Sīm-chiok的祈禱
Sīm-chiok ê Kî-tó
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報/芥菜子 |
| 卷期 | 第584卷 |
| 日期 | 1933/11 |
| 頁數 | 26 |
白話字（原文數位化）
Sīm-chiok ê Kî-tó
1933.11 (Koà-Chhài-Chí Tē 94 Hō) P.26
Suī-hong Kàu-hoē ū chit ê Chúji̍t-o̍h ê cha-bó͘-gín-ná, miâ kiò Sīm-chiok.Kin-nî chhit-hoè, iáu-bē tha̍k kong-ha̍k-hāu, in-uī nî-bé gín-ná. Só͘-í chin soè-hàn , kha-chhiú iā chin soè-ki; chóng-sī kì-tî chin hó , chin gâu tha̍k-chheh,chin hó táⁿ. Nā choè Kiù-chú-tàn ê sî, lóng ū peh-khì tâi-téng chhiùⁿ-koa, pí iû-hì, liām Kiù-chú ê lân-le̍k, liām chin tn̂g ; tì-kàu hō͘ thiaⁿ ê lâng lóng tio̍h-kiaⁿ, kóng Hit ê cha-bó͘-gín-ná sī sím-mi̍h lâng ê , kán hiah gâu.
Taⁿ chit ê cha-bó͘-gín-ná Sīm-chiok m̄-nā gâu, koh chin koai, chin un-jiû, hō͘ ta̍k-lâng chin thiàⁿ--i. Chit-pang ū tú-tio̍h phoà-pīⁿ chin siong-tiōng , i ê pē-bú ū chhoā i khì ji̍p Tâi-pak chhī Lîm goā-kho pīⁿ-īⁿ. Tuì ji̍p-īⁿ tāi-khài keng-kè oá chi̍t lé-pài kú , jia̍t lóng bô thè lóng sī 39 tō͘ goā. I ê pē-bú sim-koaⁿ chin hoan-ló, chiū mn̄g I-seng kóng, Sian-siⁿ ah, ū iàu-kín á-bô? Sian-siⁿ kā i kóng , Lūn gín-n2 khiok chin siong-tiōng , khah-hó tio̍h khì Tâi-pak pīⁿ-īⁿ siáu-jî-kho khah choan-bûn. I ê pē-bú thiaⁿ-kìⁿ án-ni kóng , koh khah hoân-ló. Chiū kā sian-siⁿ kóng , Sian-siⁿ , lí nā chhòng boē hó, khì Tâi-pak pīⁿ-īⁿ iā-sī bē hó ; kin-á-ji̍t lâi , choan-sim sī beh hō͘ lí chhòng. Sian-siⁿ khoàⁿ-kìⁿ choè pē-bú hiah tì-ì ài hō͘ i chhòng, chiū hō͘ i koh tiàm hia.
