是贏抑是輸
Sī iâⁿ á-sī su
文獻資訊
| 項目 | 資料 |
|---|---|
| 作者 | 李水車 Lí Chuí-chhia |
| 卷期 | 台灣教會公報/芥菜子 |
| 卷期 | 第583卷 |
| 日期 | 1933/10 |
| 頁數 | 26-27 |
白話字（原文數位化）
Sī iâⁿ á-sī su ?
Lí Chuí-chhia
1933.10 (Koà-chhài-chí tē 93 hō) P.26-27
Goā-kok bó͘ só͘-chāi ū chi̍t ê phok-sū, siông-siông khoa-kháu thian-hā-tiong I sī tē-it phok-ha̍k ê lâng, put-lūn sím-mi̍h hè, I kóng ta̍k hāng chai, ta̍k hāng oē. Ū chi̍t ji̍t tú tī koe-chhī ê lō͘-piⁿ teh khai-káng ê sî, kóng thian-bûn soat tē-lí, thiaⁿ-kìⁿ ê lâng bô m̄ phah-chhiú hoan-gêng I ê phok-ha̍k. Tú-tn̄g hit-sî ū chi̍t ê chin phok-khiat ê siàu-liân lâng, thiaⁿ-kìⁿ I teh tâm-thain soat-tē, toā-siaⁿ teh khai-káng, hui-siông ê khoa-kháu, chiū tòng-boē-tiâu, peh--khí-lâi kā i mn̄g kóng, Phok-sū sian-siⁿ ah, khah sit-lé teh, in-uī goá tú-á thiaⁿ-kìⁿ lí ta̍k hāng chai, ta̍k hāng oē,si̍t-chāi chin kám-ho̍k sian0siⁿ ê phok-ha̍k to-lêng; chhì mn̄g lí chi̍t hāng, lí m̄-chai ū sím-mi̍h hong-hoat thang hō͘ sè-kài ê hái-chuí lóng ta á-bô ? Hit-sî phok-sū teh siūⁿ, nā kā i kóng bô hong-hoat, chiū chin kiàn-siàu, sit thé-biān, i só͘ khoa-kháu ê phok-ha̍k soà pìⁿ-choè mâu-tún, ciū ìn hit ê siàu-liân lâng kóng, Beh hō͘ sè-kài ê hái-chuí lóng ta, che sī bô oh ê sū. Siàu-liân lâng thiaⁿ-kìⁿ i án-ni kóng, chiū tng chèng-lâng ê bīn-chêng pek phok-sū tio̍h kap i saⁿ-su, chiū tuì phok-sū kóng, Lí nā-sī koh saⁿ-ji̍t oē hō͘ sè-kài ê hái-chuí lóng ta, goá su lí 3000 kho͘ ; nā-sī boē ta, lí ài su goá 3000 kho͘.
Phok-sū hō͘ hit ê siàu-liân lâng ti̍t-ti̍t bián-kióng, nā m̄-káⁿ kap i saⁿ-su chiū toā làu-khuì, ko͘-put-chiong kap i saⁿ-su. Hit ê siàu-liân lâng kiaⁿ-liáu phok-sū āu-ji̍t oē hoán-hiau, soà chio i tio̍h kap i khoè-iok chiah oē ēng-tit, khoè-iok kap hó, soà kiò hit toē-hng ū sìn-iōng ê lâng choè pó-jīn-lâng, khoè-iok hó, khoè-iok-su chi̍t lâng the̍h chi̍t thong, tāi-ke saⁿ-sî chiū lâng the̍h chi̍t thong hō͘ sè-kài ê hái-chuí ta, ún-tàng oē iâⁿ. iā hit ê phok-sū tńg-khì ê sî, hui-siông ê hoân-ló, kóng taⁿ tio̍h hāi lah, bô in tih-toaⁿ kap lâng saⁿ-su chit khoán bóng-tóng sū. Chit sî iáu m̄-káⁿ tuì phok-sū-niû kóng tang-sai, put-kò tí tī bîn-chhn̂g-nih ti̍t-ti̍t haiⁿ, ti̍t-ti̍t chhan, hoân-ló kàu boē-chia̍h boē khùn-tit, phok-sū-niû lia̍h-choè i sī phoà-pīⁿ, ia̍h m̄--sī siáⁿ-tāi? Phok-sū ìn kóng, chhiáⁿ kóng, kiám-chhái ū hong-hoat ia̍h-kú-káⁿ. Phok-sū hoah i, kóng Kā lí kóng sī ū lō͘-ēng sī bô ? Chóng-sī phok-sū-niû chài-saⁿ iau-kiû i tio̍h kóng, āu-lâi chiah kóng, Goá kin-á-ji̍t kap lâng khoè-iok chi̍t hāng ê bóng-tóng sū, tek-khak oē su lâng, soà chiong khoè-iok-su piaⁿ hō͘ phok-sū-niû khoàⁿ, phok-sū-miû chim-chiok tha̍k khoè-iok chi̍t piàn, chiū bah-bún-chhiò, tuì phok-sū kóng, Chit khoán ê sū bô tek-khak oē-su, chhiáⁿ bián hoân-ló chiū-sī.
