毋通相排斥
M̄-thang saⁿ pâi-thek
文獻資訊
| 項目 | 資料 |
|---|---|
| 作者 | 賴仁聲 Loā Jîn-seng |
| 卷期 | 台灣教會公報 |
| 卷期 | 第593卷 |
| 日期 | 1934/8 |
| 頁數 | 2-3 |
白話字（原文數位化）
M̄-thang saⁿ pâi-thek
Chóng-sī tio̍h khioh lâi chò kàm-kài
(Chiap 7 goe̍h tē 5 bīn)
(Loā Jîn-seng)
- 8, no. 593, pp. 2-3
Chóng-sī nā lūn Sèng-kiat-hoē, lín bô chi̍t lâng pí goá khah chai. Sui ū chē-chē Tiúⁿ-ló-hoē ê lâng koè-khì Sèng-kiat-hoē, goá hó-táⁿ kóng, lóng sī sìn-chiá (Bó͘ thoân-tō ê í-goā). Goá kóng án-ni, m̄-sī khoàⁿ-khin kî-û hiah ê koè-khì Sèng-kiat-hoē chò-kang ê sian-siⁿ. Goá chai in hiān-sî ū lâng chin jia̍t-sim, koh chin ū gián-kiù, ū-ê sī chin iu-siù ê sian-siⁿ kap sìn-tô͘, goá iā-sī chun-kèng in. Chóng-sī goá chū-sìn kóng goá í-keng ū kuí-hun sîn-ha̍k ê siông-sek, kap tī-hoē, kàu-hoē chèng-tī ê siông-sek. Koh pún-sin ji̍p-khì kap in chò ha̍k-seng, iā chò in ê thoân-tō-chiá thâu-boé 6 nî, án-ni lâi kóng in ê kàu-hoē ê khoán, phah-sǹg khah ē tuì. iā chiàu goá ê liông-sim, goá m̄-sī ài pâi-thek, iā m̄-sī ài ok-phêng. Nā-sī beh lām-sám kóng, goá ê lūn-bûn chiuu lek-miâ, goá tông-tông hē goá ê miâ tī téng-bīn, sī ū chek-jīm ê kóng-oē. Koh goá ê só͘ kóng, nā m̄-sī tû-khì goá ê koan-chhat chhò í-goā, goá sìn bô poē liông-sim, ok-ì ê tiòng-siong.
Só͘-í goá bêng-bêng seng-bêng goá “m̄-sī beh pâi-thek, sī saⁿ-kap chò kéng-kài,” goá tuì tò-lâi Bó-hoē, chiū ka-tī hō chi̍t ê miâ chò Sùn-chēng (遜靜), lâi ka-tī kéng-kài, ǹg-bāng ē khiam-pi, koh thiâm-chēng, bô phah-sǹg iū-sī ko͘-put-chiong tio̍h gia̍h-pit lâi kóng-oē. Goá chêng goe̍h ē siá “Tio̍h chù-sîn khoàⁿ Iâ-so͘”: (1) Si̍t-chāi sī goá liông-sim bô ké ê kò-pe̍k, m̄-sī tiòng-siong Sèng-kiat-hoē; (2) Sī siūⁿ kóng Sèng-kiat-hoē ê jiáu-tōng, tī Loē-tē tho̍k-māi sin-bûn (讀賣新聞), kap Kàu-kài ê Hok-im sin-pò sī chhut chin-chē, ū-ê liân siá-chin to ìn chhut-lâi. Tâi-oân ê Tâi-oân sin-bûn iā ū chhut. Hō͘ lâng kóng kàu án-ni, goá siūⁿ hō͘ chē-chē m̄-chai ê lâng kóng, m̄ ta̍t-tio̍h goá kóng, khah chai-iáⁿ, koh goá bô chûn-ì ài kóng in ê pháiⁿ-oē, phah-sǹg hit ê oē, khah ē chin, khah kon-chèng. Khó-sioh chiap-tio̍h in hit pêng kuí-nā ê sian-siⁿ kì-miâ, kap lek-miâ phoe ê kong-kek, goá siūⁿ che iā-sī chū-jiân, chóng-sī che lóng-sī jîn-chêng ê chhiòng-tōng jî-í. Goá siūⁿ bô kā in hoê-phoe ê pit-iàu, soà kā in seh-siā. Bô koh-iūⁿ lâng teh kong-kek Kim-sim Thong-lûn Sian-siⁿ (金森通倫氏). I tuì Cho͘-ha̍p-phài ji̍p-khì chèng-tī kài, koh choán-ji̍p Kiù-sè-kun, āu-lâi chò chū-iû thoân-tō, āu-lâi choán-ji̍p Sèng-kiat-phài. Kàu chit-sî sî-chit, chēng-ióng tī Hoâiⁿ-pin. Goá m̄-káⁿ kap hiah uí-tāi ê jîn-bu̍t, kàu-kài ê goân-ló pí. Chóng-sī goá bat tha̍k i ê sìn-gióng kò-pe̍h, tuì tī i oāⁿ kàu-phài ê sim-lí, si̍t-chāi chin ū thang hō͘ lán tông-chêng kap kéng-kài ê uī.
Hu̍t-kàu ê hoê-siūⁿ, Ku-kok Lêng-bûn-su choán-ji̍p lán Ki-tok-kàu chò Bo̍k-su ê sìn-gióng kò-pe̍h, iā-sī chin sûn-chêng, goá iā-sī bē kham-tit pí Ku-kok Lêng-bûn Sian-siⁿ. Chóng-sī hit ê tò-tńg lâi hó-táⁿ kóng bô koh-iūⁿ.
