信，會看著上帝的榮光
Sìn, ē khoàⁿ-tio̍h Siōng-tè ê êng-kng
文獻資訊
| 項目 | 資料 |
|---|---|
| 作者 | 陳樹lîm Tân Chhiū-lîm |
| 卷期 | 台灣教會公報 |
| 卷期 | 第583卷 |
| 日期 | 1933/10 |
| 頁數 | 18 |
白話字（原文數位化）
Sìn, ē khoàⁿ-tio̍h Siōng-tè ê êng-kng
Tân Chhiū-lîm kì
1933.10 (583 Koàn)p.18
Iâ-so͘ kóng, ‘’Koh-oa̍h kap oa̍h-miā sī chāi tī Goá, sìn Goá ê lâng sui-bóng sí, Goá beh hō͘ i koh oa̍h. ‘’
Goá ê tióng-lú 11 hoè, tī sin-le̍k 7 goe̍h 11 àm, khí thò͘-sià ê chèng, hoat jia̍t pak-tó͘ thiàⁿ, chhuì-ta. Thâu-mê chhiáⁿ i-seng, chia̍h lo̍h chù-siā bô hāu. Kiōng chhiáⁿ 3 ê se-i, chi̍t ê hàn-i, pēⁿ ná tîm-tāng.
Tuì 11 hō kàu 20 hō, 8 ji̍t kú lóng bô chia̍h. Kha-chhuí bô la̍t, khí-lo̍h tio̍h ēng phō, iā bē hoan-sin, sù-chi iā bē tín-tāng; kan-ta chhuì ē kiò kan-khó͘ nā-tiāⁿ. āu-lâi kiò goá tio̍h chhiáⁿ Chú-to͘ koaⁿ lâi kā i kî-tó, i pún-sin iā teh kî-tó. Goá chiū khí chhiáⁿ Chú-to͘ koaⁿ lâi. Gin-ná chin hoaⁿ-hí, kóng i bē kan-khó͘, iā kóng i ài khì toà pài-tn̂g. Chú-to͘ koaⁿ iā kóng kin-á-ji̍t mài chia̍h io̍h chhì-khoàⁿ, kàu thiⁿ-kng chèng-thâu nā ū khah khin, chiu ēng kî-tó, mài ēng io̍h.
Kàu 21 hō ū khah hó, ba̍k-chiu iā ē thí-khui. Goán siūⁿ nā beh āiⁿ khì pài-tn̂g, gín-ná chiah guî-hiám, nā tī poàⁿ-lō͘ sit-sū chin huì-khì. Goá thàu-hō͘ khì chhiáⁿ Chú to͘ koaⁿ, Chú-to͘ koaⁿ thàu-hō͘ kiâⁿ. Kàu-uī, chin-chē lâng tī-teh. Tuì Chú-to͘ kóng, Lí àn-choáⁿ kóng m̄-thang chia̍h io̍h, lí beh hāi-sí lâng mah ? Chú-to͘ koaⁿ bô ìn, kiò goán lé-pài tha̍k Sèng-keng, kî-tó. Chú-to͘ koaⁿ tuì Siōng-tè kiû kóng, Lí nā beh in-tián hō͘ chit ê gín-ná hó, lâi hián-bêng Lí ê koân-lêng, chiū hō͘ hō͘ chēⁿ thang āiⁿ khì pài-tn̂g kî-tó, m̄-bián hō͘ lâng kiáu-jiáu. Kó-jiân hó-thiⁿ, gin-ná iā khah cheng-eng. Goán chiū pī-pān beh āiⁿ lâi pài-tn̂g. Lo̍k-khut-chng kàu pài-tn̂g 4 lí ê hn̂g, tāi-ke kóng tek-khak āiⁿ bē kàu. Soà kóng goán sī teh siáu, ki-chhì goán sī beh āiⁿ khì chò chín-toàn. Chú-to͘ koaⁿ kóng, chò lí āiⁿ khì, bô iàu-kín, ún-tàng hó, an-sim oá-khò Chú. Kàu pài-tn̂g, lâi khoàⁿ ê lâng kóng sī beh āiⁿ lâi chò chín-toàn khak lī-piān. Goán kóng , sī beh lâi chia kî-tò khah lī-piān,iā m̄ ēng io̍h. Tāi-ke thiaⁿ-liáu, chhìn-chhiò kóng, gín-ná to bē tín-tāng lah , kî-tó ē hó, goán m̄ sìn.
