讀聖經
Tha̍k Sèng-keng
文獻資訊
| 項目 | 資料 |
|---|---|
| 作者 | 林照 Lîm Chiàu |
| 卷期 | 台灣教會公報 |
| 卷期 | 第587卷 |
| 日期 | 1934/2 |
| 頁數 | 4 |
白話字（原文數位化）
Tha̍k Sèng-keng
(Lîm Chiàu)
- 2, no. 587, pp. 4
Sèng-keng kan-chèng Iâ-so͘ sī Ki-tok, sī Kiù-chú (Hēng 18:28; Hān 5:39).
Chiū-sī kiù lâng lêng-hûn, hō͘ lâng têng-thâu-siⁿ ê tō-lí (Ngá 1:21; 1 Pí 1:23). Só͘-í kìⁿ-nā ài tit-tio̍h kiù kap sin-seng-bēng ê lâng, tio̍h tha̍k Sèng-keng.
Sèng-keng sī lán oa̍h-miā ê bí-niû (Thài 4:4), chu-ióng ê iàu-sò͘ (1 Pí 2:2); só͘-í ài oa̍h-miā hoa̍t-phoat tióng-toā--ê, tio̍h tha̍k Sèng-keng.
Sèng-keng sī hō͘ lâng hó phín-hēng, jîn-keh oân-choân (II Thê 3:16, 17); só͘-í ài ū jîn-keh koân ê lâng, tio̍h tha̍k Sèng-keng.
Sèng-keng sī lán kha-chêng ê teng, lō͘-ni̍h ê kng (Si-phian 119:105); só͘-í beh tī che o͘-àm ê sè-kan bô poa̍h-tó--ê, tio̍h tha̍k Sèng-keng.
Sèng-keng sī lán thâi tuì-te̍k ê pó-kiàm (Hut 6:17), só͘-í beh thâi-iâⁿ mô͘-kuí--ê, tio̍h tha̍k Sèng-keng.
Sèng-keng sī lán lú-sè ê kiông-sim-che, uì-an-che (Lô 15:5; II Lîm 12:9), só͘-í kìⁿ-nā sim kan-khó͘, sit-chì, ài tit-tio̍h an-uì ê lâng, tio̍h tha̍k Sèng-keng.
Sèng-keng sī sé sim-lêng ê sîn-chuí (Hut 5:26), só͘-í ài Sèng-kiat chheng-khì sim ê lâng, tio̍h tha̍k Sèng-keng.
Chóng kóng chi̍t kù, Sèng-keng sī Siōng-tè tuì lâng só͘ kóng ê oē (II Pí 1:21; II Bó 23:2), tuì lâng hián-hiān, tuì lâng si in, chhián-bêng koè-khì, hiān-chāi, boē-lâi ê tō-lí; só͘-í lâng-lâng tio̍h tha̍k Sèng-keng (Chim 2:1, 1, 2, 5, 6); tio̍h sàm-su Sèng-keng (Si-phian 1:2; Sin 11:18, 20)
(1933 nî 11 goe̍h 15 tâu-kó).
漢羅（Ùi原文改寫）
讀聖經
(林照)
1934.2，no.587，pp.4
聖經干證耶穌是基督，是救主(行 18：28；翰 5：39)。
就是救人靈魂，予人重頭生的道理(雅 1：21；1比1：23)。所以見若愛得著救佮新生命的人，著讀聖經。
聖經是咱活命的米糧(太4：4)，滋養的要素(1比2：2)；所以愛活命活潑長大--的，著讀聖經。
聖經是予人好品行，人格完全(II提3：16，17)；所以愛有人格懸的人，著讀聖經。
聖經是咱腳前的燈，路裡的光(詩篇119：105)；所以欲佇這烏暗的世間無跋倒--的，著讀聖經。
聖經是咱刣對敵的寶劍(弗6：17)，所以欲刣贏魔鬼--的，著讀聖經。
聖經是咱lú-sè的強心劑，慰安劑(羅 15：5；II林 12：9)，所以見若心艱苦，失志，愛得著安慰的人，著讀聖經。
聖經是洗心靈的神水(弗 5：26)，所以愛聖潔清氣心的人，著讀聖經。
總講一句，聖經是上帝對人所講的話(II比1：21；II母23：2)，對人顯現，對人施恩，闡明過去，現在，袂來的道理；所以人人著讀聖經(箴2：1，1，2，5，6)；著三思聖經(詩篇1：2；申11：18，20)
(1933年11月15投稿)。