傳教師會
Thoân-kàu-su-hoē
文獻資訊
| 項目 | 資料 |
|---|---|
| 作者 | 編輯部 Phian-chip-pō͘͘ |
| 卷期 | 台灣教會公報 |
| 卷期 | 第592卷 |
| 日期 | 1934/7 |
| 頁數 | 19 |
白話字（原文數位化）
Thoân-kàu-su-hoē
(Phian-chhip-chiá)
- 7, no. 592, pp. 19
Koè-khì 4 goe̍h 24 ji̍t khí, nn̄g ji̍t kan, ū Ka Tiong Thoân-kàu-su-hoē chū-chi̍p tī Sin-hāng lé-pài-tn̂g. Hù-hoē-chiá: Pa Phok-sū í-goā, Bo̍k-su 7 miâ, Thoân-tō-su 11 miâ.
Ū tit-tio̍h Châi-bū-pō͘-tiúⁿ Tēⁿ Bo̍k-su, lâi kóng-khí Tiong-hoē lāi ê keng-chè, hō͘ tāi-ke saⁿ-kap chai, saⁿ-kap tam-tng hit ê chek-sêng. Ū Chû-siān-hoē chú-sū Ông oá Bo̍k-su kóng-khí Chû-siān-hoē ê sū, soà ài tāi-ke ū-soàn kin-nî kok kàu-hoē ê hiàn la̍p gia̍h. Ū thiaⁿ Lo̍k-moâ-sán kap Pùn-ki-ô͘ beh kái-tio̍k pài-tn̂g, thang hoaⁿ-hí ê sū, iā pài-thok chō͘-sêng. Ū kàu-io̍k-pō͘-tiúⁿ kóng-khí goe̍h-pò ê chéng-lí, kap tuì Chú ji̍t-o̍h ê koan-sim. Ū thoân-tō-pō͘-tiúⁿ hoat-piáu kin-nî ê Kau-thong-tuī, kap tuī-oân í-ki̍p tāi-kí thoân-tō ê tiā-chì, bián-lē tāi-ke tio̍h thoân, m̄-thang chēng-chēng. Ū tit-tio̍h N̂g Bú-tong Sian-siⁿ, kóng-khí i khì Tâi-tang lú-hêng ê só͘-kám, chhù-bī koh ū lī-ek.
Ū Sù-bū-pō͘-tiúⁿ Chhoà Bo̍k-su, kóng-khí Nî-pò ê chéng-lí, kap bēng-lēng Thoân-kàu-su ka-cho̍k, kap Hoē-oân-phō͘ tio̍h kià kai Sù-bū-pō͘. Ū tit-tio̍h só͘ thiàⁿ thang chun-kèng ê lāu sian-siⁿ Pa Phok sū lâi káng-ián “Tiúⁿ-ló-phài ê le̍k-sú” hō͘ tāi-ke thiaⁿ, put-chí ke-thiⁿ tì-sek kap kám-kek. Ū tit-tio̍h Sin-hāng Ki tok-kàu Chheng-liân-hoē ê chiau-thai, ēng ngó͘-sek-piáⁿ kap keng-chio, tê, lâi chhiáⁿ tāi-ke, kap tāi-ke hó kau-poê, chin ū chhù-bī.
Ū hoaⁿ-hí, an-uì, chhù-bī, kám-kek, bián-lē moá-moá ê Thoân-kàu-su-hoē, tī 25 ē-po͘ 3 tiám 15 hun, tāi-ke ēng thiàⁿ Chú kap ǹg-bāng ê cheng-sîn lâi pì-hoē. Ū gī-tēng āu-hoê ê Khún-tâm-hoē beh tī Bîn-hiông. Kî-ji̍t sī 6 goe̍h 26 ji̍t. ǹg-bāng tāi-ke thang koh saⁿ-kìⁿ bīn.
漢羅（Ùi原文改寫）
傳教師會
(編輯者)
1934.7，no.592，pp.19
過去4月24日起，兩日間，有嘉中傳教師會聚集佇Sin-hāng禮拜堂。赴會者：巴博士以外，牧師7名，傳道師11名。
有得著財務部長鄭牧師，來講起中會內的經濟，予大家相佮知，相佮擔當彼个責成。有慈善會主事王倚牧師講起慈善會的事，紲愛大家預算今年各教會的獻納額。有聽Lo̍k-moâ-sán佮畚箕湖欲改築拜堂，通歡喜的事，也拜託助成。有教育部長講起月報的整理，佮對主日學的關心。有傳道部長發表今年的交通隊，佮隊員以及大舉傳道的代誌，勉勵大家著傳，毋通靜靜。有得著黃武東先生，講起伊去台東旅行的所感，趣味閣有利益。
有事務部長蔡牧師，講起年報的整理，佮命令傳教師家族，佮會員簿著寄交事務部。有得著所疼通尊敬的老先生巴博士來講演「長老派的歷史」予大家聽，不止加添智識佮感激。有得著Sin-hāng基督教青年會的招待，用五色餅佮芎蕉，茶，來請大家，佮大家好交陪，真有趣味。
有歡喜，安慰，趣味，感激，勉勵滿滿的傳教師會，佇25下晡3點15分，大家用疼主佮向望的精神來閉會。有議定後回的懇談會欲佇民雄。期日是6月26日。向望大家通閣相見面。