Chi̍t-ji̍t keng-kè chi̍t-ji̍t , lóng bô sím-mi̍h khah-hó, ū-sî jia̍t ū thè kàu 37 tō͘ goā. I ê pē-bú chiū chin hoaⁿ-hí; chóng-sī liâm-piⁿ iū jia̍t kàu oá 40 tō͘. án-ni jia̍t liâm-piⁿ thè, liâm-piⁿ koân, lóng bô tiāⁿ-tio̍h, pē-bú ê sim lóng boē pêng-an, chiū kî-tó Siōng-chú lâi pang-chān. Chhin-chhiūⁿ án-ni, mî-ji̍t ti̍t-ti̍t peng-sng; chóng-sī ná siong-tiōng , i ê pē-bú mî-sî lóng m̄-káⁿ khùn. Kàu 8 ge̍h 14 ji̍t, gín-ná toā kan-khó͘, khoàⁿ-liáu put-chí guî-hiám, chhin-chhek pêng-iú lóng kàu-uī, gín-ná chin kan-khó͘ , chiū kî-tó Siōng-tē kóng, ‘’Goá ê Siōng-chú ah, Lí tio̍h chín-kiù goá, Lí chin thiàⁿ gín-ná, in-uī goá sī gín-ná, kiû Lí tio̍h chín-kiù goá.’’ Pē-bú thiaⁿ-kìⁿ Sīm-chiok án-ni kî-tó, tāi-ke lóng lâu ba̍k-sái. Sīm-chiok ti̍t-ti̍t kî-tó; chóng-sī ná kan-khó͘, kàu toā kan-khó͘ ê sî, kóng boē-tit chhut-lâi, kan-ta kiò Siōng, Siōng, Siōng, chiū-sī beh kiò Siōng-tè . Ah! Sīm-chio̍k ê kî-tó, soah bô thiaⁿ-kìⁿ,khah -chhiú lóng léng, chhuì-tûn-phoê lóng péng lìn-tńg, chéng-kah lóng o͘, sian-siⁿ chiū the̍h ki-khì lâi tuì toā-thuí kā i chù-siā, chi̍t-pêng chi̍t-ki, gín-ná āu-lâi chiah chhut-siaⁿ ai, tāi-ke chiah hoaⁿ-hí kám-siā Siōng-tè. Sui-jiân gín-ná koh cheng-eng ; chóng-sī jia̍t lóng bô thè, ti̍t-ti̍t jia̍t, iáu-kú Sīm-chiok ka-kī put-sî kî-tó. Seng-khu chi̍t-ē kan-khó͘, kā i ê lāu-bú kóng, goá chiah kan-khó͘, chiah pháiⁿ-miā , sī bô lō͘-ēng ê lâng, sí mā khah hó , khah boē chiah kan-khó͘ . I ê lāu-bú kóng, ta̍k lâng mā-sī bô lō͘-ēng ,sím-mi̍h lâng ū lō͘-ēng, Sīm-chiok kóng , toā lâng khah ū lō͘-ēng, goá gín-ná bô lō͘-ēng. I ê lāu-bú koh kóng , lí tio̍h kî-tó Siōng-tè , m̄-thang án-no kóng , lí khoàⁿ lín a-hiaⁿ phoà-pīⁿ iā hó, lín a-chí phoà-pīⁿ iā-hó, lóng chhut-īⁿ tò-khì, lí nā jia̍t-sim kî-tó, Siōng-tè liâm-khì, lí nā jia̍t-sim kî-tó, Siōng-tè liâm-piⁿ beh hō͘ lí hó-hó tò-khì. Sīm-chiok chiū koh kî-tó Siōng-tè kóng, ‘’Siōng-chú ah ! Lí tio̍h chín-kiù goá, goá sī bô lō͘-ēng ê gín-ná , goá nā hó, āu-ji̍t beh lâi khì Tām-chuí tha̍k Lú-o̍h ,beh choè Lí ê lō͘-ēng.’’
Tuì hit-sî Sīm-chiok ti̍t-ti̍t kî-tó, kiû Siōng-tè hō͘ i kín hó. Tī pài-tn̂g kî-tó-hoē ê sî, hiaⁿ-tī chí-bē thiaⁿ-kìⁿ Sīm-chiok ê jia̍t-sim, iā thoè i saⁿ-kap kiû Siōng-tè lâi thiaⁿ chit ê gín-ná 5 kî-tó. Kám-siā Siōng-tè, tī 9 ge̍h 18 ū chhut-īⁿ , kè-kiōng 40 ji̍t kú, kin-á-ji̍t í-keng hó-hó , tò-lâi tī chhù-ni̍h, tāi-ke chin hoaⁿ-hí. I ê pêng-iú iû-goân sī Chú-ji̍t-o̍h ê cha-bó͘-gín-ná kuí-nā ê , ū the̍h mi̍h hō͘ Sīm-chiok, hoan-gêng hoaⁿ-hí Sīm-chiok tò-lâi.
Siōng-tè ê koân-lêng si̍t-chāi toā, sui-jiân sī soè-hàn ê gín-ná; iáu-kú nā kiû-kiò Siōng-tè, jia̍t-sim kî-tó, Siōng-chú tek-khak hoaⁿ-hí thiaⁿ.
