溫柔謙遜

Un-jiû Khiam-sùn

文獻資訊

項目	資料
作者	陳清義 Tân Chheng-gī
卷期	台灣教會公報/芥菜子
卷期	第593卷
日期	1934/8
頁數	22-23

白話字（原文數位化）

Un-jiû Khiam-sùn

Má-thài 11 chiuⁿ 29 chat

(Tân chheng-gī)

1. 8, no. 593, pp.22-23

Lūn Un-jiû, khiam-sùn chit 4 jī, sǹg sī Tō-tek-tiong ê tē-it, Chú Iâ-so͘ siông-siông kà-sī lâng tio̍h o̍h I, I pún-sin ū án-ni kiâⁿ. I sui-jiân ū Siōng-tè ê Kiáⁿ ê chun-chheng, kàng-lîm choè lâng, kam-goān siū sè-kan ê kan-khó͘, siū pháiⁿ lâng ê hām-hāi, choân bô oàn-hūn ê sim, sûn-sûn siān kàu, toā kiâⁿ īⁿ-chek, bô khoa-kháu kok-it ê koân-lêng. Koh-chài chiong-sin sūn-thàn Siōng-tè ê bēng-lēng, khiam-pi kàu sí. I ê un-jiû khiam-sùn, si̍t-chāi thang choè bān-sè ê su-piáu. Lūn I só͘ kà-sī un-jiû khiam-sùn ê tō-lí, ū kì-chài tī Sèng-keng, chhì ín lâi lūn:-

1. Khoàⁿ Má-thài 18 chiuⁿ 1-4 só͘ kóng. Tng-sî ba̍k-seng chiū-kūn Iâ-so͘ kóng, Tī Thian-kok sím-mi̍h lâng choè toā? Iâ-so͘ kiò chi̍t ê gín-á khiā tī bīn-chêng kóng, Goá si̍t-chāi kā lín kóng, bô tò-tńg chhin-chhiūⁿ gín-á, boē tit-ji̍p Thian-kok. Só͘-í hoān-nā khiam-sùn chhin-chhiūⁿ gín-á, chiū tī Thian-kok choè toā. In-uī gín-á ê khoán, ài tì-sek, ài chit-mn̄g, siông-siông ài cha-chhat sū-bu̍t. I ê sim goân sio̍k khiam-sùn, bô kiau-ngō͘, in-uī I ū goân-pún khiam-sùn ê thian-sèng, chit khoán ê sim-hō͘ Iâ-so͘ só͘ hoaⁿ-hí. Chāi-chá Hoat-lī-sài lâng bô khiam-sùn ê sim, só͘-í Iâ-so͘ chek-pī i ū chai-ē, i ê só͘ choè, chiū-sī khiam-sùn ê hoán-tuì, lâng m̄-thang o̍h i, tio̍h o̍h Iâ-so͘ khiam-sùn ê hó bô-iūⁿ.

2. Khoàⁿ Mâ-thài 20 chiuⁿ 25-28 só͘ kóng. Iâ-so͘ tiàu ha̍k-seng lâi, kā i kóng, Lín chai īⁿ-pang lâng ū kun-ông chú-tī, ū tāi-jîn koán-hat, to̍k-to̍k lín tiong-kan m̄-thang án-ni; lín tiong-kan ài choè toā ê, tio̍h choè lâng ê chhe-ēng; ài choè thâu ê, tio̍h choè lín ê lô͘-po̍k. Chhin-chhiūⁿ Jîn-chú lâi, m̄-sī beh chhe-ēng lâng, chiū-sī beh hō͘ lâng chhe-ēng; koh-chài pàng-sak sìⁿ-miā, thoè chèng-lâng sio̍k choē. Iâ-so͘ kóng án-ni, sī in-uī tng-sî Se-pí-thài ū nn̄g ê kiáⁿ, i ê lāu-bú chhoā i chiū-kūn Iâ-so͘, pài kiû chi̍t hāng. Iâ-so͘ kóng, Lí ài goá choè sím-mi̍h? ìn kóng, Chún goá nn̄g ê kiáⁿ, tī lí ê Kok chē lí ê chó-iū. Cha̍p ê ha̍k-seng thiaⁿ-liáu chin oàn-hūn chit nn̄g ê, in-uī chai in ê ì-sù bô khiam-pi, ài choè toā.