Phok-sū-niû chim-chiok khoàⁿ khoè-iok ê tiâu-kiāⁿ, chiū tuì phok-sū kóng, Nā chiàu khoè-iok lí-hêng, lán tek-khak oē iâⁿ, phok-sū thiaⁿ-liáu chiū toā-siaⁿ hoah phok-sū-niû kóng, Lí chit ê cha-bó͘, kiám oē khah khiàng ta-po͘ mah ? Phok-sū-niû kóng, Chiah chhì-khoàⁿ, lí m̄-bián khì, goá tāi-lí lâi khì chiū-hó. Kàu khoè-iok ê ji̍t-chí chi̍t-ē kàu, phok-sū-niû chiū khoán 3000 kho͘ hē tī phê-pau-á lāi, kiò chi̍t chiah chhiú-chhia-á chiū ti̍t-ti̍t thoa kàu hit ê siàu-liân lâng ê chhù, chiū tuì i kóng, Kin-á-ji̍t, goá ê tiōng-hu sin-thé phoà-pīⁿ boē tit lâi, goá lâi tāi-lí oē ēng-tit á-boē? I ìn kóng , Lí nā su goá , ū 3000 kho͘ thang hō͘ goá, chiū chhìn-chhái lâng lâi tāi-lí lóng bô koan-hē. Phok-sū-niû kóng, Goá nā su lí 3000 kho͘, tī phê-pau-á lāi piān-piān, bián kiaⁿ bô. Hir 5 siàu-liân lâng chiū khì kiò hit ê pó-jîn ê lâng kap li̍p-hoē ê lâng beh lâi kái-koat chit ê tāi-chì. Phok-sū-niû chiū khí-lâi tuì hit ê siàu-liân lâng kap chèng-lâng soan-giân kóng, Ta̍k hāng tio̍h chiàu khoè-iok lâi kiâⁿ chiah oē ēng-tit, m̄-thang ū īⁿ-gī ê sū, chèng-lâng kóng tio̍h; hit ê siàu-liân lâng kóng, To m̄-sī siáu-jîn, kóng-oē boē chún-tit, thái-thó ū īⁿ-gī ê lí-iû. Hit-tia̍p phok-sū-niû chiong khoè-iok tha̍k chi̍t piàn hō͘ chèng-lâng thiaⁿ, kóng goá ê tiōng-hu sī kap lín khoè-iok kàu kin-á-ji̍t ē-po͘ 3 tiám cheng, beh hō͘ sè-kài ê hái-chuí lóng ta, sī bô ? Chèng-lâng ìn kóng, Bô chhò.
Phok-sū-niû chiū kóng, Chiàu khoè-iok, goá ê tiong-hu sī kan-ta kap lín khoè-iok sè-kài ê hái-chuí nā-tiāⁿ, í-goā kang , hô , khoe, ô͘, che lóng bô khoè-iok chāi-lāi ; taⁿ goá ē-po͘ 3 tiám-cheng beh hō͘ sè-kài ê hái-chuí lóng ta, chhiáⁿ lí tāi-seng chiong sè-kài ê kang, hô khoe, ô͘ ê chuí lóng cha̍h--khí-lâi, hō͘ i m̄-thang lâu-lo̍h chham tī hái. Hit ê siàu-liân lâng thiaⁿ-kìⁿ án-ni, chiū gāng-gāng bô oē than ìn, siūⁿ-lâi siūⁿ-khì to lóng bô sím-mi̍h hong-hoat thang cha̍h chiah ê chuí hō͘ i bî lâu lo̍h hái.
Lō͘-bé chèng-lâng phoàⁿ-toàn kóng, Nā-sī bô hong-hoat, eng-kai tio̍h su lâng. Phok-sū-niû tit-tio̍h 3000 kho͘ chiū chin hoaⁿ-hí, chē chhiú-chhia-á kín tńg-khì. Kàu chhù ê sî, phok-sū chiū mn̄g khoàⁿ sī iâⁿ, á-sī su ? Phok-su-niû ìn kóng, 3000 kho͘ kā i phāiⁿ tńg-lâi lah, m̄-chai sī iâⁿ á-sī su ? Phok-sū chiū mn̄g i ēng sím-mi̍h hong-hoat khì iâⁿ i, i chiū it-gō͘ it-cha̍p kóng hō͘ i thiaⁿ. Phok-sū thiaⁿ-liáu chiū kám-ho̍k phok-sū-niû ê châi-lêng iâⁿ-kè i. Tuì hit-tia̍p liáu-āu, m̄-káⁿ koh khoàⁿ-khin i kóng, Lí cht ê cha-bó͘, kiám oē khah khiàn ta-po͘ mah ?
