光輝的故事
Kong-hui ê Kò͘-sū
文獻資訊
| 項目 | 資料 |
|---|---|
| 作者 | 楊士養 Iûⁿ Sū-ióng |
| 卷期 | 台灣教會公報 |
| 卷期 | 第584卷 |
| 日期 | 1933/11 |
| 頁數 | 14 |
白話字（原文數位化）
Kong-hui ê Kò͘-sū
Iûⁿ Sū-ióng tuì Lân I-seng-niû ê More stories from Formosa hoan-e̍k
1933.11, no. 584, pp. 14
(Chia̍p chêng-hō tē 13 bīn)
Lín kiám-chhái ē tām-po̍h kî-koài, i tuì in lāu-pē só͘ kóng ê oē; chóng-sī i ê lāu-pē lóng bô siū-khì. Kong-hui sī in pē-bó ê ba̍k-chiu ê kng, iā in lāu-pē put-chí se̍k, chai siū bê-he̍k tì-kàu bē kì-tit kî-tó ê sū. I kuí-nā pái kā I-seng-niû kóng, i Ki-tok-tô͘ ê seng-oa̍h, tuì i ê kiáⁿ ê bô͘-hoān, ū tit-tio̍h chin toā pang-chān. Lūn i ê lāu-bó khiok sī chin chhim-sìn, chin kian-kò͘ ê lâng. I ê toā kiáⁿ Kong-hui ū toè i ê kha-pō͘.
Kong-hui ê kî-tó ū tit-tio̍h ín-chún. Tī Eng-kok ê pêng-iú ēng thiàⁿ ê hi-seng, ū bō͘-chi̍p 250 kho͘ beh hō͘ i bé chi̍t tiuⁿ chò ê ê chiam-chhia, siāng hit-sî Eng-kok Chú-ji̍t-o̍h iā kià 200 kho͘ lâi beh hō͘ Kong-hui. I ēng chin hoaⁿ-hí, chin kám-siā ê sim sêng-siū chiah ê siúⁿ-sù. Kong-hui soè chi̍t keng tiàm-á, bé chhâi-liāu kap í-á, iā bé chò ê ê chiam-chhia. I liâm-piⁿ chhiah 2, 3 siang lâi pâi tī tiàm-lāi sè ê po-lê-tû. āu-lâi I-koán ê chit-oân ū khì kā i chù-bûn. Bo̍k-su kap pa̍t lâng iā ū. Chit-tia̍p Kong-hui teh keng-êng chit khám tiàm. Nā m̄-sī tuì Eng-kok chiah ê gín-á ê thiàⁿ-thàng, tek-khak bē tit thang án-ni.
Lán chai Kong-hui kap i ê pē-bó ê sim ún-tàng moá-moá hoaⁿ-hí, éng-oán bô bē kì-tit.
e̍k-chiá hū-kì:
Chit chân sū ū nn̄g hāng chin hó ê kà-sī:－
(1) Chhim-sìn ê kî-tó ū toā kong-hāu.
(2) Eng-kok Chú-ji̍t-o̍h ê ha̍k-seng hoaⁿ-hí pang-chān boē bat kìⁿ-bīn ê gín-á pêng-iú. Che thang chò lán chèng Chú-ji̍t-o̍h ha̍k-seng ê bô͘-iūⁿ. (Oân).
漢羅（Ùi原文改寫）
光輝的故事
楊士養對蘭醫生娘的More stories from Formosa翻譯
1933.11, no. 584, pp. 14
（接前號第13面）
恁減采會淡薄奇怪，伊對in老父所講的話；總是伊的老父攏無受氣。 光輝是in父母的目睭的光，也in老父不止識，知受迷惑致到bē記得祈禱的事。 伊幾若擺共醫生娘講：伊基督徒的生活，對伊的囝的模範，有得著真大幫贊。 論伊的老母卻是真深信，真堅固的人。 伊的大囝光輝有toè伊的腳步。
光輝的祈禱有得著允准。 佇英國的朋友用疼的犧牲，有募集250箍欲予伊買一張做的的針車，siāng彼時英國主日學也寄200箍來欲予光輝。 伊用真歡喜，真感謝的心承受遮的賞賜。 光輝稅一間店仔，買材料佮椅仔，也買做的的針車。 伊連鞭刺2，3雙來排佇店內細的玻璃櫥。 後來醫管的職員有去共伊注文。 牧師佮別人也有。 這霎光輝teh經營這khám店。 若毋是tuì英國遮的囡仔的疼痛，的確bē得通按呢。
咱知光輝佮伊的父母的心穩當滿滿歡喜，永遠無bē記得。
譯者後記：
這chân事有兩項真好的教示：－
(1) 深信的祈禱有大功效。
(2) 英國主日學的學生歡喜幫贊boē捌見面的囡仔朋友。 這通做咱眾主日學學生的模樣。 （完）。