新年的雜感
Sin-nî ê cha̍p-kám
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報 |
| 卷期 | 第586卷 |
| 日期 | 1934/1 |
| 頁數 | 1-2 |
白話字（原文數位化）
Sin-nî ê Cha̍p-kám
(Chú-pit)
- 1, no. 586, pp. 1-2
Chi̍t-nî koè chi̍t-nî, ji̍t-chí chin-chiàⁿ kín! Ah! 1933 nî í-keng chò i khì, chhut-chāi lí cháiⁿ-iūⁿ bán-lâu--i, i iā bô beh koh tò-tńg! Kai-chài, ū sin ê 1934 nî, hó ê kong-im, chiap-soà lâi. Tng tī chit ê sàng-kū ngiâ-sin ê sîn-hāu, bē kìm-tit siⁿ-chhut pi-siong kap hoaⁿ-hí e kám-sióng tī-teh.
Só͘ thang pi-siong--ê sī sím-mi̍h? Chiū-sī tī lán só͘ koè-liáu ê sî-ji̍t, bô-lūn lí-sī seng-kong á sit-pāi, in-khîn á pîn-toāⁿ; iā bô-lūn lí sī ū kng-bêng koh sûn-kiat ê jîn-keh, á-sī ū kiaⁿ-hiâⁿ oh-tit thoat-lī ê pháiⁿ si̍p-koàn; ah! bô chêng ê ki-hoē, it-ti̍t tuì lí ê bīn-chêng chhin-chhiūⁿ chìⁿ cho̍h--koè-khì, éng-oán bô koh lâi. iū-koh tī lán oa̍h toà sè-kan ê sî-kî, kiám m̄-sī kiám-chió chi̍t nî khì mah? Tī lán thêng-khùn ê kî-ji̍t, kiám m̄-sī khah kīn chi̍t nî mah?
Só͘ thang hoaⁿ-hí--ê sī sím-mi̍h? In-uī lán koh ke chi̍t ê sin-nî. Tī lán ê ha̍k-būn, tō-tek, keng-giām, ún-tàng ū khah chìn-pō͘. Siōng-tè só͘ siúⁿ-sù pó-poè sin-sin ê sî-kong í-keng lâi, hō͘ lán ē thang hùn-tò͘, kiàn-siat, sêng-chiū lán só͘ ài chò it-chhè ê kè-e̍k. Si̍t-chāi thang kiong-hí.
uī-tio̍h án-ni, ài tì-ì chhiáⁿ lia̍t-uī hiaⁿ-ché chù-ì 4 hāng:-
-
Sit-pāi: Koè-khì ê sî-ji̍t, bô-lūn loā ū chhong-bêng su-siúⁿ ê lâng, iā bē bián-tit tú-tio̍h sit-pāi. “Sèng-pāi sī peng-ka ê pêng-siông sū” (勝敗乃兵家之常事). Chóng-sī tuì it-chhè í-keng sit-pāi ê tāi-chì, tio̍h kín-kín pàng hō͘ bē kì-tit. Pó-lô Sian-siⁿ ū kóng, “Bē kì-tit āu-bīn ê sū.” In-uī lâng ta̍uh-ta̍uh chiong pún-sin só͘ ū ê sit-pāi khǹg tī thâu-náu-lāi, teh iu-būn, teh oàn-chheh, bô beh ǹg sin ê lo͘-tô͘ lâi pháu-cháu, chiū ē koh sit-lo̍h bó ê ki-hoē. Só͘-í tio̍h chiong chiông-chiân lóng-chóng ê sit-pāi pàng hiat-ka̍k, chhin-chhiūⁿ Pó-lô Sian-siⁿ kóng, Goá sêng-kong ê pì-koat, chiū-sī Bē kì-tit āu-bīn ê sū.
-
Si̍p-koàn: Pháiⁿ ê si̍p-koàn ē hāi lâng chin thiám. Kó͘-kim chē-chē eng-hiông bô-kia̍t siū i só͘ bâi-bu̍t. Pháiⁿ ê si̍p-koàn, ē hō͘ lâng bô ū ko-siōng ê su-siúⁿ, bô chū-iû, chū-kí ê jîn-keh sit-tuī. Ū chi̍t ê lâng, i ū chi̍t ê pháiⁿ si̍p-koàn, chiū-sī kiàn bé hoé-chhia-toaⁿ, put-ti put-kak soà chhoē bô chhia-toaⁿ. Pêng-iú ah! Tī chit ê sin ê nî, tio̍h ióng-sêng ài kî-tó, ài tha̍k Sèng-keng ê hó si̍p-koàn; m-thang tâm-lūn êng-oē koè ji̍t. Ki-tok-tô͘ ah! Lí ū sím-mi̍h pháiⁿ si̍p-koàn, kin-nî tio̍h tû-khì. “Lán tuì thiàⁿ lán--ê, tek-sèng kàu ū chhun” (Lô 8:37).
