聖經做中心
Sèng-keng choè tiong-sim
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會公報 |
| 卷期 | 第586卷 |
| 日期 | 1934/1 |
| 頁數 | 26 |
白話字（原文數位化）
Sèng-keng choè tiong-sim
1934.01 no. 586 p.26
KOÀ-CHHÀI-CHÍ Tē 96 Hō
Pak-pō͘ sū-bū
(Koa Siat-kai)
Sèng-keng sī Siōng-tè só͘ khé-sī--ê, chiū-sī Siōng-tè ê oē.
In-uī án-ni, só͘-í Sèng-keng sī poâⁿ-kè pa̍t téng-hō sè-kan ê chong-kàu ê keng-tián chin hn̄g.
Ki-tok-kàu chū-jiân sī tio̍h ēng Sèng-keng choè tiong-sim, Ki-tok-tô͘ chū-jiân sī tio̍h ēng Sèng-keng choè sìn-gióng ê phiau-chún. Che sī chū-jiân--ê.
M̄-kú sui-jiân sī kóng Ki-tok-kàu, sui-jiân sī kóng Ki-tok-tô͘, m̄-kú iā ū hit khoán bô ēng Sèng-keng choè tiong-sim, ēng lâng choè tiong-sim--ê. Só͘-í hit khoán m̄-sī chin ê Ki-tok-kàu, m̄-sī chin ê Ki-tok-tô͘ lah.
Lâng hiâm Thian-chú-kàu m̄-tio̍h, sī kóng in (Thian-chú-kàu) Sèng-keng í-goā ū koh ke-thiⁿ choē-choē hāng ê īⁿ-toan, khiàn-sńg. Só͘-í bô chiàu Sèng-keng, iā ke choē-choē khoán Sèng-keng í-goā ê sū tī-teh. In-uī án-ni, Thian-chú-kàu Sèng-keng í-goā ū ke-thiⁿ pa̍t-khoán ê iàu-só͘ tī-teh, só͘-í lán (Sin-kàu, Protestant) hiâm in m̄-tio̍h.
Nā-sī án-ni, tuì Sèng-keng lāi-bīn suî-piān the̍h hìⁿ-sak, bô ài tihN8, khàu choē-choē hāng khí--lâi, chit khoán mā-sī bô chiàu Sèng-keng, iû-goân sī m̄-tio̍h.
Nā-sī Thian-chú-kàu, á-sī pa̍t hō ê kàu-phài, Sèng-keng í-goā ū ke-thiⁿ pa̍t-hāng ê iàu-sò͘ tī-teh, sī m̄-tio̍h! Chiū bô-lūn sím-mi̍h phài, nā tuì Sèng-keng the̍h choē-chió ê iàu-sò͘ khí--lâi, kiám kuí-nā hāng khí--lâi, che iû-goân sī m̄-tio̍h.
Só͘-í thang chai chi̍t hāng, chiū-sī beh chai chin ké, tio̍h, m̄-tio̍h, chiàⁿ, siâ ê kàu-phài. Kàu-hoē, á-sī sìn-tô͘ ê phiau-chún sī khoàⁿ ū ēng Sèng-keng choè tiong-sim á-bô, chiong chit hāng thang choè chún-chîn. ǹg-bāng lán tāi-ke, bô ēng lán iú-hān ê tì-sek, sī hoaⁿ-hí kiû Sèng Sîn pang-chān lán liáu-kái Sèng-keng ê tō-lí, ēng Sèng-keng choè tiong-sim, chiū oē chiâⁿ-choè hó, tio̍h ê kàu-hoē, sìn-tô͘.
漢羅（Ùi原文改寫）
聖經做中心
(柯設偕)
1934.1，no.586，p.26
聖經是上帝所啟示--的，就是上帝的話。
因為按呢，所以聖經是盤過別等號世間的宗教的經典真hn̄g。
基督教自然是著用聖經做中心，基督徒自然是著用聖經做信仰的標準。這是自然--的。
毋kú雖然是講基督教，雖然是講基督徒，毋kú也有彼款無用聖經做中心，用人做中心--的。所以彼款毋是真的基督教，毋是真的基督徒lah。
人嫌天主教毋著，是講in (天主教)聖經以外有閣加添濟濟項的異端，khiàn損。所以無照聖經，也加濟濟款聖經以外的事佇teh。因為按呢，天主教聖經以外有加添別款的要素佇teh，所以咱(新教，Protestant)嫌in毋著。
若是按呢，對聖經內面隨便提hìⁿ-sak，無愛tihN8，扣濟濟項起來，這款嘛是無照聖經，猶原是毋著。
若是天主教，抑是別號的教派，聖經以外有加添別項的要素佇teh，是毋著！就無論甚物派，若對聖經提最少的要素起來，減幾若項起來，這猶原是毋著。
所以通知一項，就是欲知真假，著，毋著，正，邪的教派。教會，抑是信徒的標準是看有用聖經做中心抑無，將這項通做準繩。向望咱大家，無用咱有限的智識，是歡喜求聖神幫贊咱了解聖經的道理，用聖經做中心，就會成做好，著的教會，信徒。