基督的死
Ki-tok ê Sí
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第592卷 |
| 日期 | 1934/7 |
| 頁數 | 9 |
白話字（原文數位化）
Ki-tok ê sí
(M. C. H.)
- 7, no. 592, pp. 9
Chú Iâ-so͘ chhoā ha̍k-seng kàu Khek-se-má-nî ê hoe-hn̂g, kî-tó liáu. Hit ê lâng-bīn siù-sim ê Iû-tāi, ū ín-sut Chè-si-thâu kap chi̍t-tuī Lô͘-má peng, kia̍h to, kia̍h thuî-á kap hoé-pé, thàu-mê kàu hia lia̍h Iâ-so͘, ná lia̍h chha̍t chi̍t-iūⁿ. Tī Chè-si-thâu, Kong-hoē, kap Chóng-tok Pí-lia̍p-to ê bīn-chêng, siū chióng-chióng bú-jio̍k ê sím-mn̄g. Sui-jiân mn̄g liáu bô choē, iáu-kú Chóng-tok uī-tio̍h ài hō͘ Chè-si-thâu ê tóng hoaⁿ-hí, chiū hoat-kau Iâ-so͘ khì tèng si̍p-jī-kè.
Lia̍t-uī ah! Bô-lūn siáⁿ lâng, i ê sim nā tîm-le̍k tī lī-kí chú-gī ê choē-ok tiong; nā boē bat pún-sin keng-koè kî-īⁿ ê khún-pek; nā bô ū chi̍t tiám sêng-sim thé-hoē ê kang-hu, kap sióng-siōng ê lêng-le̍k; chiū bē-ē bêng-pe̍k tng-sî Chú Iâ-so͘ só͘ siū bān-poaⁿ ê thòng-khó͘. Taⁿ, tàu-tí Ki-tok ê Sí, ū siáⁿ ì-gī tī-teh?
- Ki-tok ê Sí, sī Siōng-tè ū-tēng ê kè-e̍k.
Pó-lô Sian-siⁿ kóng, Nā-sī kàu hit ê sî, í-keng moá, Siōng-tè chhe I ê Kiáⁿ, tuì hū-jîn-lâng lâi chhut-sì, chhut-sì tī lu̍t-hoat-ē; lâi sio̍k-hoê lu̍t-hoat-ē ê lâng, hō͘ lán siū siat-li̍p chò kiáⁿ (Ka-lia̍p-thài 4:4, 5). Koh kóng, Ki-tok kàu kî, thè ū-choē ê lâng sí (Lô-má 5:6). Thang chai, Siōng-tè chhe Iâ-so͘ lâi sè-kan, chiū-sī ài kiù sè-kan lâng chhut-sí ji̍p-oa̍h. Iâ-so͘ iā chá-chá chai chit chhut chhám-ke̍k, tek-khak ē chi̍t pái ián-chhut tī i ê sin-chiūⁿ; in-uī nā bô án-ni, bô kàu-gia̍h thang hián-bêng Siōng-tè thiàⁿ sè-kan lâng ê chí-ì, iū-koh nā bô án-ni, bē-ē sêng-chiū kiù-sio̍k ê sū-gia̍p.
- Ki-tok ê Sí, sī hō͘ Siōng-tè kap lâng koh hô.
Tuì A-tong poē-ge̍k Siōng-tè ê bēng-lēng í-lâi, Siōng-tè kap lâng ê keh-lī, bô ū lâng ē-thang hō͘ i koh ho̍k-tò. In-uī chèng-lâng lóng sī tiàm tī choē-ok teh seng-oa̍h, hō͘ Siōng-tè khoàⁿ chò tuì-te̍k; chí-ū Chú Iâ-so͘ thè lán siū-tèng Si̍p-jī-kè, chi̍t-bīn oân-sêng Siōng-tè ê Kong-gī, koh chi̍t-bīn, hián-bêng Siōng-tè ê Thiàⁿ-thàng; tuì án-ni, hō͘ Sîn-jîn-kan koh hô-hó. Pó-lô Sian-siⁿ kóng, Lán iáu-kú chò tuì-te̍k ê sî, tuì I ê Kiáⁿ ê sí, tit-tio̍h kap Siōng-tè koh hô (Lô-má 5:10). Koh kóng, Tuì si̍p-jī-kè kap Siōng-tè hô (Í-hut-só͘ 2:17).
- Ki-tok ê Sí, kap sè-kan lâng put-tông.
