小傳

Sió-toān

文獻資訊

項目	資料
作者	施坦 Si Thán
卷期	台灣教會公報
卷期	第583卷
日期	1933/10
頁數	19

白話字（原文數位化）

Sió-toān

Si Thán kì

1933.10, no. 583, pp. 19

Phoaⁿ A-uî-khai-san ong, sī O͘-gû-lân Kàu-hoē iú-sò͘ ê jîn-bu̍t. I tī 1864 nî 1 goe̍h 28 ji̍t chhut-sì. Tī kin-nî 5 goe̍h 27 ji̍t pia̍t-sè, hióng-siū 69 hoè.

Hit ji̍t kò-pia̍t-sek, sui-jiân lo̍h toā-hō͘, iáu-kú ū kuí-nā pah lâng. Phí-jîn chò su-sek-chiá, kú-hêng chong-giâm ê sek. Thiaⁿ-tio̍h i it-seng ê lio̍k-le̍k, tāi-ke siū kám-kek, kàu lâu ba̍k-sái. Taⁿ kì i seng-pêng kuí hāng ê sū-gia̍p tī ē-bīn:－

1. Tuì siā-hoē. I tī Bêng-tī 9 nî, chiū ji̍p kàu-hoē ê sió-o̍h tha̍k-chheh 5 nî kú. Bêng-tī 13 nî, khì Tâi-lâm tha̍k Toā-o̍h (Sîn-ha̍k-hāu) poàⁿ-nî kú, uī-tio̍h to͘-ha̍p bô koh khì. Bêng-tī 26 nî, chò tūn-ióng ê si̍p-tiúⁿ. Bêng-tī 35 nî, chò thó͘-tē tiau-cha uí-goân. Bêng-tī 37 nî chò pó-chèng, liân kuí-nā jīm, kiōng tng 22 nî kú. Tāi-chèng 9 nî khí, chò O͘-gû-lân khu ê chóng-tāi 6 nî ê kú. iā chò sìn-iōng cho͘-ha̍p ê lí-sū kiōng 12 nî kú.

2. Tuì kàu-hoē. 1881 nî 3 goe̍h 20 hō, i sī 17 hoè, tuì Si Tāi-pi̍t Bo̍k-su niá sé-lé. 1901 nî tiòng-soán chò tiúⁿ-ló, liân chò 8 nî ê tiúⁿ-ló. āu-lâi sui-jiân bô tng-chit, iā put-chí koan-sim tī kàu-hoē. iā chò kàu-hoē châi-sán koán-lí-jîn.

3. I ê ka-têng. I kan-ta 1 lâm, Hok-goân kun, chêng iā bat tng chip-sū. Gō͘ ê cha-bó͘ sun, chi̍t ê kè Thoân-tō-su Chhoà Tiōng-gī, chi̍t ê kè Pán-lê Hāu-tiúⁿ, chi̍t ê kè pún-chng, chi̍t ê iáu boē kè. Chi̍t ê cha-po͘ sun, i chi̍t ê cha-bó͘ kiáⁿ kè Chan Chín-heng kun. I ê goân-phoè iáu tī-teh. I m̄-nā gâu chai-poê kiáⁿ-sun iā ū lâu che-chē châi-sán hō i ê kián-sun.

Toā ǹg-bāng i ê kián-sun, gâu o̍h sī-toā-lâng ê hó bô͘-iūⁿ lâi kui êng-kng Siōng-tè. A-bēng.

漢羅（Ùi原文改寫）

小傳

施坦 記

1933.10, no. 583, pp. 19

潘A-uî-khai-san翁，是烏牛欄教會有數的人物。 伊佇1864年1月28日出世。 佇今年5月27日別世，享壽69 歲。

彼一日告別式，雖然落大雨，猶久有幾若百人。 敝人做司式者，舉行莊嚴的式。 聽著伊一生的戮力，大家受感激，到流目屎。 今記伊生平幾項的事業佇下面：－

1. 對社會。 伊佇明治 9年，就入教會的小學讀冊5年久。 明治 13年，去台南讀大學（神學校）半年久，為著都合無閣去。 明治26年，做屯勇的 si̍p-tiúⁿ。 明治35年，做土地調查委員。 明治37年做保正，連幾若任，共當22年久。 大正9年起，做烏牛欄區的總代6年的久。 也做信用組合的里事共12年久。

2. 對教會。 1881年3月20號，伊是17 歲，tuì施大闢牧師領洗禮。 1901年中選做長老，連做8年的長老。 後來雖然無當職，也不止關心佇教會。 也做教會財產管理人。

3. 伊的家庭。 伊干單1男，Hok-goân君，前也捌當執事。 五個查某孫，一個嫁傳道師蔡忠義，一個嫁Pán-lê校長，一個嫁本庄，一個猶未嫁。 一個查埔孫，伊一個查某囝嫁曾振興君。 伊的元配猶tī-teh。 伊毋旦gâu栽培囝孫也有留這濟財產予伊的囝孫。

大向望伊的囝孫，gâu學序大人的好模樣來歸榮光上帝。 阿門。