看見異象
Khoàⁿ-kìⁿ ĪN-siōng
文獻資訊
| 項目 | 資料 |
|---|---|
| 作者 | 卓恆利 Toh Hêng-lī |
| 卷期 | 台灣教會公報/芥菜子 |
| 卷期 | 第593卷 |
| 日期 | 1934/8 |
| 頁數 | 23 |
白話字（原文數位化）
Khoàⁿ-kìⁿ ĪN-siōng
(Toh Hêng-lī)
- 8, no. 593, pp. 23
Suī-hong Kàu-hoē, ū chi̍t ê chí-bē kiò-chò Tiō--sī Lê. I sī chin jia̍t-sim, nā kap lâng chē, m̄-bat kóng êng-oē, lóng sī kóng Siōng-tè ê kok ê sū, put-chí gâu ín-chhoā lâng, tuì i ê chhiú ū ín-chhoā kuí-nā ke lâi sìn Siōng-tè, iā só͘ ín-chhoā--ê, lóng chin jia̍t-sim, chin sêng-si̍t. iā chin gâu thiàⁿ lâng, kóng oē un-jiû, só͘-í lâng chin ài kap i kau-poê kóng-oē. iā chin gâu pang-chān thoân-kàu-ka, thang kóng sī Suī-hong Kàu-hoē chi̍t ki ê toā-thiāu-chio̍h. Taⁿ chit ê chí-bē, tī kū-nî tiong , ke-lāi ū tú-tio̍h chin toā ê chhì-liān; i ê toā-kiáⁿ phoà-pīⁿ, ji̍p-īⁿ kuí-nā ge̍h-ji̍t kú; āu-lâi pīⁿ hó, chhut īⁿ liáu, i ê toā cha-bó͘-kiáⁿ koh phoà-pīⁿ, iā khì ji̍p-īⁿ; āu-lâi hó, chhut īⁿ liáu-āu, i ê tē-sì cha-bó͘-kiáⁿ iū-koh phoà-pīⁿ, iû-goân ji̍p-īⁿ, sui-jiân chin guî-hiám, chóng-sī tuì tī gín-ná ê gâu kî-tó, hō͘ i koh-chài hó, iā thang chhut-īⁿ; āu-lâi bô loā-kú, i pún-sin iā phoà-pīⁿ chin siong-tiōng, ge̍h-goā-ji̍t kú lóng boē thang khí-chhn̂g, ke-lâi ê toā-soè put-chí hoân-ló, nā-sī i ê lāu-bú sī koh-khah khoà-lū, mî-ji̍t chá-ám uī-tio̍h i ê pīⁿ pek-chhiat khún-kiû. Só͘ keng-kè sī kóng boē liáu, to̍k-to̍k tī-chia ū chi̍t hāng put-chí kî-koài ê sū, ài pò lán chai:-
Ū chi̍t àm, tng i pīⁿ siong-tiōng ê sî, i ê lāu-bú tī keh-piah pâng teh thoè i kî-tó ê sî, Tiō--sī Lê ché, hut-jiân khoàⁿ-kìⁿ nn̄g lâng chhēng pe̍h-saⁿ, chē tī i ê sin-piⁿ, thâu-khak-liáu, kî-tiong chi̍t ê kóng, “Lí kî-tó m̄ tio̍h kóng Sam-uī it-thé.” Hit-tia̍p Lê-ché cheng-sîn cheng-sîn, m̄-nā khoàⁿ-kìⁿ chit nn̄g lâng, iā ū thiaⁿ-kìⁿ in lāu-bú só͘ kî-tó ê oē, só͘-í Lê-ché-á put-chí hoân-ló, chiàu i phah-sǹg, sī boē hó, tek-khak bô kú oē lī-khui sè-kan, chóng-sī thiⁿ-sài nā oē chhoā i kàu Thi-pē tau, sī chin hok-khì, m̄-kú i ê lāu-bú m̄-chai beh loā pi-ai, uī-tio̍h án-ni, put-chí khoà-lū i ê lāu-bú, in-uī i sī chin iú-hàu; āu-lâi bô loā-kú, chit nn̄g ê chhēng pe̍h-saⁿ hut-jiân bô koh khoàⁿ-kìⁿ. I chiū suî-sî mn̄g in lāu-bú kóng, Î-á, lí liâm-piⁿ teh kā goá kî-tó, lí kám ū thiaⁿ-kìⁿ. Lê-ché-á kóng, lí ê kî-tó, goá lóng ū thiaⁿ-kìⁿ. Chóng-sī m̄-káⁿ kā i kóng i ū khoàⁿ-kìⁿ nn̄g ê chhēng pe̍h-saⁿ kā chhù-lāi ê lâng kóng. Chiàu pún-lâng ê phah-sǹg sī oē sí. Chóng-sī chi̍t-ji̍t keng-kè chi̍t-ji̍t, pīⁿ chiām-chiām hó, kàu pīⁿ hó, khí chhn̂g, khoàⁿ-kìⁿ boē sí, chiah chiong i só͘ khoàⁿ-kìⁿ chit chân sū, kā tāi-ke kóng, tāi-ke put-chí kî-koài.
