傳教師總會
Thoân-kàu-su Chóng-hoē
文獻資訊
| 項目 | 資料 |
|---|---|
| 作者 | 明有德 Bêng Iú-tek |
| 卷期 | 台灣教會公報/芥菜子 |
| 卷期 | 第592卷 |
| 日期 | 1934/7 |
| 頁數 | 22 |
白話字（原文數位化）
Thoân-kàu-su Chóng-hoē
(Bêng Iú-tek)
- 7, no. 592, pp. 22
Joa̍h-thiⁿ iū kàu, chi̍t-nî kè chi̍t-nî, chin kín. Kì-tit kuí-nā ji̍t chêng, lán Thoân-kàu-su ū chū-chi̍p tī Tām-chuí; chong-sī í-keng keng-kè chi̍t-nî kú, í-keng pìⁿ-choè 1933 nî ê hoē. Chá-khí-sî, goán thàu-chá tī Sîn Ha̍k-hāu ê hāu-chêng khoàⁿ Koan-im-soaⁿ ê toā chū-jiân, kap thiaⁿ-kìⁿ Siōng-tè ê siaⁿ, kiò lán lâi siu-liān. Ē-po͘-sî chē tī chhiū-kha saⁿ-kap siūⁿ kàu-hoē chìn-hêng ê sū, ê-hng-sî saⁿ-kap chē, gîm-si kám-siā Siōng-tè ê toā un-huī.
Ū chi̍t pái, goá oē kì-tit, ē-po͘-sî saⁿ-kap chū-chi̍p ê sî, it7 chi̍t châng toā chhiū-ē; ū lâng thê-gī chi̍t hāng, chiū-sī kóng, 1933 nî ê Chóng-hoē ê sî, nā saⁿ-kap tit-tio̍h Chú ê lêng-le̍k, thang lâi kóng-khoah 1 ê kok, chiū chin hó, goá thiaⁿ-liáu suî-sî kám-kak hit hāng ê iàu-kín. Chit khoán ê toê-ba̍k, sī chin ha̍h soà-chiap 1934 nî Chóng-hoē ê chóng toê-ba̍k. Kū-nî sī saⁿ-kap chū-chi̍p, lâi tit-tio̍h Pó-lô ê ín-chhoā lán bat Kiù-chú; iā kin-nî beh lâi tit-tio̍h Chú ê khuí-la̍t, hō͘ lán khah hoaⁿ-hí hō͘ Chú ēng.
Kin-nî Chóng-hoē sī tuì 7 ge̍h chhoe-saⁿ khí, kàu chhoe-cha̍p. Hoē-tiûⁿ Tām-chuí Tâi-pak Sin Ha̍k-hāu. Kin-nî sī kàu-hoē chin iàu-kín ê sî-kî, ū phèng-chhiáⁿ Loē-tē 堺中央日本基督敎會 ê Bo̍k-su 齊藤敏夫氏 lâi oān-chō͘. I sī siàu-liân, chin oa̍h-tāng, koh ū chin hó ê cheng-sîn ê Bo̍k-su. I ê jîn-bu̍t, kap i ê kang-tiâⁿ, kòng-hiàn it7 Ji̍t-pún Ki-tok kàu-kài, m̄-sī sió-khoá.
I beh káng-ián 7 hoê, sī lūn “Thoân-kàu-chiá kap i ê kang.” Koh ū nn̄g hoê ê thó-lūn-hoē, koan-hē kàu-hoē chu būn-toê, kap Chú-ji̍t-o̍h ê būn-toê. Kî-û iáu ū kuí-nā hāng ê kho-bo̍k ài gián-kiù, ún-tàng ū chin toā ê pang-chān.
漢羅（Ùi原文改寫）
傳教師總會
(明有德)
1934.7，no.592，pp.22
熱天又到，一年過一年，真緊。記得幾若日前，咱傳教師有聚集佇淡水；總是已經經過一年久，已經變做1933年的會。早起時，阮透早佇神學校的校前看觀音山的大自然，佮聽見上帝的聲，叫咱來修練。下晡時坐佇樹跤相佮想教會進行的事，ê昏時相佮坐，吟詩感謝上帝的大恩惠。
有一擺，我會記得，下晡時相佮聚集的時，佇一欉大樹下；有人提議一項，就是講，1933年的總會的時，若相佮得著主的能力，通來廣闊1个國，就真好，我聽了隨時感覺彼項的要緊。這款的題目，是真合紲接1934年總會的總題目。舊年是相佮聚集，來得著保羅的引chhoā咱捌救主；也今年欲來得著主的氣力，予咱較歡喜予主用。
今年總會是對7月初三起，到初十。會場淡水台北神學校。今年是教會真要緊的時期，有聘請內地堺中央日本基督敎會的牧師齊藤敏夫氏來援助。伊是少年，真活動，閣有真好的精神的牧師。伊的人物，佮伊的工程，貢獻佇日本基督教界，毋是小可。
伊欲講演7回，是論「傳教者佮伊的工。」閣有兩回的討論會，關係教會諸問題，佮主日學的問題。其餘猶有幾若項的科目愛研究，穩當有真大的幫贊。