信，會看著上帝的榮光
Sìn, ē khoàⁿ-tio̍h Siōng-tè ê êng-kng
文獻資訊
| 項目 | 資料 |
|---|---|
| 作者 | 陳Chiū-lîm Tân Chiū-lîm |
| 卷期 | 台灣教會公報 |
| 卷期 | 第586卷 |
| 日期 | 1934/1 |
| 頁數 | 17 |
白話字（原文數位化）
Sìn, ē khoàⁿ-tio̍h Siōng-tè ê êng-kng
(Chhiah-chuí: Tân Chiū-lîm kì)
- 1, no. 586, pp. 17
Chiau-hô 7 nî 2 goe̍h, ka-bó pēⁿ siong-tiōng, chhiáⁿ í-seng chia̍h-io̍h ū khah hó. āu-lâi khí pa̍t chèng, bē kiâⁿ. I-seng ēng tiān-khì tiān, chù-siā, āu-lâi ē kiâⁿ. Put-hēng koh khí chèng-thâu, chiū-is7 io-chí-pēⁿ, koaⁿ-pēⁿ, pak-tó͘ khah koân sim-koaⁿ, choân-sin koaⁿ-chuí, bē kiâⁿ, bē chē.
Ah! 74 hoè ê lāu-lâng, lâi tú-tio̍h chit hō pēⁿ, chhi-chhám ēng pit bē-thang hêng-iông. I-seng kóng, Lāu-lâng hoat chit hō chèng, khah oh hó; hoan-hù m̄-thang chia̍h iû-chho. Tuì 4 goe̍h chhe kàu 5 goe̍h chhe, ti̍t-ti̍t chia̍h-io̍h bô khah hó. Ka-bó chì-goān m̄ chia̍h-io̍h, beh khì pài-tn̂g chhiáⁿ Chú-to͘ koaⁿ kā i kî-tó, sí-oa̍h iû chāi Chú. Goá chiū chiàu i ê oē, hō͘ i toà pài-tn̂g.
Gō͘ goe̍h 9 hō, khì pài-tn̂g. Chú-to͘ koaⁿ kóng, “Lí ê nî-hoè hiah chē, m̄-thang ti̍t-ti̍t kiû beh toà sè-kan, tio̍h ǹg-bāng Thian-tông ê hok-khì khah hó, Chú nā hoaⁿ-hí in-tián sī chin hó, I nā m̄, lán tio̍h kiû Iâ-so͘ lâi chiap-la̍p lí ê lêng-hûn khah iàu-kín.” Ka-bó ìn hó. Chú-to͘ koaⁿ chiū pek-chhiat thè ka-bó kî-tó, iā hoan-hù tio̍h bé hî, bah, hō͘ i phoè, m̄-thang khiūⁿ.
Tuì 9 hō kî-tó kàu 16 hō, Chú-to͘ koaⁿ tit-tio̍h khé-sī, Siōng Chú beh koh in-tián ka-bó tī sè-kan. Goá chhim-sìn i só͘ kóng--ê, tek-khak ū iáⁿ. āu-lâi chuí chiām-chiam siau. Lâng soà kóng, “Kha-tâ chhiú-tâ, beh bé koaⁿ-chhâ.” Chit ê lāu-lâng nā ē hó, goán chiū m̄-sìn. Kuí-nā ê lāu-lâng kap i siāng chèng, bô i hiah siong-tiōng, koh chhiáⁿ loā chē i-seng to bô chhái-kang, bô-hòng i bô chia̍h-io̍h, ún-tàng ē sí. Kàu 6 goe̍h 20 hō, lóng hó-hó. Khiok pak-tó͘ chi̍t-oân boē siau.
Chhit goe̍h 27 hō, hut-jiân tio̍h kám-mō͘, chin kan-khó͘, bē khùn-tit, ka-tī siūⁿ ē sí, kiò Chú-to͘ koaⁿ chhiàⁿ kiō kng i tńg-khì. Chú-to͘ koaⁿ an-uì i, kiò i tio̍h sìn, bē sí. Chú-to͘ koaⁿ chiū pek-chhiat kî-tó. Ka-bó chiū ē khùn-tit, chiām-chiām hó, pak-tó͘ hit oân iā siau bô--khì.
Phí-jîn siá kuí-jī, sī ài hō͘ lia̍t-uī chai Chú ê thiàⁿ goá, saⁿ-kap kám-siā I ê toā-in, pài-thok lia̍t-uī thè goán Lo̍k-khut-chng kî-tó. In-uī chit chng kan-ta goán chi̍t ke sìn Chú nā-tiāⁿ, hō͘ in khoàⁿ-tio̍h chit hō sîn-jiah, ē lâi kiâⁿ thiⁿ-lō͘. À-bēng.
漢羅（Ùi原文改寫）
信，會看著上帝的榮光
(赤水：陳Chiū-lîm記)
1934.1，no.586，pp.17
昭和7年2月，家母病傷重，請醫生食藥有較好。後來起別症，袂行。醫生用電氣墊，注射，後來會行。不幸閣起症頭，就是腰子病，肝病，腹肚較懸心肝，全身汗水，袂行，袂坐。
啊！74歲的老人，來拄著這號病，淒慘用筆袂通形容。醫生講，老人發這號症，較oh好；吩咐毋通食油臊。對4月初到5月初，直直食藥無較好。家母志願毋食藥，欲去拜堂請主督官共伊祈禱，死活由在主。我就照伊的話，予伊蹛拜堂。
五月9號，去拜堂。主督共講，「你ê年歲赫濟，毋通直直求欲蹛世間，著向望天堂的福氣較好，主若歡喜恩典是真好，伊若毋，咱著求耶穌來接納你的靈魂較要緊。」家母應好。主督官就迫切替家母祈禱，也吩咐著買魚，肉，予伊配，毋通khiūⁿ。
對9號祈禱到16號，主督官得著啟示，上主欲閣恩典家母佇世間。我深信伊所講--的，的確有影。後來水漸漸消。人紲講，「跤tâ手tâ，欲買棺材。」這个老人若會好，阮就毋信。幾若个老人佮伊像症，無伊赫傷重，閣請偌濟醫生都無彩工，無放伊無食藥，穩當會死。到6月20號，攏好好。卻腹肚一丸袂消。
七月27號，忽然著感冒，真艱苦，袂睏得，家己想會死，叫主督官倩轎扛伊轉去。主督官安慰伊，叫伊著信，袂死。主督官就迫切祈禱。家母就會睏得，漸漸好，腹肚彼丸也消無--去。
鄙人寫幾字，是愛予列位知主的疼我，相佮感謝伊的大恩，拜託列位替阮鹿窟庄祈禱。因為這庄干旦阮一家信主nā-tiāⁿ，予in看著這號神跡，會來行天路。À-bēng。