聲樂餘談
Seng-ga̍k Û-tâm
文獻資訊
| 項目 | 資料 |
|---|---|
| 作者 | H. T. S. |
| 卷期 | 台灣教會公報 |
| 卷期 | 第584卷 |
| 日期 | 1933/11 |
| 頁數 | 21 |
白話字（原文數位化）
Seng-ga̍k Û-tâm
(H.T.S.)
1933.11 (584 koàn) P.21
Chêng-hoê goá ū tāi-lio̍k kóng-khí seng-ga̍k ê bo̍k-tek kap i ê kè-ta̍t, iā ū kán-tan soat-bêng hit ê hoat-tō͘. Taⁿ sī ài koh chiap-soà gī-lūn só͘ chhun--ê, chiū-sī chiong chū-kí tām-po̍h ê keng-giām kap 2, 3 tāi-ka ê ì-kiàn, lūn seng-ga̍k ê ki-kháu-tek hong-bīn, í-ki̍p liān-si̍p-siōng ê chù-ì sū hāng, kán-lio̍k kóng kuí-kù, ǹg-bāng chò tāi-ke to-siáu ê chham-khó.
-
Lūn koa-sû tio̍h hun-bêng, goá í-keng ū kóng liáu, che chin iàu-kín, só͘-í koh kóng chi̍t piàn, in-uī beh hō͘ lâng thiaⁿ-liáu ē liáu-kái,chiū-sī bô lūn bó-im, chú-im lóng tio̍h chin bêng. Só͘-í koa-sû khah hó ài àm-kì se̍k-se̍k, nā bô, siang-chhiú the̍h ga̍k-phó͘, iā teh khoàⁿ phó͘, iā teh khoàⁿ hiah ê oē, chū-jiân sī ē hō͘ ga̍k-phó͘ chhiúⁿ-toa̍t lán ê chù-ì, só͘-í tuì koa-sû ê piáu-hiān bô chū-iû, chū-jiân m̄-bián bāng ē kám-tōng lâng.
-
Bô lūn sím-mi̍h chòng-giâm, uí-tāi ê kong-kéng, á-sī gîm loā koân, lóng m̄-thang ēng jióng, ēng âu-kiò ê siaⁿ. chiū-sī tio̍h chiām-chiām chún-pī, nā-sī beh hián-chhut sím-mih kong-kéng, m̄-sī tuì siaⁿ-liōng, á-sī im-hiáng-ha̍k-tek ê kiông toā ê siaⁿ-im, chiū-sī tio̍h tuì sim-lí-tek kiông-lia̍t ê kám-chêng ê chū-jiân-tek hoat-tō͘ lâi piáu-hiān chiah ē ēng-tit.
-
Seng-ga̍k ê piáu-hiān-hoa̍t sī put-chí iàu-kín, Che kap Violin ê hoat sio-siāng. Piáu-hiān chiū-sī piáu-hiān kám-chêng. Chhin-chhiūⁿ Violin ê tāi-ka(Violist) iā-sī tio̍h ū chi̍t-khoán ê piáu-chêng, ē-hiáu tī tú-hó ê só͘-chāi, ēng tú-hó ê piáu-chêng, chiah thang ǹg-bāng ē kám-tōng lâng, ē ìn-siōng tī lâng ê thâu-náu.(Boē-oân).
漢羅（Ùi原文改寫）
聲樂餘談
(H.T.S.)
1933.11 (584卷) p.21
前號的我有大略講起聲樂的目的佮伊的價值，也有簡單說明彼个法度。今是愛閣接續議論所chhun的，就是將自己淡薄的經驗佮2，3大家的意見，論聲樂的技巧tek方面，以及練習上的注意事項，簡略講幾句，向望做大家多少的參考。
1、論歌詞著分明，我已經有講了，這真要緊，所以閣講一遍，因為欲予人聽了會了解，就是無論母音，子音攏著真明。所以歌詞較好愛暗記熟熟，若無，雙手提樂譜，也咧看譜，也咧看遐的話，自然是會予樂譜搶奪咱的注意，所以對歌詞的表現無自由，自然毋免望會感動人。
2、無論啥物莊嚴，偉大的光景，抑是吟外懸，攏毋通用嚷，用喉叫的聲。就是著漸漸準備，若是欲顯出什麼光景，毋是對聲量，抑是音響學得的強大的聲音，就是著對心理的強烈的感情的自然的法度來表現才會用得。
3、聲樂的表現法是不止要緊，這佮Violin的法相siāng。表現就是表現感情。親像Violin 的大家(Violist)也是著有一款的表情，會曉佇拄好的所在，用拄好的表情，才通向望會感動人，會印象佇人的頭腦。(袂完)。