盧An-ná過世
Lô͘ An-ná Kè-sì
文獻資訊
| 項目 | 資料 |
|---|---|
| 作者 | 柯設偕 Koa Siat-kai |
| 卷期 | 台灣教會公報 |
| 卷期 | 第586卷 |
| 日期 | 1934/1 |
| 頁數 | 28 |
白話字（原文數位化）
Lô͘ An-ná Kè-sì
1934.01 no. 586 p.28
KOÀ-CHHÀI-CHÍ Tē 96 Hō
Pak-pō͘ sū-bū
(Koa Siat-kai)
Lô͘ An-ná (Mrs. aⁿd Ross) tī pún-nî 9 ge̍h 6 ji̍t, ū siū Siōng-tè kéng-tiàu kè-sì, hióng-siū 85 hè. Lô͘ An-ná sī Kai Sian-sīⁿ-niû ê lāu-bú, iā tī bô kuí-nî chêng, tī 70 hè ê sî ū lâi Tâi-oân, tiàm tī i e cha-bó͘-kiáⁿ-chiū-sī Kai Sian-siⁿ-niû ê chhù, nî-poàⁿ kú, iā tī hit tiong-kan, i ū kàu-io̍k Soan-kàu-su ê kiáⁿ-jî, (sió-khoá chhin-chhiūⁿ ha̍k-hāu ê khoán).
Koh i ê chheh, ū chi̍t pún bat hoan-e̍k Pe̍h-oē-jī-chiū-sī Tân Lêng-thong Sian-siⁿ só͘ hoan-e̍k hit pún “Siōng-tè ê Chiàn-kah.” Só͘-í kap lán Tâi-oân ê Kàu-hoē ū iân-kò͘ tī-teh, ài siá tām-po̍h i ê toān.
Lô͘ An-ná, tī 1848 nî chhut-sì tī Eng-kok. Lāu-pē sìⁿ Tiong-kian, sī Bo̍k-su (Rev. J. Duncun), iā i sī tē-jī cha-bó͘-kiáⁿ. iā i 6 hè ê sî, in pē-bú ū poaⁿ-khì Ka-ná-tāi Ong-tiā-lī-o (Ontario) séng. iā i ê lāu-pē iû-goân choè Tiúⁿ-ló-hoē ê Bo̍k-su tī-hia.
Lô͘ An-ná ū chut-gia̍p oē-su-lé Lú-chú ko-téng ha̍k-īⁿ, iā chut-gia̍p liáu, soà siū kéng choè hit keng ê sian-siⁿ.
Tī 1874 nî, i ū kap Lô͘ Bo̍k-su (Rev. J. Ross) ha̍p-hun. iā i ê tiōng-hu tī 1887, ū siū Siōng-tè kéng-tiàu kè-sì, ū lâu 6 ê kiáⁿ-jî. I ê tiōng-hu kè-sin liáu-āu, i ū kà chheh tī Khu-lín-tùn (Clinton) ê ha̍k-hāu, iā āu-lâi ū choè To-lûn-to (Toronto) Lú Soan-kàu-su ióng-sêng ha̍k-hāu chho͘-tiā ê hāu-tiúⁿ, iā tī 1900 nî ū choè O-ta-oah (Ottawa) Tiúⁿ-ló-hoē Lú-chú ko-téng ha̍k-īⁿ ê hāu-tiúⁿ.
I chin kèng-khiàn, jia̍t-sim, iā chhut-la̍t kó͘-bú pang-chān kàu-hoē ê sū. iā ū tù choē-choē chheh, iā ū siá tī choē-choē khoán ê cha̍p-chì. Koh iā ū siat choē-choē uī ê Kî-tó-hoē.
Koh-chài i sī tī 1876 nî, cho͘-chit Lú Soan-tō-hoē ê cho͘-chit-chiá ê chi̍t-ê.
Lô͘ An-ná sī chin jia̍t-sim kap khiā-chāi ê Tiúⁿ-ló-hoē ê sìn-tô͘. Chóng-sī i ê sìn-gióng, ū hō͘ lóng-chóng sio̍k tī Ki-tok ê ta̍k khoán kàu-hoē só͘ chun-kèng.
I kè-sin tī i chi̍t ê cha-bó͘-kiáⁿ ê chhù, iā i ê chòng-sek ū kú-hêng tī hit só͘-chāi, chi̍t keng Tiúⁿ-ló-hoē ê pài-tn̂g, iā ta̍k kàu-phài ê Bo̍k-su: Lō͘-tek-phài, Liân-ha̍p-phài, Sèng-kong-hoē ê Bo̍k-su lóng ū lâi hù, hit ê koe-chhī kap chng-ni̍h ê lâng lóng piáu-chhut tui-tō ê sim.
I ê seng-gâi, thang kóng sī tha̍k Sèng-keng, kî-tó kap hōng-sū kàu-hoē ê seng-gâi.
漢羅（Ùi原文改寫）
盧An-ná過世
(柯設偕)
1934.1，no.586，pp.28
盧An-ná (Mrs.aⁿd Ross)佇本年9月6日，有受上帝揀召過世，享受85歲。盧An-ná是偕先生娘的老母，也佇無幾年前，佇70歲的時有來台灣，踮佇伊的查某囝-就是偕先生娘的厝，年半久，也佇彼中間，伊有教育宣教師的囝兒，(小可親像學校的款)。
閣伊的冊，有一本捌翻譯白話字-就是陳靈通先生所翻譯彼本「上帝的戰甲。」所以佮咱台灣的教會有緣故佇teh，愛寫淡薄伊的傳。
盧An-ná，佇1848年出世佇英國。老父姓中堅，是牧師(Rev. J. Duncun)，也伊是第二查某囝。也伊6歲的時，in父母有搬去加拿大Ong-tāi-lī-o (Ontario) 省。也伊的老父猶原做長老會的牧師佇遐。
盧An-ná有卒業衛斯理女子高等學院，也卒業了，紲受揀做彼間的先生。
佇1874年，伊有佮盧牧師(Rev. J. Ross)合婚。也伊的丈夫佇1887，有受上帝揀召過世，有留 6的囝兒。伊的丈夫過身了後，伊有教冊佇Khu-lín-tùn (Clinton)的學校，也後來有做To-lûn-to (Toronto)女宣教師養成學校初代的校長，也佇1900年有做O-ta-oah (Ottawa)長老會女子高等學院的校長。
伊真敬虔，熱心，也出力鼓舞幫贊教會的事。也有著濟濟冊，也有寫佇濟濟款的雜誌。閣也有設濟濟位的祈禱會。
閣再伊是佇1876年，組織女宣道會的組織者的一个。
盧An-ná是真熱心佮徛在的長老會的信徒。總是伊的信仰，有予攏總屬佇基督的逐款教會所尊敬。
伊過身佇伊一个查某囝的厝，也伊的葬式有舉行佇彼所在，一間長老會的拜堂，也逐教派的牧師：路得派，聯合派，聖公會的牧師攏有來赴，彼个街市佮庄裏的人攏表出追悼的心。
伊的生涯，通講是讀聖經，祈禱佮奉事教會的生涯。