Taⁿ siá chit chām, put-lūn sī ū si̍t á-sī bô si̍t, khiok bô toā koan-hē; put-kò sī beh hō͘ lán siūⁿ, hiān-sî tī siā-hoē-tiong siông-siông ēng khoè-iok saⁿ-khau, chiàu lán só͘ khoàⁿ si̍t-chāi sī chin oân-choân thang hoaⁿ-hí, m̄-kú tī khoè-iok tiâu-kiān-tiong , nā-ū chi̍t-sut-á bô tú-hó, bêng-bêng sī iâⁿ, chiū oē pìⁿ su, liáu-chîⁿ soà hō͘ lâng chhiò-gōng, só͘-í nā khoè-iok bô chim-chiok, siông-siông oē chhin-chhiūⁿ án-ni.
漢羅（Ùi原文改寫）
是贏抑是輸？
李水車
1933.10 芥菜子 p.26-27
外國某所在有一個博士，常常誇口天下中伊是第一博學的人，不論啥物貨，伊講逐項知，逐項會。有一日拄佇街市的路邊咧開講的時，講天文說地理，聽見的人無毋扑手歡迎伊的博學。拄當彼時有一個真phok-khiat 的少年人，聽見伊談天說地，大聲咧開講，非常的誇口，就擋袂tiâu，爬起來共伊問講，博士先生啊，較失禮咧，因為我拄仔聽見你逐項知，逐項會，實在真感服先生的博學多；試問你一項，你毋知有啥物方法通予世界的海水攏焦抑無？彼時博士咧想，若共伊講無方法，就真見笑，失體面，伊所誇口的博學紲變做矛盾，就應彼个少年人講，欲予世界的海水攏焦，這是無僫的事。少年人聽見伊按呢講，就當眾人的面前逼博士著佮伊相輸，就對博士講，你若是閣三日會予世界的海水攏焦，我輸你3000箍；若是袂焦，你愛輸我3000箍。
博士予彼的少年人直直勉強，若毋敢佮伊相輸就大漏氣，姑不將佮伊相輸。彼个少年人驚了博士後日會反hiau，紲招伊著佮伊契約才會用得，契約佮好，紲叫彼地方有信用的人做保認人，契約好，契約書一人提一通，大家相辭就人提一通予世界的海水焦，穩當會贏。也彼个博士轉去的時，非常的煩惱，講今著害啦，無因tih-toaⁿ佮相輸這款懵懂事。這時猶毋敢對博士娘講東西，不過佇佇眠床裡直直哼，直直chhan，煩惱到袂食袂睏得，博士娘掠做伊是破病，亦毋是啥事？博士應講，請講，kiám-chhái有方法亦久敢。博士伊，講共你講是有路用是無？總是博士娘再三要求伊著講，後來才講，我今仔日佮人契約一項的懵懂事，的確會輸人，紲將契約書 phiaⁿ予博士娘看，博士娘斟酌讀契約一遍，就肉紋笑，對博士講，這款的事無的確會輸，請免煩惱就是。
博士娘斟酌看契約的條件，就對博士講，若照契約履行，咱的確會贏，博士聽了就大聲喝博士娘講，你這个查某，敢會較khiàng查甫mah？博士娘講，才試看，你毋免去，我代理來去就好。到契約的日子一下到，博士娘就款3000箍下佇皮包仔內，叫一隻手車仔就直直拖到彼的少年人的厝，就對伊講，今仔日，我的丈夫身體破病袂得來，我來代理會用得抑袂？伊應講，你若輸我，有3000箍通予我，就chhìn-chhái人來代理攏無關係。博士娘講，我若輸你3000箍，佇皮包仔內便便，免驚無。彼个少年人就去叫彼个保人的人佮立會的人欲來解決這个事志。博士娘就起來對彼的少年人佮眾人宣言講，逐項著照契約來行才會用得，毋通有異議的事，眾人講著；彼的少年人講，都毋是小人，講話袂準得，thái-thó有異議的理由。彼疊博士娘將契約讀一遍予眾人聽，講我的丈夫是佮恁契約到今仔日下晡3點整，欲予世界的海水攏焦，是無？眾人應講，無錯。
博士娘就講，照契約，我的丈夫是干焦佮恁契約世界的海水爾爾，以外江，河，溪，湖，這攏無契約在內；今我下晡3點鐘欲予世界的海水攏焦，請你代先將世界的江，河溪，湖的水攏閘起來，予伊毋通流落摻佇海。彼的少年人聽見按呢，就愣愣無話通應，想來想去都攏無啥物方法通閘遮的水予伊bî流落海。
路尾眾人判斷講，若是無方法，應該著輸人。博士娘得著3000箍就真歡喜，坐手車仔緊轉去。到厝的時，博士就問看是嬴，抑是輸？博士娘應講，3000箍共伊揹轉來啦，毋知是嬴抑是輸？博士就問伊用啥物方法去贏伊，伊就一五一十講予伊聽。博士聽了就感服博士娘的才能贏過伊。對彼疊了後，毋敢閣看輕伊講，你即个查某，敢會較khiàn查甫 mah？
今寫這層，不論是有實是無實，卻無大關係；不過是欲予咱想，現時佇社會中常常用契約相輸，照咱所看實在是真完全通歡喜，毋過佇契約tiâu-kiān-中，若有一屑仔無拄好，明明是贏，就會變輸，了錢紲予人笑戇，所以若契約無斟酌，常常會親像按呢。