喪喜事改良
Song Hí-sū Kái-liông
文獻資訊
| 項目 | 資料 |
|---|---|
| 作者 | 洪拓 Âng Thuh |
| 卷期 | 台灣教會公報 |
| 卷期 | 第583卷 |
| 日期 | 1933/10 |
| 頁數 | 17-18 |
白話字（原文數位化）
Song Hí-sū Kái-liông
(Chheng-chuí：Âng Thuh).
1933.10 (583 koàn) P.17-18
Hiān-sî siā-hoē ta̍k hong-bīn lóng ū teh kái-liông, oāⁿ-sin . Lán chò Ki-tok-tô͘, tek-khak m̄-thang toè siā-hoē ê bé-āu, in-uī lán sī siā-hoē ê kng-teng, ū chhoā chèng jîn-luī hiòng-siōng ê chek-jīm tī-teh. Só͘-í kìⁿ-nā koan-hē siā-hoē ê pháiⁿ hong-sio̍k, bô ha̍p tō-lí ê , lán tio̍h hó táⁿ kái-liông.
Lūn Song Hí-sū, ū chē-chē só͘-chāi kái-liông liáu, put-chí lí-sióng. Chóng-sī iáu ū lâng bô sím-mi̍h chàn-sêng. Chiàu goá ê gû-kiàn, siá kuí-kù tī ē-bīn hō͘ tāi-ke chò chham-khó :─
1.Hí-sū
1.M̄-thang chò piáⁿ pun hō͘ lâng, in-uī pun piáⁿ hō͘ lâng, chiū-sī teh kā lâng thó thiam-chng. Nā-sī ū lâng lâi hō-lé--ê, kè liáu chiah phah-sǹg. Khah hó, chhin-chok í-goā m̄-bián.
-
Phèng-kim m̄-bián kóng loā-chē, iû-chāi i lâi, chhut-chāi lán khì. Khah hó, i-chiûⁿ kè-chng m̄-thang chò siuⁿ chē, in-uī pò͘-luī, ho̍k-chong, ta̍k nî teh piàn. Chhâ-liāu nā tio̍h khiàm--ê, chiah be; bô khiàm--ê, m̄-thang bé; ke tìn uī, chheng-kiat huì-khì. Chiong hiah ê chîⁿ kià tī cho͘-ha̍p , ū sî kan-ta hiah ê lī-sek to ēng bē liáu.
-
Ti-pêng kap siaⁿ, tio̍h m̄-thang ēng, in-uī to khai-huì ; chīn só͘ ē--ê, nā ē-tit khah séng,sī khah hó.
Kiáⁿ-sài chioh chîⁿ chhoā bó͘, cha-bó͘-kiáⁿ kè liáu, iā ū hūn hū-chè ê kan-khó͘.
Ū chi̍t ê siàu-liân lâng chin hó phín-hēng, lia̍p-chek 500 kho͘ beh chhoā bó͘, uī-tioh9 tiūⁿ-lâng ê iau-kiû, tio̍h koh chioh 200 kho͘ sio-thiⁿ. Kiat-kiok tiūⁿ-lâng iā-sī bô thàn chîⁿ, chiū-sī bé chi̍t koá bô ha̍p-sî ēng ê mi̍h, pān chhiⁿ-chhau khai-liáu--khì. án-ni iáu-boē chhoā bó͘ ū chhun 500 kho͘, chhoā liáu soà khiàm 200 kho͘ ; koh ke lâng tàu chia̍h pn̄g. Siat-sú chi̍t ê lâng nā ū 3 ê hāu-siⁿ, chi̍t-sì-lâng tio̍h uī-tio̍h chhoā sim-pū lâi hù-chè. ǹg-bāng tāi-ke tio̍h saⁿ thé-thiap, saⁿ bián-lē, lâi si̍t-hêng.
4.Beh chhoā-ê, nā ē tit kái bô hō͘ lâng hó-lé, kan-ta chhiáⁿ tām-po̍h ti-kí ê pêng-iú kap chhin-cho̍k chiū hó.
2.Song-sū
Lâng sí to teh chhám, nā bô chiat-khiām, hū-chè koh-khah chhám.
1. koan-bo̍k 20 kho͘ í-lâi--ê chiū hó.Ū bó͘ bo̍k-su ê hū-jîn-lâng koè-sin, kóng koan-bo̍k m̄-thang koè 10 kho͘. I sī hó-gia̍h bo̍k-su, thoân-kàu chū-huì. chû-siān chò chē-chē;m̄-sī m̄-kam ka i khai, sī m̄-bián khai ; siat-sú 1000 kho͘ ê koan-bo̍k, iā-sī bô lō͘-ēng, iàu-kín tio̍h khiā bōng-pâi.