3. Khoàⁿ Iok-hān 13 chiuⁿ 4-5 só͘ kóng. Chiū lī-khui toh, thǹg saⁿ; ēng kun ka-kī bâ. Tò chuí tī poâⁿ nih, soé ha̍k-seng ê kha, ēng só͘ hâ ê kun kā in chhit. Iâ-so͘ kiâⁿ án-ni, sī in-uī khoàⁿ ha̍k-seng iû-goân boe-oē khek-kí khiam-sùn, só͘-í kiâⁿ án-ni lâi kà-sī in. Só͘-í I án-ni kóng, Goá choè án-ni lín chai bô? Lín chheng goá choè Chú, choè Sian-siⁿ, tio̍h soé lín ê kha, chiū lín iā tio̍h saⁿ-kap soé kha. Goá chí-sī lín, ēng chit ê haot-tō͘ hō͘ lín o̍h goá lâi choè.

Chit khoán ê bô͘-hoān, si̍t-chāi sī un-jiû khiam-sùn ê chin-siòng, lán lâng tio̍h o̍h án-ni lâi kiâⁿ. Só͘-í lán lâng tī sè-kan, tio̍h ēng un-jiû khiam-sùn choè kun-pún, chiū só͘ tit-tio̍h ê lī-ek sī chin toā.

漢羅（Ùi原文改寫）

溫柔謙遜

馬太11章29節

(陳清義)

1934.8，no.593，pp.22-23

論溫柔，謙遜這4字，算是道德中的第一，主耶穌常常教示人著學伊，伊本身有按呢行。伊雖然有上帝的囝的尊稱，降臨做人，甘願受世間的艱苦，受歹人的陷害，全無怨恨的心，循循善教，大行異蹟，無誇口各一的權能。閣再終身順趁上帝的命令，謙卑到死。伊的溫柔謙遜，實在通做萬世的師表。論伊所教示溫柔謙遜的道理，有記載佇聖經，試引來論：-

1. 看馬太18章1-4所講。當時學生就近耶穌講，佇天國甚物人最大？耶穌叫一个囝仔徛佇面前講，我實在共恁講，無倒轉親像囝仔，袂得入天國。所以凡若謙遜親像囝仔，就佇天國最大。因為囝仔的款，愛智識，愛這問，常常愛查察事物。伊的心原屬謙遜，無驕傲，因為伊有原本謙遜的天性，這款的心予耶穌所歡喜。在早法利賽人無謙遜的心，所以耶穌責備伊有災厄，伊的所做，就是謙遜的反對，人毋通學伊，著學耶穌謙遜的好模樣。

2. 看馬太20章25-28所講。耶穌召學生來，共伊講，恁知異邦人有君王主治，有大人管轄，獨獨恁中間毋通按呢；恁中間愛最大的，著做人的差用；愛做頭的，著做恁的奴僕。親像人子來，毋是欲差用人，就是欲予人差用；閣再放拺性命，替眾人贖罪。耶穌講按呢，是因為當時西庇太有兩个囝，伊的老母chhoā伊就近耶穌，拜求一項。耶穌講，你愛我做甚物？應講，准我兩个囝，佇你的國坐你的左右。十个學生聽了真怨恨這兩个，因為知in的意思無謙卑，愛做大。

3. 看約翰13章4-5所講。就離開桌，褪衫；用巾家己縖。倒水佇盤裡，洗學生的跤，用所縖的巾共in拭。耶穌行按呢，是因為看學生猶原袂會克己謙遜，所以行按呢來教示in。所以伊按呢講，我做按呢恁知無？恁稱我做主，做先生，著洗恁的跤，就恁也著相佮洗跤。我只是恁，用這个法度予恁學我來做。

這款的模範，實在是溫柔謙遜的真相，咱人著學按呢來行。所以咱人佇世間，著用溫柔謙遜做根本，就所得著的利益是真大。