傳教師娘修養會的期待
Thoân-kàu-su-niû Siu-ióng-hoē ê Kî-thāi
文獻資訊
| 項目 | 資料 |
|---|---|
| 作者 | 希望生 Hi-bōng-seng |
| 卷期 | 台灣教會公報 |
| 卷期 | 第592卷 |
| 日期 | 1934/7 |
| 頁數 | 5-6 |
白話字（原文數位化）
Thoân-kàu-su-niû Siu-ióng-hoē ê Kî-thāi
(Hi-bōng-seng)
- 7, no. 592, pp. 5-6
Thoân-kàu-su-niû Siu-ióng-hoē beh kàu, káⁿ-sī 7 goe̍h 4 hō lah. Chèng ia̍h-oân ún-tàng chin bô êng, teh chún-pī. Goá sìn, ún-tàng ū pī-pān chin hong-sēng oa̍h-miā ê hó-mi̍h; sî kàu, thang chhin-chhiūⁿ chin gâu ê to͘-chí liāu-lí chin bí-bī sēng-tāi ê go-chí-só (chheⁿ-chhau). Phah-sǹg káⁿ m̄-nā tī tû-pâng lāi teh chún-pī nā-tiāⁿ, iā ū teh tiau-cha khoàⁿ sī iù-siù lâng-kheh á-sī chháu-tē lâng-kheh, sī beh hō͘ lâng chia̍h pá--ê, á-sī beh chia̍h khá--ê; nā án-ni, chiū siū-chhiáⁿ ê lâng-kheh, m̄-nā beh o-ló chheⁿ-chhau, iā beh o-ló hó chia̍h, in-uī hō͘ in iā pá, iā khá.
Lūn chit khoán Siu-ióng-hoē, khiok beh ta̍k hāng lóng ha̍h ta̍k lâng ê khiàm-khoeh, si̍t-chāi sī oh, in-uī chiah ê thoân-kàu-su-niû ê nî-hoè bô pêⁿ, ha̍k-le̍k ū koân-kē, keng-giām ū chē-chió, khoân-kéng ū hó-bái; só͘-í in ta̍k lâng só͘ khiàm--ê ū koh-iūⁿ. Chóng-sī iā ū kiōng-thong-tiám, chiū-sī in ê ho͘-khip; sī in ê chia̍h-pn̄g, kî-tó sī in ê ho͘-khip; tuì che, in eng-kai chò chi̍t-ê oa̍h-oa̍h ê Ki-tok-tô͘, ū goân-khì ê thoân-kàu-su-niû. Hit ê hi-bōng sī sím-mi̍h ah?
-
Beh án-choáⁿ hō͘ in bêng tiōng-hu ê bo̍k-phiau, soà tâng-sim hia̍p-le̍k tī Siōng-tè só͘ kau-tāi ê sù-bēng.
-
Thoân-kàu-ka hu-hū tio̍h àn-choáⁿ lâi chò hô-hó ê sū.
-
Tuì kiáⁿ-jî tio̍h án-choáⁿ lâi kàu-tok.
-
Tuì keng-chè, tio̍h án-choáⁿ tâng-tiⁿ tâng-khó͘; bô hu-êng lōng-huì, iā bô tàng-sng chò chîⁿ-lô͘.
-
Tio̍h àn-choáⁿ lâi chō-chiū sìn-gióng ê ka-têng, bô͘-hoān ê jîn-keh.
-
Tuì hoē-iú èng-chiap ê thài-tō͘.
-
Tuì ka-têng lâi-goā ê chéng-lí.
Chit ê Siu-ióng-hoē káⁿ-sī tuì Thoân-kàu-su-hoē the̍h-chhut--ê, hoat-khí ê lâng káⁿ ū só͘ kám, chiū-sī thoân-kàu-su ta̍k-nî to ū hoē; chi̍t nî toā-hoē, chi̍t nî sió-hoē. Toā-hoē chiū-sī thong Lâm-pō͘ á-sī choân Tó, sió-hoē chiū-sī kok Tiong-hoē. Moé-pái chū-hoē, lóng ū káng-su lâi hùn-heng kap siu-ióng, chē-chē lâng siū kám, tit-tio̍h jia̍t-jia̍t ê sim-chì, hi-seng ê cheng-sîn, li̍p-chì tò-khì beh àn-choáⁿ hōng-sū kàu-hoē. Chi̍t-ē kàu chhù, tú-tio̍h o͘-hûn bi̍t-pò͘, chhè-luî khihN8-khehN-háu, chhiⁿ-léng ê liâng-hong kap chhiⁿ-kông ê sai-pak-hō͘ chò chi̍t-ē-kàu, kui seng-khu ak kàu tâm-lok-lok, soà khí ka-iam koâⁿ, só͘ toà tò-lâi ê jia̍t-jia̍t ê sim-chì kap hi-seng cheng-sîn, soà ak kàu iûⁿ-iûⁿ--khì. Gû put-lūn lí joā ióng, nā chhia-sim tn̄g--khì, ná tioh, sī ná hāi; só͘-í gû tio̍h ióng, chhia iā tio̍h bô kò͘-chiòng.