Pài 5 àm tī pài-tn̂g, tāi-ke thè goá ê kiáⁿ kî-tó, chèng-thâu chiām-chiām hó. Kàu 12 tiám , gín-ná ē tín-tāng, ē hoan-sin. Goá chiū peh-khí-lâi kám-siā Chú. Kàu thiⁿ-kng ē peh-khí-lâi chē, soà ē lo̍h-lâi kiâⁿ, goá beh kā i khan, i kóng, m̄-bián, Chú hō͘ goá ū la̍t thang kiâⁿ, iā ē chia̍h moê.
Kàu 23 hō lé-pài, hó-hó lah, tāi-ke kî-koài Siōng-tè ê koân-lêng. Kàu 30 hō lé-pài liáu, tńg-lâi goán chhù kiâⁿ 4 lí-lō͘. Pài-it chiū khì liàm thô͘-tāu. Goá lóng bô ēng chu-ióng liāu kā i tiau-ióng. Chóng-sī i ê bīn-sek ti̍t-ti̍t âng-gê. Taⁿ chin ióng lah, kám-siā Chú, Siōng-tè bô pàng-sak goá, kan-khó͘ ê sî, I chò goá ki̍p-sî ê pang-chān, chò goá ê khuì-la̍t. Só͘-í goā siông-siông beh kám-siā I.
漢羅（Ùi原文改寫）
信，會看著上帝的榮光
陳Chhiū-lîm記
1933.10 (583卷) p.18
耶穌講，「閣活佮活命是在佇我，信我的人雖罔死，我欲予伊閣活。」
我的長女11歲，佇新曆7月11暗，起吐瀉的症，發熱腹肚疼，嘴乾。頭暝請醫生，食落注射無效。共請3个西醫，一个漢醫，病若ná沉重。
對11號到20號，8日久攏無食。跤手無力，起落著用抱，也袂翻身，四肢也袂振動；焦干喙會叫艱苦若定。後來叫我著請主to͘官來共伊祈禱，伊本身也咧祈禱。我就起請主to͘官來。囡仔真歡喜，講伊袂艱苦，也講伊愛去蹛拜堂。主to͘官也講今仔日莫食藥試看，到天光症頭若有較輕，就用祈禱，莫用藥。
到21號有較好，目睭也會 thí開。阮想若欲偝去拜堂，囡仔才危險，若佇半路失事真費氣。我透雨去請主to͘官，主to͘官透雨行。到位，真濟人佇咧。對主-to͘講，你按怎講毋通食藥，你欲害死人mah？主to͘官無應，叫阮禮拜讀聖經，祈禱。主to͘對上帝求講，你若欲恩典予這个囡仔好，來顯明你的權能，就予hō͘ chēⁿ通偝去拜堂祈禱，毋免予人攪擾。果然好天，囡仔也較精英。阮就備辦欲偝來拜堂。lo̍k-khut-chng到拜堂4里的遠，大家講的確偝袂到。紲講阮是咧痟，ki-chhì阮是欲偝去做診斷。主to͘官講，做你偝去，無要緊，穩當好，安心倚靠主。到拜堂，來看的人講是欲偝來做診斷較利便。阮講，是欲來遮祈禱較利便，也毋用藥。大家聽了，chhìⁿ笑講，囡仔就袂振動啦，祈禱會好，阮毋信。
拜5暗佇拜堂，大家替我的囝祈禱，症頭漸漸好。到12點，囡仔會振動，會翻身。我就peh起來感謝主。到天光會 peh起來坐，紲會落來行，我欲共伊牽，伊講，毋免，主予我有力通行，也會食糜。
到23號禮拜，好好啦，大家奇怪上帝的權能。到30號禮拜了，轉來阮厝行4里路。拜一就去捻土豆。我攏無用滋養料共伊調用。總是伊的面色直直紅牙。今真勇啦，感謝主，上帝無放拺我，艱苦的時，伊做我及時的幫贊，做我的氣力。所以外常常欲感謝伊。