聖經
Sèng-keng
文獻資訊
| 項目 | 資料 |
|---|---|
| 作者 | 陳金然 Tân Kim-jiân |
| 卷期 | 台灣教會公報 |
| 卷期 | 第590卷 |
| 日期 | 1934/5 |
| 頁數 | 10 |
白話字（原文數位化）
Sèng-keng
1934.05 590 koàn p.10
(Tân Kim-jiân)
Lūn kin-á-ji̍t ê Sèng-keng, ū Sin-iok, Kū-iok , chóng chheng kiò-chò Sèng-keng. Chit nn̄g jī “Sèng-keng,” tāi-khài sī tuì Eng-gú ê “The Bible” á-sī “Holy Scripture” hoan-e̍k--ê.
Chóng-sī “Bible” sī tuì Hi-lī-nî oē “Ta Biblia” (chheh) the̍h lâi ēng; nā-sī ēng chit kù chò Sèng-keng ê ì-sù, sī ēng tī Kū-iok goā-tián Ben Sirach tì-huī ê chheh ê thâu-sū--nih chò tē-it chá. Kàu Kū Sin-iok ha̍p chò chi̍t pún ê sî, iā iû-goân sī án-ni teh ēng. Chit kù sui-jiân bē thang cha̍p-hun piáu-bêng Sèng-chheh ê ì-sù, iáu-kú kî-si̍t “Bible” tī kin-á-ji̍t sī chiâⁿ-chò “Chheh tiong ê chheh” lah!
“Holy Scripture” sī Hi-lī-nî oē ê “Hogia Grapha,” tú-tú sī Sèng-keng ê ì-sù, chhiáⁿ khoàⁿ Thài 22:29; Khó 12:24; Hān 2:22; Hēng-toān 1:16; Lô 1:2; I Lîm 15:3; Ka 2:8; I Thê 5:18; II Thê 3:16; Kok 2:8; I Pí 1:20, soà pí-kàu Tān 9:2. Kî-thaⁿ tī lán ê Sèng-keng--nih, ū ēng pa̍t ê miâ, teh piáu-bêng Sèng-keng ê ì-sù, chhin-chhiūⁿ kóng “Mô͘-se ê lu̍t-hoat kap hiah-ê sian-ti, í-ki̍p Si-phian” (Lō͘ 24:44), á-sī kan-ta kóng, “Lu̍t-hoat” (Hān 10:34, 12:34, 15:25; I Lîm 14:21). Tuì chiah ê lâi khoàⁿ, tāi-khài sī teh chí Kū-iok.
Taⁿ “Iok”--jī, chiū-sī Hi-lī-nî oē ê “uî-bēng” (Lâi 9:16) ê ì-sù, chóng-sī Kū-iok 70 lâng e̍k (LXX) kap Sin-iok, ū ēng chò “Khè-iok” ê ì-sù. Kàu-hoē ê ēng-gú chiām-chiām teh oāⁿ-chò Lia̍p-teng-oē ê sî, chū-jiân ài hoan-e̍k Hi-lī-nî-oē chò Lia̍p-teng-gú, hit ê gâu chò oē lâi kòng-hiàn chò Ki-tok-kàu iōng-gú ê Tertullian, ū ēng nn̄g kù oē lâi e̍k chit jī “uî-bēng,” chiū-sī “instrumentum” kap “Testamentum.” Chóng-sī tī put-ti-put-kak ê tiong-kan, instrumentum soà bô lâng ēng, chí-ū teh ēng “Testamentum.”
Chit jī “Iok,” khí-thâu sī tuì Siōng-tè ê hong-bīn lâi khoàⁿ ê ì-sù, chiū-sī Siōng-tè èng-ún A-pek-lia̍p-hán soà-kàu Í-sek-lia̍t bîn-cho̍k ê “Iok” (Chhòng 15:10-21, 17:2-14; Chhut 24:7; Sin 9:9) nā-sī che sī kū ê iok. Chóng-sī lán taⁿ ū khah hó ê iok, sī sin--ê, tuì lán ê Chú Iâ-so͘ lâu hoeh lâi siat-li̍p--ê. án-ni lán tuì Iâ-so͘ í-keng tû-khì phè, chiū thang chù-ba̍k lâi khoàⁿ, bián koh hō͘ phè só͘ jia-khàm; chêng ê lâng sim pìⁿ-chò ngē, só͘-í tha̍k Kū-iok ê sî, phè iû-goân tī-teh, nā-sī lán tuì Ki-tok chiū hoè--khì (II Lîm 3:13-16). Só͘-í lán beh tha̍k Kū-iok, taⁿ m̄-thang koh tà phè lâi tha̍k lah! In-uī phè to í-keng tû-khì lah! (āu-hō beh koh chiap-soà).
漢羅（Ùi原文改寫）
聖經
1934.05 590卷 p.10
(陳金然)
論今仔日的聖經，有新約，舊約，總稱叫做聖經。這兩字 「聖經，」大概是對英語的 「The Bible」抑是「Holy Scripture」翻譯--的。
總是「Bible」是對希利尼話 「Ta Biblia」(冊)提來用；但是用這句做聖經的意思，是用佇舊約外典Ben Sirach智慧的冊的頭序--裡做第一早。到舊新約合做一本的時，也猶原是按呢咧用。這句雖然袂通十分表明聖冊的意思，猶過其實「Bible」佇今仔日是成做「冊中的冊」啦！
「Holy Scripture」是希利尼話的 「Hogia Grapha，」拄拄是聖經的意思，請看太22：29；可12：24；翰2：22；行傳1：16；羅1：2；I林15：3；加2：8；I提5：18；II提3：16；各2：8；I彼1：20，紲比較但9：2。其他佇咱的聖經裡，有用別的名，咧表明聖經的意思，親像講「摩西的律法佮遐的先知，以及詩篇」(路24：44)，抑是干焦講，「律法」(翰10：34，12：34，15：25；I林14：21)。對遮的來看，大概是咧指舊約。
Taⁿ 「約」--字，就是希利尼話的 「遺命」(來9：16)的意思，總是舊約70人譯 (LXX)佮新約，有用做「契約」的意思。教會的用語漸漸咧換做拉丁話的時，自然愛翻譯希利尼話做拉丁語，彼个gâu做話來貢獻做基督教用語的 Tertullian，有用兩句話來譯這字 「遺命，」就是「instrumentum」佮「Testamentum。」總是佇不知不覺的中間，instrumentum紲無人用，只有咧用「Testamentum。」
這字 「約，」起頭是對上帝的方面來看的意思，就是上帝應允亞伯拉罕紲到以色列民族的 「約」(創15：10-21，17：2-14；出24：7；申9：9)若是這是舊的約。總是咱taⁿ有較好的約，是新--的，對咱的主耶穌流血來設立--的。按呢咱對耶穌已經除去帕，就通注目來看，免閣予帕所遮蓋；前的人心變做硬，所以讀舊約的時，帕猶原佇咧，若是咱對基督就廢--去(II林3：13-16)。所以咱欲讀舊約，taⁿ毋通閣罩帕來讀啦！因為帕都已經除去啦！(後號欲閣接紲)。