siān, chóng-sī bô oàn-hūn lâng, bô khoàⁿ-khin lâng, hoān-sū kám-siā, hoān-sū thun-lún, hoān-sū sìn-khò Siōng-tè chiah ū pêng-an (Hui 4:4-7; I Thiap 5:16-18). Kok-lâng chiàu Siōng-tè só͘ siúⁿ-sù in-huī ê hūn-liōng, ēng choè siān ê hoat-tō͘, chīn só͘ ū ê ki-hoē, lâi kui êng-kng Siōng-tè, lâi lī-ek lâng, ho̍k-sāi lâng; che chiàⁿ-sī lí-sióng Ki-tok-tô͘ (Lô-má 12:1, 2).

“Goá ê sìⁿ-miā hiàn hō͘ Lí,

Choè Lí lō͘-ēng kàu chi̍t-sì;

Sî-khek mî-ji̍t hiàn hō͘ Chú,

Kui êng-kng Lí bān-nî kú.”

“Goá ê thiàⁿ kiû Chú chān,

Thiàⁿ Lí iâⁿ-koè thong sè-kan;

Taⁿ goá li̍p-chì hiàn ka-kī,

Eńg-éng choan-choan kui hō͘ Lí.”

漢羅（Ùi原文改寫）

III. 感想雜錄

(周天來)

1934.9，no.594，pp.13-14

  1. 信仰毋是干焦承認，就是著領受。承認是智識，領受是經驗。智識是照流傳，無完全，無久長；經驗是獨創的，是有確實的證據，是永久的。宗教的經驗是謙卑來領受，是對頂面的啟示；是予人得著滿足，得著光明，閣話堅固智識；若是干焦有智識，無有直接的經驗，話致到捙倒信仰(雅各2：19。馬太7：21。羅馬8：9。I林 12：3。II林 12：9。加拉太1：11，12)。

  2. 信仰生活毋是一禮拜，一擺抑兩擺，是每日，是時時刻刻佮主無離。信仰生活是祈禱的生活，是對頂面領受氣力，來日日為著天國奮鬥的生活(翰 15：4，5。太6：33。腓 4：13)。是絕對的的信賴佮服從的生活(可 14：36)。

  3. 基督徒凡事所做無愛予人呵咾，予人紀念，無批評人，看輕人，無怨恨人，無辜負人，無咒詛人。就是呵咾人，紀念人，勸勉人，對重人(腓 2：3)，疼人，服事人，祝福人。攏總的好所行是對捌上帝的疼，紀念主的恩，對疼主的心生出。「恁愛人怎樣款待恁，恁亦著按呢款待人。」(太7：12)。

  4. 近代理想的，基督教的的女性，就是光明，歡喜，敬虔，守己(路加1：46，47；I 提 2：9，10)。溫柔，謙遜(彼得前書3：3，4；5：5)。聖潔佮純愛的奉仕(路加8：2，3；23：55-24：1)。心肝的媠，正是實在的媠。不時有笑容，歡喜的面色；甘願幫贊別人，體貼人，憐憫人，好款待人，就會顯出真實的媠出來。「好人才是虛假--的，媠也是空空；獨獨敬畏耶和華的婦人人欲得著呵咾」(箴言31：30)。

  5. 好額人是照上帝的in來得著好額，就著有感謝，有節制，無奢侈放肆，gâu利用金錢，揣機會來賑濟，利益人，積聚財寶佇天裡，才無辜負上帝的恩 (太6：19，20；I 提 6：17-19)。

  6. Sòng-hiong人莫得吐氣，因為天裡有厝宅，是黃金的殿堂，就是疼無限的主，為著信伊的人所備辦--的(翰 14：1-3)。「好額也有掛慮；毋值著sòng-hiong來敬畏耶和華」(箴言15：16)。倚靠耶和華的人有福氣」(箴言16：20)。(參看詩篇37：25；可 10：29，30)。

  7. 無論好額，sòng-hiong，無論甚物境遇，甚物地位；無欣羨人，無愛人欣羨，總是無怨恨人，無看輕人，凡事感謝，凡事吞忍，凡事信靠上帝才有平安(腓 4：4-7；I 帖 5：16-18)。各人照上帝所賞賜恩惠的份量，用做善的法度，盡所有的機會，來歸榮光上帝，來利益人，服事人；這正是理想基督徒 (羅馬12：1，2)。

「我的性命獻予你，

做你路用到一世；

時刻暝日獻予主，

歸榮光你萬年久。」

「我的疼求主贊，

疼你贏過通世間；

今我立志獻家己，

永永專專歸予你。」

可能mā有趣味：