Taⁿ goá thiaⁿ-kìⁿ chit chân, boē-bián-tit siá kuí-jī hō͘ lán chai, chhin-chhiūⁿ Sèng-keng kóng, “Bān-sū ta̍uh-ta̍uh lâi, bô m̄-sī beh lī-ek thiàⁿ Siōng-tè ê lâng.” Só͘-í hō͘ lán chai, sui-jiân ū tú-tio̍h sím-mi̍h chhì-liān, iā m̄-bián khoà-lū, in-uī Siōng-tè tek-khak bô pàng-sak lán.
漢羅（Ùi原文改寫）
看見異象
(卓恒利)
1934.8，no.593，pp.23
瑞芳教會，有一个姊妹叫做趙--氏Lê。伊是真熱心，若佮人坐，毋捌講閒話，攏是講上帝的國的事，不止gâu引chhoā人，對伊的手有引chhoā幾若家來信上帝，也所引chhoā--的，攏真熱心，真誠實。也真gâu疼人，講話溫柔，所以人真愛佮伊交陪講話。也真gâu幫贊傳教家，通講是瑞芳教會一支的大柱石。今這个姊妹，佇舊年中，家內有拄著真大的試煉；伊的大囝破病，入院幾若月日久；後來病好，出院了，伊的大查某囝閣破病，也去入院；後來好，出院了後，伊的第四查某囝又閣破病，猶原入院，雖然真危險，總是對佇囡仔的gâu祈禱，予伊閣再好，也通出院；後來無偌久，伊本身也破病真傷重，月外日久攏袂通起床，家內的大細不止煩惱，若是伊的老母是閣較掛慮，暝日早暗為著伊的病迫切懇求。所經過是講袂了，獨獨佇遮有一項不止奇怪的事，愛報咱知：-
有一暗，當伊病傷重的時，伊的老母佇隔壁房teh替伊祈禱的時，趙--氏Lê姊，忽然看見兩人穿白衫，坐佇伊的身邊，頭殼 向向teh聽in老母的祈禱，聽了，其中一个講，「你祈禱毋著講三位一體。」彼霎Lê姊精神精神，毋若看見這兩人，也有聽見in老母所祈禱的話，所以Lê姊仔不止煩惱，照伊拍算，是袂好，的確無久會離開世間，總是天使若會chhoā伊到天父兜，是真福氣，毋過伊的老母毋知欲偌悲哀，為著按呢，不止掛慮伊的老母，因為伊是真有孝；後來無偌久，這兩个穿白衫忽然無閣看見。伊就隨時問in老母講，姨仔，你連鞭teh共我祈禱，你敢有聽見。Lê姊仔講，你的祈禱，我攏有聽見。總是毋敢共伊講伊有看見兩个穿白衫共厝內的人講。照本人的拍算是會死。總是一日經過一日，病漸漸好，到病好，起床，看見袂死，才將伊所看見這層事，共大家講，大家不止奇怪。
今我聽見這層，袂免得寫幾字予咱知，親像聖經講，「萬事沓沓來，無毋是欲利益疼上帝的人。」所以予咱知，雖然有拄著甚物試煉，也毋免掛慮，因為上帝的確無放拺咱。