基督徒的福氣
Ki-tok-tô͘ ê hok-khì
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會公報 |
| 卷期 | 第594卷 |
| 日期 | 1934/9 |
| 頁數 | 24-25 |
白話字（原文數位化）
Ki-tok-tô͘ ê hok-khì
(Koa Siat-kai)
- 9, no. 594, pp. 24-25
Lán sìn Iâ-so͘ Ki-tok ê lâng, si̍t-chāi chin ū hok-khì! Chhiáⁿ tha̍k Lō͘-ka 10:23-24. (Iâ-so͘) “Chiū oa̍t-tńg-sin àm-chīⁿ tuì ha̍k-seng kóng, Khoàⁿ-kìⁿ lín só͘ khoàⁿ-kìⁿ--ê, hiah ê ba̍k-chiu ū hok-khì. In-uī goá kā lín kóng, chêng ū choē-choē sian-ti kap kun-ông ài khoàⁿ lín só͘ khoàⁿ-kìⁿ--ê, iā bô khoàⁿ-kìⁿ, ài thiaⁿ lín só͘ thiaⁿ-kìⁿ--ê, iā bô thiaⁿ-kìⁿ.”
án-ni hō͘ lán thang chai, Iâ-so͘ lîm-kàu ê í-chêng, ū choē-choē sian-ti, kun-ông bô thang khoàⁿ-kìⁿ, iā bô thang thiaⁿ-kìⁿ, hit-sî Sìn-tô͘ só͘ oē thang khoàⁿ-kìⁿ,kap só͘ oē thang thiaⁿ-kìⁿ--ê.
Iâ-so͘ í-keng lîm-kàu it7 sè-kan lah. Kin-á-ji̍t lán sìn Chú ê lang chin ū hok-khì, tuì Sèng-keng lán oē thang khoàⁿ-kìⁿ Iâ-so͘, oē thang thiaⁿ-kìⁿ Iâ-so͘.
Iâ-so͘ lîm-kàu ê í-chêng, ū choē-choē ê sian-ti, kun-ông, gâu-lâng, ū tē-uī ê lâng, ū sè-le̍k ê lâng, ū chîⁿ lâng, ū miâ-siaⁿ ê lâng, in boē thang khoàⁿ-kìⁿ, iā boē thang thiaⁿ-kìⁿ, hit-sî Sìn-to͘ só͘ oē khoàⁿ-kìⁿ kap thiaⁿ-kìⁿ--ê:- (chiū-sī Iâ-so͘ Ki-tok).
Hit-sî ê Sìn-tô͘ ti̍t-chiap kap Iâ-so͘ choè tīn, ū thang khoàⁿ-kìⁿ Iâ-so͘ ê iông-māu, ū thang thiaⁿ-kìⁿ Iâ-so͘ ê kà-sī. Si̍t-chāi hit-sî Sù-tô͘ in hiah ê lâng, chin ū hok-khì.
Lán hiān-sî tuì Sèng-keng iû-goân oē thang khoàⁿ-kìⁿ Iâ-so͘ ê kà-sī, tuì sìn-gióng, kî-tó, iû-goân oē thang khoàⁿ-kìⁿ Iâ-so͘ ê iông-māu, (-siat-sú bô khoàⁿ-kìⁿ, iā oē sióng-siōng). Che kám m̄-sī Ki-tok-tô͘ ê hok-khì mah?!
Lán sui-jiân m̄-sī sian-ti, m̄-sī gâu-lâng, m̄-sī ū tē-uī ê lâng, m̄-si ū sè-le̍k ê lâng, m̄-sī ū chîⁿ lâng, m̄-sī ū miâ-siaⁿ ê lâng, iáu-kú lán ū thang khoàⁿ-kìⁿ kap thiaⁿ-kìⁿ Iâ-so͘. Chiū-sī ū tit-tio̍h Hok-im, -Che sī lán ê hok-khì!
Taⁿ lán tio̍h chiong chit ê Hok-im, koh thoân-pò hō͘ iáu-bē tit-tio̍h ê lâng, -chiah ū chīn lán choè Ki-tok-tô͘ ê pún-hūn.
漢羅（Ùi原文改寫）
基督徒的福氣
(柯設偕)
1934.9，no.594，pp.24-25
咱信耶穌基督的人，實在真有福氣！請讀路加10：23-24。(耶穌) 「就越轉身暗靜對學生講，看見恁所看見--的，遐的目睭有福氣。因為我共恁講，前有濟濟先知佮君王愛看恁所看見--的，也無看見，愛聽恁所聽見--的，也無聽見。」
按呢予咱通知，耶穌臨到的以前，有濟濟先知，君王無通看見，也無通聽見，彼時信徒所會通看見，佮所會通聽見--的。
耶穌已經臨到佇世間啦。今仔日咱信主的人真有福氣，對聖經咱會通看見耶穌，會通聽見耶穌。
耶穌臨到的以前，有濟濟的先知，君王，gâu人，有地位的人，有勢力的人，有錢人，有名聲的人，in袂通看見，也袂通聽見，彼時信徒所能看見佮聽見--的：- (就是耶穌基督)。
彼時的信徒直接佮耶穌做陣，有通看見耶穌的容貌，有通聽見耶穌的教示。實在彼時使徒in遐的人，真有福氣。
咱現時對聖經猶原會通看見耶穌的教示，對信仰，祈禱，猶原會通看見耶穌的容貌，(-設使無看見，也會想像)。這敢毋是基督徒的福氣mah？！
咱雖然毋是先知，毋是gâu人，毋是有地位的人，毋是有勢力的人，毋是有錢人，毋是有名聲的人，猶過咱有通看見佮聽見耶穌。就是有得著福音，-這是咱的福氣！
今咱著將這个福音，閣傳報予猶未得著的人，-才有盡咱做基督徒的本份。