漢羅（Ùi原文改寫）
Sīm-chiok的祈禱
1933.11 (芥菜子第 94號) P.26
瑞芳教會有這个主日學的查某囡仔，名叫Sīm-chiok。今年七歲，猶未讀公學校，因為年尾囡仔。所以真細漢，跤手也真細支；總是記持真好，真賢讀冊，真好膽。若做救主誕的時，攏有peh去台頂唱歌，比遊戲，念救主的來歷，念真長；致到予聽的人攏著驚，講彼个查母囡仔是啥物人的，kán 遐賢。
Taⁿ這个查某囡仔Sīm-chiok 毋若gâu，閣真乖，真溫柔，予逐人真疼伊。這pang有拄著破病真傷重，伊的父母有chhoā伊去入台北市林外科病院。對入院大概經過倚一禮拜久，熱攏無退攏是39 度外。伊的父母心肝真煩惱，就問醫生講，先生啊，有要緊抑無？先生共伊講，論囡仔卻真傷重，較好著去台北病院小兒科較專門。伊的父母聽見按呢講，閣較煩惱。就共先生講，先生，你若chhòng袂好，去台北病院也是袂好；今仔日來，專心是欲予你chhòng。先生看見做父母遐致意愛予伊chhòng，就予伊閣踮遐。
一日經過一日，攏無啥物較好，有時熱有退到37度外。伊的父母就真歡喜；總是連鞭又熱到倚40度。按呢熱liâm-piⁿ退，連鞭寒，攏無定著，父母的心攏袂平安，就祈禱上主來幫贊。親像按呢，暝日直直peng-sng；總是那傷重，伊的父母暝時攏毋敢睏。到8月14日，囡仔大艱苦，看了不止危險，親戚朋友攏到位，囡仔真艱苦，就祈禱上帝講，「我的上主啊，你著拯救我，你真疼囡仔，因為我是囡仔，求你著拯救我。」父母聽見Sīm-chiok按呢祈禱，大家攏流目屎。Sīm-chiok直直祈禱；總是那艱苦，到大艱苦的時，講袂得出來，kan-ta叫上，上，上，就是欲叫上帝。啊！Sīm-chio̍k的祈禱，煞無聽見，跤手攏冷，嘴唇皮攏翻輾轉，腫kah攏烏，先生就theh機器來對大腿共伊注射，一爿一支，囡仔後來才出聲哀，大家才歡喜感謝上帝。雖然囡仔閣精英；總是熱攏無退，直直熱，猶閣Sīm-chiok家己不時祈禱。身軀一下艱苦，共伊的老母講，我才艱苦，這歹命，是無路用的人，死嘛較好，較袂才艱苦。伊的老母講，逐人嘛是無路用，啥物人有路用，Sīm-chiok講，大人較有路用，我囡仔無路用。伊的老母閣講，你著祈禱上帝，毋通按呢講，你看恁阿兄破病也好，恁阿姊破病也好，攏出院倒去，你若熱心祈禱，上帝連鞭去，你若熱心祈禱，上帝連鞭欲予你好好倒去。Sīm-chiok就閣祈禱上帝講，「上主啊 ！你著拯救我，我是無路用的囡仔，我若好，後日欲來去淡水讀女學，欲做你的路用。」
對彼時Sīm-chiok直直祈禱，求上帝予伊緊好。佇拜堂祈禱會的時，兄弟姊妹聽見Sīm-chiok 的熱心，也替伊相佮求上帝來聽這个囡仔的祈禱。感謝上帝，佇9月18有出院，計共40日久，今仔日已經好好，倒來佇厝裡，大家真歡喜。伊的朋友猶原是主日學的查某囡仔幾若个，有theh物予Sīm-chiok，歡迎歡喜Sīm-chiok 倒來。
上帝的權能實在大，雖然是細漢的囡仔；猶閣若求叫上帝，熱心祈禱，上主的確歡喜聽。