Lūn goá koh tuì Tiong-hoē, Tāi-hoē pín ho̍k-chit, che sī goá ê sù-bēng; in-uī goá chhut-sì hiám-sí, chiū thong-ke kuī-lo̍h li̍p-sè hiàn goá chò Chú ê kang, só͘-í gaó koh pín ho̍k-chit, sī thàn liông-sim, Siōng-tè ê chín-tiàu. Beh koh siu-liû á m̄, che-sī Siōng-tè ê chí-ì, kap Tāi-hoē tong-kio̍k ê tō͘-liōng kap chè-tō͘. (Hō͘ gaó ho̍k-chit, khiok kap thoân-tō-su tuì Thoân-tō-kio̍k ho̍k-chit chi̍t-sut-á koh-iūⁿ). Só͘-í goá ê sim-kéng sī chhiau-oa̍t tī ho̍k-chit ê su-chêng.
Goá hiān-sî tī Tâi-tiong, siū Tâi-tiong Kàu-hoē ê hó-ì, kap chèng chheng-liân hia̍p-chok Chheng-liân-hoē, Chú-ji̍t-o̍h, goá iā-sī cha̍p-hun ê hoaⁿ-hí.
Taⁿ che sī lân-san ê oē, in-uī ū lâng teh gō͘-kái goá ê thài-tō͘, ko͘-put-chiong goá tio̍h kóng-bêng. Bē bián-tit ū lâng gō͘-kái, goá iā ka-tī chai chin sit-pāi, só͘-í goá iā siông kiû Siōng-tè, hō͘ goá tuì chia khí, chò ū tēng-sèng, pí chêng khah hó ê khì-khū tī kàu-hoē.
Taⁿ tī chit-sî, goá beh lâi siok-pit, siá Sèng-kiat Kàu-hoē pheng-li̍h ê oán-in, kīn-in, kap hiān-chāi. Koh chiong-lâi lán ê Tiúⁿ-ló-hoē tuì Sèng-kiat-hoē, kap Chin Iâ-so͘-hoē ê thài-tō͘, hō͘ tāi-ke chò chham-khó, lâi hù Tāi-hoē, á-sī Chóng-hoē ê chhâi-koat, kap hō͘ it-poaⁿ lán ê kàu-hoē só͘ tio̍h chhu ē hong-chiam chò chham-khó.
(Thāi-sio̍k).
漢羅（Ùi原文改寫）
毋通相排斥
總是著抾來做鑑戒
(接7月第5面)
(賴仁聲)
1934.8，no.593，pp.2-3
總是若論聖潔會，恁無一人比我較知。雖有濟濟長老會的人過去聖潔會，我好膽講，攏是信者(某傳道的以外)。我講按呢，毋是看輕其餘遐的過去聖潔會做工的先生。我知in現時有人真熱心，閣真有研究，有的是真優秀的先生佮信徒，我也是尊敬in。總是我自信講我已經有幾分神學的常識，佮治會，教會政治的常識。閣本身入去佮in做學生，也做in的傳道者頭尾6年，按呢來講in的教會的款，拍算較會對。也照我的良心，我毋是愛排斥，也毋是愛惡評。若是欲濫糝講，我的論文就匿名，我堂堂下我的名佇頂面，是有責任的講話。閣我的所講，若毋是除去我的觀察錯以外，我信無背良心，惡意的中傷。
所以我明明聲明我「毋是欲排斥，是相佮做警戒，」我對倒來母會，就家己號一个名做遜靜，來家己警戒，向望會謙卑，閣恬靜，無拍算又是姑不將著攑筆來講話。我前月會寫「著注神看耶穌」：(1)實在是我良心無假的告白，毋是中傷聖潔會；(2)是想講聖潔會的擾動，佇內地讀賣新聞，佮教界的福音新報是出真濟，有的連寫真都印出來。台灣的台灣新聞也有出。予人講到按呢，我想予濟濟毋知的人講，毋值著我講，較知影，閣我無存意愛講in的歹話，拍算彼个話，較會真，較公正。可惜接著in彼爿幾若个先生記名，佮匿名批的攻擊，我想這也是自然，總是這攏是人情的chhiòng動而已。我想無共in回批的必要，紲共in說謝。無各樣人teh攻擊金森通倫先生(金森通倫氏)。伊對組合派入去政治界，閣轉入救世軍，後來做自由傳道，後來轉入聖潔派。到這時辭職，靜養佇橫濱。我毋敢佮遐偉大的人物，教界的元老比。總是我捌讀伊的信仰告白，對佇伊換教派的心理，實在真有通予咱同情佮警戒的位。
佛教的回想，Ku-kok Lêng-bûn-su轉入咱基督教做牧師的信仰告白，也是真純情，我也是袂堪得比Ku-kok Lêng-bûn先生。總是彼个倒轉來好膽講無各樣。
論我閣對中會，大會秉復職，這是我的使命；因為我出世險死，就通家跪落立世獻我做主的工，所以我閣秉復職，是趁良心，上帝的振召。欲閣收留抑毋，這是上帝的旨意，佮大會當局的度量佮制度。(予我復職，卻佮傳道師對傳道局復職一屑仔各樣)。所以我的心境是超越佇復職的私情。
我現時佇台中，受台中教會的好意，佮眾青年協作青年會，主日學，我也是十分的歡喜。
今這是零星的話，因為有人teh誤解我的態度，姑不將我著講明。袂免得有人誤解，我也家己知真失敗，所以我也常求上帝，予我對遮起，做有定性，比前較好的器具佇教會。
今佇這時，我欲來續筆，寫聖潔教會崩裂的遠因，近因，佮現在。閣將來咱的長老會對聖潔會，佮真耶穌會的態度，予大家做參考，來赴大會，抑是總會的裁決，佮予一般咱的教會所著取的方針做參考。
(待續)。