基督教的貧富觀

Ki-tok-kàu ê Pîn-hù koan

文獻資訊

項目	資料
作者	鄧uî-chèng Tēng uî-chèng
卷期	台灣教會公報
卷期	第588卷
日期	1934/3
頁數	7

白話字（原文數位化）

Ki-tok-kàu ê Pîn-hù Koan

(Tēng uî-chèng)

1. 3, no. 588, pp. 7

Sè-kan lâng só͘ teh kóng ê Pîn-hù, sī sio̍k tī sè-kan ê bu̍t-chit ê chóng chheng-ho͘. Só͘-í sè-kan lâng bô lūn pîn-hù, tuì chit ê bu̍t-chit koan-liām sim put-chí tāng, tuì-tiōng chhin-chhiūⁿ lâng tē-it iàu-kín ê sèⁿ-miā kin chi̍t-poaⁿ-iūⁿ. m̄-nā sī kò-jîn, chiū ka-têng, siā-hoē, kok-ka koh-khah sī án-ni, bô lūn beh chò sím-mi̍h iā sī chîⁿ chò tē-it ū si̍t-le̍k. Lâng-lâng uī-tio̍h chit ê bu̍t-chit tì-kàu cheng-lī, toa̍t-koân, jîn-bēng sòng-sit, siⁿ-chhut chhám-tām ê sū iā bē chió. Lâng nā kiû hó-gia̍h kàu m̄-chai pá, chiū jîn-chêng gī-lí iā bô teh siūⁿ, tì-kàu ēng put-chèng-tong ê chhiú-toāⁿ siⁿ-chhut tâu-ki sū-gia̍p, siū-iū sū-kiāⁿ, chà-khi, chhú-châi, kî-thaⁿ chióng-chióng sī án-ni ê goân-in lah! Sio̍k-gú kóng, “Kim-chîⁿ sī sè-kan lâng ê tuì-te̍k”, si̍t-chāi sī ū ha̍h tī kin-á-ji̍t ê hiān-chong lah! Kin-á-ji̍t ê sî-sè kàu chit khoán, m̄-chai beh ēng sím-mi̍h hoat-tō͘ lâi kái-koat chit-khoán ê su-tiau ho͘N3? Lán Ki-tok-kàu ê sìn-tô͘ tio̍h m̄-thang kap sè-sio̍k siāng khoán, tī chia goá ài siá kuí-nā hāng, sī goá só͘ sìn--ê.

1. Tio̍h ū kám-siā ê sim: Siōng-tè kóng, Thiⁿ, tē, hái, bān-hāng-mi̍h sio̍k tī ē chia̍h-tit kap bē chia̍h-tit-ê, lóng sī I chhòng-chō. Lán sè-kan lâng tuì chhiah-thé chhut-sì í-lâi, lóng bô toà poàⁿ-hāng lâi, chiū ū ta̍k-hāng-mi̍h kàu-gia̍h piān, kiaⁿ lán koâⁿ, kiaⁿ lán iau, bô hō͘ lán ū só͘ khiàm-khoeh ê só͘-chāi. Kàu lán tì-huī khuì-la̍t chiok ê sî, lán tio̍h chīn jîn-seng ê gī-bū lâi hióng-siū I só͘ siúⁿ-sù-ê, bô lūn sàn á-sī hó-gia̍h, tī ta̍k-sî lán ēng I ê mi̍h, soà ài kám-siā Siōng-tè ê in-tián kap thiàⁿ-thàng lah!

2. Tio̍h ài siān-iōng: Tuì Siōng-tè siúⁿ-sù lán ta̍k-hāng bô lūn chē-chió, lán m̄-thang lia̍h chò chho͘-sio̍k, tio̍h siān-iōng tī ū lī-ek lâng--ê. Chhin-chhiūⁿ pa̍t kàu-phài ê hoê-siūⁿ ān beh chò sian tio̍h khì chhim-soaⁿ lāi, tī hia siu-heng bô chhap sè-kan ê sū.

iā ū lâng siūⁿ kóng, beh chò hó-tāi chiū ēng put-chèng ê chhiú-oán lâi hó-gia̍h, jiân-āu chiah lâi chò hó-tāi, hit-khoán ê lâng Siōng-tè ún-tàng bô hoaⁿ-hí. Lán tio̍h o̍h chá-sî chi̍t ê koáⁿ-hū, chiong i só͘ ū nn̄g-lî poàⁿ chîⁿ kam-sim hiàn chò hó sū, hit khoán ê lâng ún-tàng Siōng-tè hoaⁿ-hí. Lán kàu-hoē lāi ún-tàng Siōng-tè hoaⁿ-hí. Lán kàu-hoē lāi ún-tàng bô ū chi̍t lâng chhin-chhiūⁿ hit ê hū-jîn-lâng hiah sàn.

Lán tī Siōng-tè ê in-tián ē, tio̍h chiong Siōng-tè ê mi̍h la̍p hō͘ Siōng-tè. ǹg-bāng tī lán Tâi-oân Siat-kàu chhit-cha̍p chiu-nî só͘ beh chò ê chû-siān sū-gia̍p, ta̍k lâng kam-sim, chhut-la̍t uī-tio̍h Thian-kok kiù-lêng sio̍k-choē ê sū-gia̍p lâi hiàn, Siōng-tè ún-tàng ēng ka-poē ê chiok-hok tī lán. A-bēng.

漢羅（Ùi原文改寫）

基督教的貧富觀

(鄧uî-chèng)

1934.3，no.588，pp.7

世間人所teh講的貧富，是屬佇世間的物質的總稱呼。所以世間人無論貧富，對這个物質觀念心不止重，對重親像人第一要緊的性命根一般樣。毋若是個人，就家庭，社會，國家閣較是按呢，無論欲做甚物也是錢做第一有實力。人人為著這个物質致到爭利，奪權，人命喪失，生出慘淡的事也袂少。人若求好額到毋知飽，就人情義理也無teh想，致到用不正當的手段生出投機事業，受賄事件，詐欺，取財，其他種種是按呢的原因lah！俗語講，「金錢是世間人的對敵」，實在是有合佇今仔日的現狀lah！今仔日的時勢到這款，毋知欲用甚物法度來解決這款的su-tiau好？咱基督教的信徒著毋通佮世俗像款，佇遮我愛寫幾若項，是我所信--的。

1. 著有感謝的心：上帝講，天，地，海，萬項物屬佇會食得佮袂食得的，攏是伊創造。咱世間人對赤體出世以來，攏無蹛半項來，就有逐項物夠額便，驚咱寒，驚咱iau，無予咱有所欠缺的所在。到咱智慧氣力足的時，咱著盡人生的義務來享受伊所賞賜的，無論散抑是好額，佇逐時咱用伊的物，紲愛感謝上帝的恩典佮疼痛lah！

2. 著愛善用：對上帝賞賜咱逐項無論濟少，咱毋通掠做粗俗，著善用佇有利益人--的。親像別教派的和尚若欲做仙著去深山內，佇遐修行無插世間的事。

也有人想講，欲做好代就用不正的手腕來好額，然後才來做好代，彼款的人上帝穩當無歡喜。咱著學早時一个寡婦，將伊所有兩釐半錢甘心獻做好事，彼款的人穩當上帝歡喜。咱教會內穩當上帝歡喜。咱教會內穩當無有一人親像彼个婦人人赫散。

咱佇上帝的恩典會，著將上帝的物納予上帝。向望佇咱台灣設教七十週年所欲做的慈善事業，逐人甘心，出力為著天國救靈贖罪的事業來獻，上帝穩當用加倍的祝福佇咱。A-bēng。