-
Sêng-kong: Tī koè-liáu ê ji̍t-chí, lán ún-tàng iā ū koá kiàn-siat, iā ū koá sêng-kong tī-teh. Chóng-sī siāng iàu-kín--ê, m̄-thang uī-tio̍h ū tām-po̍h-á sêng-kong, chiū sim-lāi ka-tī hoaⁿ-hí, tek-ì, tì-kàu chū-boán, chū-chiok, siⁿ-chhut kiau-ngō͘. Nā án-ni, chiū lí tī kin-nî tiong bô sím-mi̍h thang hi-bōng lah!
-
Ló͘-le̍k: Kū-nî tiong, sui-jiân ū sit-pāi, ū koè-sit, ū sêng-kong, ū hiua-hēng………hiah-ê, taⁿ lón koè-liáu! Lán tuì tī chit ê sin ê sî-kong, sin ê ki-hoē eng-kai tio̍h ū-pī tī hoān-sū ló͘-le̍k. Nā ū sit-pāi á pháiⁿ si̍p-koàn, tio̍h ló͘-le̍k lâi kái-chèng. Nā ū sêng-kong á hó-sū, tio̍h koh ló͘-le̍k khì kiû hō͘ i ná chìn-pō͘.
Goān tāi-ke chhin-chhiūⁿ Pó-lô Sian-siⁿ kóng, “To̍k-to̍k choan-bū chi̍t hāng, chiū-sī bē kì-tit āu-bīn ê sū, ǹg só͘ chhah ê pio lâi cháu, kàu tit-tio̍h Siōng-tè tī Ki-tok Iâ-so͘, tuì téng-bīn tiàu lán ê siúⁿ (Hui 3:14).
Boē lâi tāi-chì chin o͘-àm,
Goān Chú chhoā goán kàu lō͘-chām;
Tú-tio̍h tuì-te̍k hiong-ok lâi,
Chú, Lí chān goán kap i thâi.
漢羅（Ùi原文改寫）
新年的雜感
(主筆)
1934.1，no.586，pp.1-2
一年過一年，日子真正緊！啊！1933年已經做伊去，出在你怎樣挽留--伊，伊也無欲閣倒轉！佳哉，有新的1934年，好的光陰，接續來。當佇這个送舊迎新的時候，袂禁得生出悲傷佮歡喜的感想佇咧。
所通悲傷--的是甚物？就是佇咱所過了的時日，無論你是成功抑失敗，殷勤á貧憚；也無論你是有光明閣純潔的人格，抑是有驚惶oh得脫離的歹習慣；啊！無情的機會，一直對你的面前親像箭cho̍h--過去，永遠無閣來。又閣佇咱活蹛世間的時期，敢毋是減少一年去mah？佇咱停睏的期日，敢毋是較近一年mah？
所通歡喜--的是甚物？因為咱閣加一个新年。佇咱的學問，道德，經驗，穩當有較進步。上帝所賞賜寶貝新新的時光已經來，予咱會通奮鬥，建設，成就咱所愛做一切的計畫。實在通恭喜。
為著按呢，愛致意請列位兄姊注意4項：-
-
失敗：過去的時日，無論偌有聰明思想的人，也袂免得拄著失敗。「勝敗是兵家的平常事」(勝敗乃兵家之常事)。總是對一切已經失敗的代誌，著緊緊放予袂記得。保羅先生有講，「袂記得後面的事。」因為人沓沓將本身所有的失敗囥佇頭腦內，teh憂悶，teh怨慼，無欲望新的路途來跑走，就會閣失落好的機會。所以著將從前攏總的失敗放hiat-ka̍k，親像保羅先生講，我成功的祕訣，就是袂記得後面的事。
-
習慣：歹的習慣會害人真忝。古今濟濟英雄豪傑受伊所埋沒。歹的習慣，會予人無有高尚的思想，無自由，自己的人格失墜。有一個人，伊有一個歹習慣，就是見買火車單，不知不覺紲揣無車單。朋友啊！佇這个新的年，著養成愛祈禱，愛讀聖經的好習慣；毋通談論閒話過日。基督徒啊！你有甚物歹習慣，今年著除去。「咱對疼咱--的，得勝到有賰」(羅 8：37)。
-
成功：佇過了的日子，咱穩當也有寡建設，也有寡成功佇teh。總是上要緊--的，毋通為著有淡薄仔成功，就心內家己歡喜，得意，致到自滿，自足，生出驕傲。若按呢，就你佇今年中無甚物通希望lah！
-
努力：舊年中，雖然有失敗，有過失，有成功，有僥倖………遐的，今攏過了！咱對佇這个新的時光，新的機會應該著預備佇凡事努力。若有失敗抑歹習慣，著努力來改正。若有成功抑好事，著閣努力去求予伊ná進步。
願大家親像保羅先生講，「獨獨專務一項，就是袂記得後面的事，望所插的標來走，到得著上帝佇基督耶穌，對頂面召咱的賞 (Hui 3：14)。
袂來代誌真烏暗，
願主chhoā阮到路站；
拄著對敵兇惡來，
主，你贊阮佮伊刣。