- M̄-thang chē chhia sàng-chòng. Ū chîⁿ lâng koè-sin, phah-sǹg m̄-bián chhiáⁿ pa̍t kàu-hoē ê lâng lâi sàng-chòng, ke khai-huì. koh siū phoe-phêng, pîn-hù chú-gī. In-uī sàn-lâng nā koè-sin, bô thang kā lâng chhut chhia-huì, chiū chió lâng sàng. Só͘-í nā khah ē-tit-koè--ê koè-sin,i thang kià-hù chē-chē tī kàu-hoē, lâi chò hó-sū, khah ū êng-kng Siōng-chú.
3. Chia̍h kiâm-moê, m̄-thang pān chhiⁿ-chhau. Chiah chiú, nā ē-tit m̄-bián Chiah, sī koh-khah lí-sióng.
4.Siat-sú nā ài piáu tiàu-uì ê sim, bo̍h-tit-ēng liân-te̍k, in-uī bô ha̍p-ēng, phah sńg chîⁿ, khah hó ēng hiān-kim hō͘ song-ka chiū hó.
Hoān-sū chiú, hun, nā ē tit lóng bô ēng, sī tē-it hó. Lán Ki-tok-tô͘ tio̍h chò bô͘-hoān.
Put-châi tuì chit nn̄g-tiám, ū kám-kak hiān-sî kàu-hoē-lāi iáu ū chē-chē bô tú-hó ê só͘-chāi, só͘-í hó-táⁿ siá kuí-jī,nā ē tit chò lia̍t-uī ê chham-khó, put-chí bān-hēng. Nā ū m̄ tú-hó ê só͘-chāi, ǹg-bāng iú-chì ê hiaⁿ-ché, siá chhut ko-kiàn lâi saⁿ-kap bián-lē, sī sim só͘ goān.(Chheng-chuí：Âng Thuh).
漢羅（Ùi原文改寫）
喪喜事改良
(清水：洪拓)。
1933.10 (583卷) P.17-18
現時社會逐方面攏有咧改良，換新。咱做基督徒，的確毋通綴社會的尾後，因為咱是社會的光燈，有chhoā眾人類向上的責任佇咧。所以見若關係社會的歹風俗，無合道理的 ，咱著好膽改良。
論喪喜事，有濟濟所在改良了，不止理想。總是猶有人無啥物贊成。照我的愚見，寫幾句佇下面予大家做參考：─
1.喜事
1.毋通做餅分予人，因為分餅予人，就是咧共人討添妝。若是有人來賀禮的，過了才拍算。較好，親戚以外毋免。
2.聘金毋免講偌濟，由在伊來，出在咱去。較好，衣裳嫁妝毋通做傷濟，因為布類，服裝，逐年咧變。柴料若著欠的，才買；無欠的，毋通買；加鎮位，清潔費氣。將遐的錢寄佇組合，有時kan-ta遐的利息都用袂了。
3.Ti-pêng佮聲，著毋通用，因為就開費；盡所會的，若會得較省，是較好。
囝婿借錢chhoā某，查某囝嫁了，也有份負債的艱苦。
有一個少年人真好品行，粒積500箍欲娶某，為著丈人的要求，著閣借200箍相添。結局丈人也是無趁錢，就是買一寡無合時用的物，辦腥臊開了去。按呢猶未娶某有賰 500箍，chhoā了紲欠200箍；閣加人湊食飯。設使這个人若有3个後生，一世人著為著chhoā新婦來赴債。向望大家著相體貼，相勉勵，來實行。
4.欲chhoā的，若會得改無予人好禮，kan-ta請淡薄知己的朋友佮親族就好。
2.喪事
人死都咧慘，若無節儉，負債閣較慘。
1.棺木20箍以來的就好。有某牧師的婦人人過身，講棺木毋通過10箍。伊是好額牧師，傳教自費。慈善做濟濟；毋是毋甘共伊開，是毋免開；設使1000箍的棺木，也是無路用，要緊著徛墓牌。
2.毋通坐車送葬。有錢人過身，扑算毋免請別教會的人來送葬，加開費。閣受批評，貧富主義。因為散人若過身，無通共人出車費，就少人送。所以若較會得過的過身，伊通寄付濟濟佇教會，來做好事，較有榮光上主。
3.食鹹糜，毋通辦腥臊。食酒，若會得毋免食，是閣較理想。
4.設使若愛表弔慰的心，莫得用聯軸，因為無合用，拍損錢，較好用現金予喪家就好。
凡事酒，薰，若會得攏無用，是第一好。咱基督徒著做模範。
不才對這兩點，有感覺現時教會內猶有濟濟無拄好的所在，所以好膽寫幾字，若會得做列位的參考，不止萬幸。若有毋拄好的所在，向望有志的兄姊，寫出高見來相佮勉勵，是心所願。(清水：洪拓)。