楊Tong-jū的小傳

Iûⁿ Tong-jū ê Sió-toān

文獻資訊

項目	資料
作者	無lo̍h名
卷期	台灣教會公報
卷期	第585卷
日期	1933/12
頁數	17

白話字（原文數位化）

Iûⁿ Tong-jū ê Sió-toān

N̂g Jîn-siū

1933.12, no. 585, pp. 17

Iûⁿ Tong-jū sī Lí Goân-hui kun ê hū-jîn-lâng, sī Jī-chuí kàu-hoē Chú-ji̍t-o̍h ê Kàu-oân. Sī jia̍t-sim hó lú-tek ê lú-chú, i pún sī sio̍k Lo̍k-káng ê Kàu-hoē; kè-lâi chia chiah oá nn̄g nî nā-tiāⁿ.

Tuì lâi kàu-taⁿ, hō͘ ke-lāi ê lâng hoaⁿ-hí, iā hō͘ chhù-piⁿ í-ki̍p kap i sio-bat ê lâng hoaⁿ-hí.

I ê ta-koaⁿ sī bô pài Siōng-tè ê lâng, í-chêng sui-jiân ū chē-chē lâng khó͘-khǹg i, chóng-sī lóng bē-ē ín-chhoā i lâi lé-pài. Kàu Tong-jū lâi, i ê ta-koaⁿ ū siū-tio̍h i ê kám-kek, chiū hoaⁿ-hí ta̍k lé-pài lâi lé-pài. Taⁿ thang kóng sī choân-ke pài siōng-tè. iā thang chai tek-hēng kám-kek lâng ê la̍t hiah toā.

iū-koh chin tì-ì tī Chú-ji̍t-o̍h, khó-sioh sin-thé loán-jio̍k, bē thang ta̍k lé-pài chhut-se̍k, chóng-sī i ū kó͘-bú chng-nih ê gín-ná kap hū-jîn-lâng, mê-sî lâi i ê chhù o̍h Pe̍h-oē-jī. Lé-pài-ji̍t chiū kó͘-bú lâng tio̍h lâi lé-pài. Khó-sioh ah ! Tī chit pang i ê kū-pēⁿ koh hoat, i-tī nn̄g goe̍h goā ji̍t bô kong-hāu, tī 9 goe̍h 21 hō hō͘ Chú tiàu, an-jiân kè-sì, thoat-lī sè-kan ê khó͘-thàng, tńg-khí Pē tau, tit-tio̍h éng-oán ê hok-khì, hióng-siū 23 hoè.

Thiaⁿ-kìⁿ i sí, ta̍k lâng m̄-kam. Tī 22 ji̍t chò chòng-sek, hit ji̍t chin chē lâng chhut-se̍k, i ê ta-koaⁿ khoàⁿ-liáu siū kám-kek. Kàu-hoē-goā ê lâng iā o-ló lán ê chéng-chê.

Taⁿ ǹg-bāng lia̍t-uī hiaⁿ-ché thè in kî-tó, hō͘ in bô loé-chì, ē toè i ê kha-pō͘, jia̍t-sim ho̍k-sāi Chú. A-bēng.

漢羅（Ùi原文改寫）

楊Tong-jū的小傳

黃仁壽

1933.12, no. 585, pp. 17

楊Tong-jū是李Goân-hui君的婦人人，是二水教會主日學的教員。 是熱心好女德的女子，伊本是屬鹿港的教會；過來遮chiah倚兩年若定。

Tuì來到今，予家內的人歡喜，也予厝邊以及佮伊相識的人歡喜。

伊的大官是無拜上帝的人，以前雖然有濟濟人苦勸伊，總是攏bē會引chhoā伊來禮拜。 到Tong-jū來，伊的大官有受著伊的感激，就歡喜逐禮拜來禮拜。 今通講是全家拜上帝。 也通知德行感激人的力hiah大。

又閣真致意佇主日學，可惜身體軟弱，bē通逐禮拜出席，總是伊有鼓舞庄裡 的囡仔佮婦人人，彼暝時來伊的厝學白話字。 禮拜日就鼓舞人著來禮拜。 可惜啊！ 佇這pang伊的舊病閣發，醫治兩月外日無功效，佇9月21號予主召，安然過世，脫離世間的苦痛，轉去父兜，得著永遠的福氣，享壽23歲。

聽見伊死，逐人毋甘。 佇22日做葬式，彼一日真濟人出席，伊的大官看了受感激。 教會外個人也呵咾咱的整齊。

今向望列位兄姊替in祈禱，予in無餒志，會toè伊的腳步，熱心服事主。 阿門。