東西南北
Tang Sai Lâm Pak
文獻資訊
| 項目 | 資料 |
|---|---|
| 作者 | 偕叡廉 Kai Jōe-liâm |
| 卷期 | 台灣教會公報/芥菜子 |
| 卷期 | 第585卷 |
| 日期 | 1933/12 |
| 頁數 | 25-26 |
白話字（原文數位化）
Tang Sai Lâm Pak
1933.12 (Koà-Chhài-Chí Tē 95 hō) p.25-26
Kai Joē-liâm
Chiàu Lâm-kiaⁿ Sîn-ha̍k-hāu-tiúⁿ só͘ pò-kò , i ê pún-hāu chiong-lâi beh siat-hoat chin chiâu-pī, in-uī ū tit-tio̍h chi̍t ê Bí-kok lâng ê kià-hù kim nn̄g chheng bān (Y20000,000).
Hiān-sî Iû-thài kok ū pah goā bān lâng,tiong-kan 20 bān sī Iû-thài lâng.
Chêng bô loā-kú ū ku̍t-tio̍h Só-lô-bûn ông ê bé-tiâu kap i só͘ chō ê lō͘. Lō͘ sī ēng toā-chio̍h lâi pho͘. Bé kiâⁿ-kàu ui--khì ê hûn lóng iáu tī-teh. Khoàⁿ Sèng-keng chiū chai, hit-sî Só-lô-bûn ū choē-choē bé.
Tī Pho-su kok ū ku̍t-tio̍h Sèng-keng só͘ kóng , Kó͘-lia̍t kap Tāi-lī-a-ông ê ông-kiong. Chio̍h-thiāu chin koân, chin suí, lóng iáu tī-teh. Í-goā ū chhē-tio̍h choē-choē khoán ê kim-khì kap huî-khì;iā ū ku̍t-tio̍h choē-choē chio̍h-siōng kap jī. Chèng-bêng Sèng-keng só͘ kì-chài--ê, sī si̍t.
Kūn-lâi Tek-kok put-chí pháiⁿ khoán-thāi i pún-kok ê Iû-thài lâng. Tì-kàu kok-lāi chhut-miâ ê ha̍k-chiá kiò-choè Einstein, ū lī-khui Tek-kok, koat-ì beh khì Iâ-lô͘-sat-léng Tāi-ha̍k choè sian-siⁿ.
Tī Se-pan-gâ ū chi̍t ê lâng miâ kiò Rego i chia̍h kàu 112 hè chiah kè-sin. I ê hāu-siⁿ 83 hè,iáu tī-teh.
Tī Sat-má-lī-a siâⁿ, ū hoat-kiàn-tio̍h Kū-iok só͘ kóng , A-khap ông ê ông-kiong ; iā ū chhē-tio̍h Hit-lu̍t ông só͘ kiàn-chō ê Hoat-īⁿ. Toā-chio̍h-thiāu iáu tī-teh.’’ A-khap ông ê kim-khì, kap só͘ khek ê chhiūⁿ-gê ê chhù, só͘ khí ê siâⁿ, lóng-chóng kì-chài tī Í-sek-lia̍t ông ê kì-lio̍k.’‘Sèng-keng só͘ kóng, si̍t-chāi chin khak-si̍t.
Kuí-nā nî-chêng, ū chhē-tio̍h Ka-pek-lông chi̍t keng tiān. Chio̍h-piah ū phah jī kap hoé-tó͘, chhin-chhiūⁿ phû-tô, bû-hoa-kó, má-ná, kap teng-tâi Phah-sǹg Iâ-so͘ khì Ka-pek-lông chiū-sī tī chit keng tiān là-sī.
Chin-lí chin ò-biāu. Ò-biāu chóng-sī chin-si̍t. Chin-si̍t lán thang sìn.
Pêng-iú tuì chi̍t-uī hū-jîn-lâng kóng, Lí ê kong-chú hō͘ lâng kéng choè chóng-tok, lí tek-khak chin hoaⁿ-hí ; chóng-sī chêng-pang i siū soé-lé ji̍p tī kàu-hoē, goá koh khak hoaⁿ-hí.
漢羅（Ùi原文改寫）
東西南北
1933.12 (芥菜子第95號) p.25-26
偕叡廉
照南京神學校長所報告，伊的本校將來欲設法真齊備，因為有得著一个美國人的寄付金兩千萬(Y20000，000)。
現時猶太國有百外萬人，中間20萬是猶太人。
前無偌久有掘著索羅門王的馬寮佮伊所造的路。路是用大石來鋪。馬行到萎去的痕攏猶佇teh。看聖經就知，彼時索羅門有濟濟馬。
佇波斯國有掘著聖經所講，Kó͘-lia̍t佮Tāi-lī-a-王的王宮。石柱真懸，真媠，攏猶佇teh。以外有揣著濟濟款的金器佮磁器；也有掘著濟濟石像佮字。證明聖經所記載的，是實。
近來德國不止歹款待伊本國的猶太人。致到國內出名的學者叫做Einstein，有離開德國，決意欲去耶路撒冷大學做先生。
佇西班牙有一個人名叫Rego伊食到112歲才過身。伊的後生83歲，猶佇teh。
佇撒馬利亞城，有發見著舊約所講，A-khap王的王宮；也有揣著伊律王所建造的法院。大石柱猶佇teh。「A-khap王的金器，佮所刻的象牙的厝，所起的城，攏總記載佇以色列王的記錄。」聖經所講，實在真確實。
幾若年前，有揣著迦百農一間殿。石壁有拍字佮繪圖，親像葡萄，無花果，má-ná，佮燈台拍算耶穌去迦百農就是佇這間殿教示。
真理真奧妙。奧妙總是真實。真實咱通信。
朋友對一位婦人人講，你的公子予人揀做總督，你的確真歡喜；總是前pang伊受洗禮入佇教會，我閣較歡喜。