Tú tī chit ê lāu-bú kì-liām lé-pài (5: 13), teh pī-pān tō-lí, it-hoat su-liām. Hó ê lāu-bú ah!! lí toà tī toh-uī? goá chin ài kìⁿ lí ê bīn, thiaⁿ lí ê siaⁿ, goá sī lí ê kiáⁿ, koh-khah khak-chhiat ài chhoē lí, chhiáⁿ lí chhun-chhut lí chú-ài ê bīn hō͘ goán khoàⁿ, ēng lí chheng-siu ê ba̍k-chiu kā goán khoàⁿ chi̍t-ē, chiū goán ê sim beh loā-nih sóng-khoài ah!
Thoân-kàu-su-niû ah! lí si̍t-chāi sī chi̍t ê bô͘-hoān-tek ê hiân-chhe, lí ê tiōng-hu hoaⁿ-hí lí iâⁿ-koè pó-chio̍h, oá-khò lí sū-sū an-sim.
Thoân-kàu-su-niû ah! lí si̍t-chāi siy7 chi̍t ê bô͘-hoān-tek ê liông-bú, lí ê kiáⁿ-jî oá-khò lí chò pn̄g-khaⁿ, chò chhng-khò͘, chò kàu-su, ē-thang khiā tī siā-hoē chò jîn-keh-chiá.
漢羅（Ùi原文改寫）
傳教師娘修養會的期待
(希望生)
1934.7，no.592，pp.5-6
傳教師娘修養會欲到，敢是7月4號啦。眾役員穩當真無閒，teh準備。我信，穩當有備辦真豐盛活命的好物；時到，通親像真gâu的廚子料理真美味盛大的go-chí-só (生臊)。拍算敢毋若佇廚房內teh準備若定，也有teh調查看是幼秀人客抑是草地人客，是欲予人食飽--的，抑是欲食巧--的；若按呢，就受請的人客，毋若欲呵咾生臊，也欲呵咾好食，因為予in也飽，也巧。
論這款修養會，卻欲逐項攏合逐人的欠缺，實在是僫，因為遮的傳教師娘的年歲無平，學歷有高低，經驗有濟少，環境有好bái；所以in逐人所欠--的有各樣。總是也有共通點，就是in的呼吸；是in的食飯，祈禱是in的呼吸；對這，in應該做一个活活的基督徒，有元氣的傳教師娘。彼个希望是甚物啊？
-
欲按怎予in明丈夫的目標，紲同心協力佇上帝所交代的使命。
-
傳教家夫婦著按怎來做和好的事。
-
對囝兒著按怎來教督。
-
對經濟，著按怎同甜同苦；無虛榮浪費，也無凍霜做錢奴。
-
著按怎來造就信仰的家庭，模範的人格。
-
對會友應接的態度。
-
對家庭內外的整理。
這个修養會敢是對傳教師會提出--的，發起的人敢有所感，就是傳教師逐年都有會；一年大會，一年小會。大會就是通南部抑是全島，小會就是各中會。每擺聚會，攏有講師來奮興佮修養，濟濟人受感，得著熱熱的心志，犧牲的精神，立志倒去欲按怎奉仕教會。一下到厝，拄著烏雲密佈，脆雷khihN8-khehN哮，生冷的涼風佮生狂的西北雨做一下到，規身軀沃到澹漉漉，紲起加陰寒，所帶倒來的熱熱的心志佮犧牲精神，紲沃到溶溶--去。牛不論你偌勇，若車心斷--去，若擢，是若害；所以牛著勇，車也著無故障。
拄佇這个老母紀念禮拜(5：13)，teh備辦道理，益發思念。好的老母啊！！你蹛佇佗位？我真愛見你的面，聽你的聲，我是你的囝，閣較確切愛揣你，請你伸出你慈愛的面予阮看，用你清秀的目睭共阮看一下，就阮的心欲偌呢爽快啊！
傳教師娘啊！你實在是一个模範的的賢妻，你的丈夫歡喜你贏過寶石，倚靠你事事安心。
傳教師娘啊！你實在是一个模範的的良母，你的囝兒倚靠你做飯坩，做倉庫，做教師，會通徛佇社會做人格者。