那久那知
Ná kú ná chai
文獻資訊
| 項目 | 資料 |
|---|---|
| 作者 | 偕叡廉 Kai Jōe-liâm |
| 卷期 | 台灣教會公報 |
| 卷期 | 第590卷 |
| 日期 | 1934/5 |
| 頁數 | 27 |
白話字（原文數位化）
Ná kú ná chai
(Kai Joē-liâm)
- 5, no. 590, pp. 27
Kū-iok Sèng-keng-lāi ū kì-chài choē-choē kó͘-chá ê tāi-chì, put-chí ū toā kan-sia̍p tī kó͘-chá ê le̍k-sú. Sèng-keng sī Siōng-tè só͘ khé-sī--ê, só͘-í só͘ kì-chài--ê sī si̍t-chāi. Khó-sioh sè-kan lâng ê sim-koaⁿ siông-siông ài khǹg giâu-gî, tì-kàu tuì ka-kī ê m̄-bat, suî-piān ài phoe-phêng.
Chhin-chhiūⁿ Kū-iok Sèng-keng-lāi ū kóng-khí chāi-chá A-su̍t kok, ū chhut chi̍t ê hông-tè miâ-kiò Sat-kun. I ê hôn-thài-chú miâ-kiò Se-ná-ki-li̍p. Bô ài sìn Sèng-keng ê lâng kóng, bô-iáⁿ ū hông-tè miâ-kiò Sat-kun, in-uī Sèng-keng í-goā m̄-bat thiaⁿ-tio̍h i ê miâ. Kó͘-chá ê le̍k-sú iā bô kóng-khí i ê tāi-chì. Che sī Sèng-keng siá m̄-tio̍h.
Chóng-sī āu-lâi ū chhē-tio̍h Sat-kun ông só͘ khí, chin suí, chin kian-kò͘ ê ông-kiong hoat-kiàn-tio̍h--ê. Tī-hia ū chhē-tio̍h chi̍t tè chng-á, pí lâng ê chhiú-toé ke toā bô loā-choē. Tī chng-á ê téng-bīn ū siá 95 ê hông-tè ê miâ, kap in só͘ chē-uī ê nî-kō, tiong-kan iā ū Sat-kun ông kap i ê hông-thài-chú, Se-ná-ki-li̍p ê miâ tī-teh. Thâu-chi̍t ê hông-tè chē-uī, chiū-sī 4300 nî chêng. Pún-jiân lâng phah-sǹg A-su̍t kok ê le̍k-sú bô hiah chá, taⁿ chai A-su̍t ê le̍k-sú kap Tiong-kok chha-put-to pîⁿ chá.
Í-keng kóng, téng-bīn hit tè chng-á sī tī Sat-kun ông ê ông-kiong chhē-tio̍h, lī Nî-nî-bî siâⁿ iok-lio̍k 5 phò͘-lō͘. Sui-jiân chit tè chng-á sī soè-soè, nā-sī tuì le̍k-sú-siōng lâi kā i khoàⁿ, sī chin iàu-kín, in-uī só͘ siá ê jī ū chèng-bêng kó͘-chá si̍t-chāi ū chi̍t ê Sat-kun ông. Sèng-keng só͘ kì-chài ê sī tio̍h.
漢羅（Ùi原文改寫）
那久那知
(偕叡廉)
1934.5，no.590，pp.27
舊約聖經內有記載濟濟古早的代誌，不止有大干涉佇古早的歷史。聖經是上帝所啟示--的，所以所記載--的是實在。可惜世間人的心肝常常愛囥僥疑，致到對家己的毋捌，隨便愛批評。
親像舊約聖經內有講起在早亞述國，有出一个皇帝名叫Sat-kun。伊的皇太子名叫Se-ná-ki-li̍p。無愛信聖經的人講，無影有皇帝名叫Sat-kun，因為聖經以外毋捌聽著伊的名。古早的歷史也無講起伊的代誌。這是聖經寫毋著。
總是後來有揣著Sat-kun王所起，真媠，真堅固的王宮發見著--的。佇遐有揣著一塊磚仔，比人的手底加大無偌濟。佇磚仔的頂面有寫95的皇帝的名，佮in所坐位的年號，中間也有Sat-kun王佮伊的皇太仔，Se-ná-ki-li̍p的名佇teh。頭一的皇帝坐位，就是4300年前。本然人拍算亞述國的歷史無赫早，今知亞述的歷史佮中國差不多平早。
已經講，頂面彼塊磚是佇Sat-kun王的王宮揣著，離尼尼微城約略5鋪路。雖然這塊磚仔是細細，若是對歷史上來共伊看，是真要緊，因為所寫的字有證明古早實在有一個Sat-kun王。聖經所記載的是著。