草墩青年會一週年會紀念歌
Chháu-tun Chheng-liân-hoē it chiu-nî Kì-liām Koa
文獻資訊
| 項目 | 資料 |
|---|---|
| 作者 | 賴江 Loā Kang |
| 卷期 | 台灣教會公報 |
| 卷期 | 第586卷 |
| 日期 | 1934/1 |
| 頁數 | 16 |
白話字（原文數位化）
Chháu-tun Chheng-liân-hoē it chiu-nî Kì-liām Koa
Loā Kang kì
1934.01, no. 586, pp. 16
Ⅰ. Lông-chhoan Pò͘-tō-hoē
Chháu-tun chheng-liân chiòng hoē-oân,
Chi̍t-chiu kì-liām toā soan-thoân;
Pún-chng só͘ ū ê koán-lāi,
Beh thoân tō-lí hông chiâu-chai.
ài thàn Kiù-chú ê hoan-hù,
Soan-pò tō-lí ta̍k uī ū;
Hoē-tiúⁿ chiū-sī Hoé-thó͘ sàng,
Put-chí kam-goān hi-seng kang.
Bo̍k-su Tióng-chip iā chhut-tīn,
Pò-thoân tō-lí chin jīn-chin;
Ū kàu ta̍k chng khì káng-ián,
Soan-thoân hok-im bô hiâm siān.
Káng-oân ū-sî cha̍p-sò͘ miâ,
Kòng-lô kiò lâng tio̍h lâi thiaⁿ;
Hoē-tiúⁿ sī chò su-hoē-chiá,
Hoē-oân chéng-chí ti̍t-ti̍t iā.
Thèng-chiòng ta̍k àm ū káng pah,
Káng-oân chi̍t lâng káng chi̍t pha;
Ū-sî hoē-tiûⁿ lâng siat-pī,
Hō͘ goán teh káng chin sù-sī.
Sui-jiân sin-sū oá-lâi thiaⁿ,
Goán iā ti̍t kóng lóng bô kiaⁿ;
Pâi-thek bê-sìn put-chí kiâm,
Tāi-ke to iā sī bô hiâm.
Khiā kàu poàⁿ-mê ài koh thiaⁿ,
Kóng pí khoàⁿ hì iáu khah iâⁿ;
Ū-sî thio̍h khì phò͘-goā lō͘,
Káng-oân hun chò nn̄g-saⁿ cho͘.
Sui ū soaⁿ-niá ê kan-khó͘,
Bô hiâm pháiⁿ kiâⁿ ê lō͘-tô͘;
Ta̍k chng kàu-hoà ê uí-oân,
Kiò goán khì in hia soan-toân.
Kiò in bê-sìn tio̍h ài kái,
Ji̍p tī chin sìn chiàⁿ eng-kai;
Hi-bōng lia̍t-uī thè kî-tó,
Hō͘ goán só͘ chò ū hāu-kó.
Ⅱ. Pài-tn̂g Káng-ián-hoē
iū-koh ū khui toā káng-ián,
Te̍k phèng Phok-sū Lāu Tiong-kian;
Tiûⁿ-só͘ pún-chng lé-pài-tn̂g,
Liân-liáu ū káng nn̄g mê-hng.
Sui-jiân àm-thâu ū lo̍h-hō͘,
iáu-kú pài-tn̂g chē bô lō͘;
Phok-sū káng-ián ê tiong-sim,
Chiū-sī Ki-tok ê Hok-im.
Ta̍k àm só͘ káng siāng tê-ba̍k,
Thèng-chiòng thiaⁿ-liáu ū kám-kak;
Pún-tông bo̍k-su ê tāi-khài,
Kóng-bêng Siōng-tè sī jîn-ài.
Chèng-bêng Thiⁿ-pē toā thiàⁿ-thàng,
Put-chí thiàⁿ-sioh sè-kan lâng;
Jī àm sī káng “Ki bu̍t si̍t”,
Ki-hoē sit-lo̍h bē koh tit.
Lâng-lâng iàu-kín tio̍h hoán-hoé,
Lâi kap Siōng-tè saⁿ kau-poê.
Ⅲ. Im-ga̍k-hoē
Iú-chì ū khui im-ga̍k-hoē,
Beh kap siā-hoē saⁿ kau-poē.
uī-tio̍h hā-thiⁿ ū khah joa̍h,
Hō͘ lâng cheng-sîn khah khoàⁿ-oa̍h.
Hoē-tiûⁿ tī Chheng-liân-hoē-koán,
Koan-thèng chin-chē kàu boán-oân;
Chí-tō chiū-sī Chu-ài sàng,
Put-chí chhut-la̍t gâu ēng kang,
Só͘ kà chhut-thâu sī chin hó,
Hō͘ lâng khoàⁿ-liáu chin o-ló.
Chheng-liân ha̍k-seng iā chhut ián,
Sì-pō͘ ha̍p-chhiùⁿ ū koàn-liān ;
iā ū kǹg-khîm teh to̍k toâⁿ,
Hō͘ lâng thiaⁿ-liáu chheng sim-koaⁿ.
Goá kì pún-hoē ê kang-chok,
Nā ū m̄-hó chhiáⁿ tiong-khok,
Kî-kiû Siōng-tè lâi chiok-hok,
Kám-hoà chèng-lâng kui Ki-tok.
À-bēng.
漢羅（Ùi原文改寫）
草墩青年會一週年會紀念歌
賴江 記
1934.01, no. 586, pp. 16
Ⅰ. 農村佈道會
草墩青年眾會員，
一週紀念大宣傳；
本庄所有的館內，
欲傳道理奉齊知。
愛趁救主的吩咐，
宣報道理逐位有；
會長就是火土sàng，
不止甘願犧牲工。
牧師長執也出陣，
報傳道理真認真；
有夠逐庄去講演，
宣傳福音無嫌siān。
講員有時十數名，
摃鑼叫人著來聽；
會長是做司會者，
會員種子直直掖。
聽眾逐暗有講百，
講員一人講一pha；
有時會場人設備，
予阮teh講真舒適。
雖然紳士倚來聽，
阮也直講攏無驚；
排斥迷信不止鹹，
大家都也是無嫌。
徛到半暝愛閣聽，
講比看戲猶較贏；
有時著去鋪外路，
講員分做兩三組。
雖有山嶺的艱苦，
無嫌歹行的路途；
逐庄教化的委員，
叫阮去in遐宣傳。
叫in迷信著愛改，
入佇真信正應該；
希望列位替祈禱，
予阮所做有效果。
Ⅱ. 拜堂講演會
又閣有開大講演，
特聘博士劉忠堅；
場所本庄禮拜堂，
連了有講兩暝昏。
雖然暗頭有落雨，
猶久拜堂坐無路；
博士講演的中心，
就是基督的福音。
逐暗所講 siāng題目，
聽眾聽了有感覺；
本堂牧師的既概，
講明上帝是仁愛。
證明天父大疼痛，
不止疼惜世間人；
二暗是講”機不失”，
機會失落bē 閣得。
人人要緊著反悔，
來佮上帝相交陪。
Ⅲ. 音樂會
有志有開音樂會，
欲佮社會相交陪。
為著夏天有較熱，
予人精神較看活。
會場佇青年會館，
觀聽真濟到滿員；
指導就是珠愛sàng，
不止出力gâu用功，
所教出頭是真好，
予人看了真呵咾。
青年學生也出演，
四部合唱有慣練；
也有鋼琴teh獨彈，
予人聽了清心肝。
我記本會的工作，
若有毋好請tiong-khok，
祈求上帝來祝福，
感化眾人歸基督。
阿門。