Iâ-so͘ goân-pún sī Tō, hoà-sin chiâⁿ-chò jio̍k-thé. I ū Sîn-jîn ê sèng tī-teh. Lūn I ê Sîn-sèng (神性), éng-oán bē-ē sí-bô. Iâ-so͘ pún-sin bat kóng, Bô lâng tuì Goá chhú--i, sī Goá ka-kī pàng-sak--i. Goá ū koân thang ho̍k-tò (Iok-hān 10:18). Khó-kiàn, Kok-kok-thaⁿ ê tē-hng, sī Iâ-so͘ hoaⁿ-hí kiâⁿ kàu hia--ê; Si̍p-jī-kè ê hêng-hoa̍t, sī Iâ-so͘ chêng-goān sêng-siū--ê. M̄-sī chhin-chhiūⁿ lán lâng, sí ê sî-kan nā kàu, ko͘-put-chiong tio̍h sí ê thang pí-phēng.
Kiat-lūn: (1) Tio̍h chù-sîn khoàⁿ thè lán tèng tī Si̍p-jī-kè ê Chú Iâ-so͘, in-uī tuì I ê sìn-sim, chiū bô iàu-kín lêng-jio̍k, jím-siū khó͘-hêng, taⁿ tit-tio̍h choè-toā ê êng-kng (Hi 12:2).
(2) Tio̍h chiong lán kū ê lâng, kap Iâ-so͘ tâng tèng tī si̍p-jī-kè, hō͘ jio̍k-thè it-chhè ê chêng-io̍k, bô koh koán-hat lán (Lô 6:6).
(3) Tio̍h poē si̍p jī-kè toè Chú Iâ-so͘ (Lō͘ 9:23).
Iâ-so͘ uī-tio̍h beh kiù jîn-luī, ū hi-seng pún-sin ê sèⁿ-miā; só͘-í lán tio̍h ló͘-le̍k hiòng-chiân, uī-tio̍h Chú lâi hōng-sū.
漢羅（Ùi原文改寫）
基督的死
(M. C. H. )
1934.7，no.592，pp.9
主耶穌chhoā學生到客西馬尼的花園，祈禱了。彼个人面獸心的猶大，有引率祭司頭佮一隊羅馬兵，攑刀，攑槌仔佮火把，透暝到遐掠耶穌，若掠賊一樣。佇祭司頭，公會，佮總督彼拉多的面前，受種種侮辱的審問。雖然問了無罪，猶過總督為著愛予祭司頭的黨歡喜，就發交耶穌去釘十字架。
列位啊！無論啥人，伊的心若沉溺佇利己主義的罪惡中；若袂捌本身經過奇異的窘迫；若無有一點誠心體會的工夫，佮想像的能力；就袂會明白當時主耶穌所受萬般的痛苦。今，到底基督的死，有啥意義佇teh？
- 基督的死，是上帝預定的計畫。
保羅先生講，若是到彼个時，已經滿，上帝揣伊的囝，對婦人人來出世，出世佇律法下；來贖回律法會的人，予咱受設立做囝(加拉太4：4，5)。閣講，基督到期，替有罪的人死(羅馬5：6)。通知，上帝揣耶穌來世間，就是愛救世間人出死入活。耶穌也早早知這齣慘劇，的確會一擺演出佇伊的身上；因為若無按呢，無夠額通顯明上帝疼世間人的旨意，又閣若無按呢，袂會成就救贖的事業。
- 基督的死，是予上帝佮人閣和。
對亞當悖逆上帝的命令以來，上帝佮人的隔離，無有人會通予伊閣復到。因為眾人攏是踮佇罪惡teh生活，予上帝看做對敵；只有主耶穌替咱受釘十字架，一面完成上帝的公義，閣一面，顯明上帝的疼痛；對按呢，予神人間閣和好。保羅先生講，咱猶過做對敵的時，對伊的囝的死，得著佮上帝閣和 (羅馬5：10)。閣講，對十字架佮上帝和 (以弗所2：17)。
- 基督的死，佮世間人不同。
耶穌原本是道，化身成做肉體。伊有神人的聖佇teh。論伊的神性，永遠袂會死無。耶穌本身捌講，無人對我取--伊，是我家己放拺--伊。我有權通復倒(約翰10：18)。可見，各各他的地方，是耶穌歡喜行到遐--的；十字架的刑罰，是耶穌情願承受--的。毋是親像咱人，死的時間若到，姑不將著死的通比並。
結論：(1)著注神看替咱釘佇十字架的主耶穌，因為對伊的信心，就無要緊凌辱，忍受苦刑，今得著做大的榮光(希 12：2)。
(2)著將咱舊的人，佮耶穌同釘佇十字架，予肉體一切的情慾，無閣管轄咱(羅 6：6)。
(3)著背十字架綴主耶穌(路 9：23)。
耶穌為著欲救人類，有犧牲本身的性命；所以咱著努力向前，為著主來奉事。