介紹藥方
Kài-siàu io̍h-hng
文獻資訊
| 項目 | 資料 |
|---|---|
| 作者 | O.P.E. |
| 卷期 | 台灣教會公報 |
| 卷期 | 第583卷 |
| 日期 | 1933/10 |
| 頁數 | 6-7 |
白話字（原文數位化）
Kài-siàu io̍h-hng
(O.P. E. kì)
1933.10 583koàn p.6
(Chiap-soà 582 koàn, 9goe̍h, tē 7 bīn)
Goā-kho
- Tîⁿ-sin choâ. ēng Phû-iông-á-hio̍h(sī hū-jîn-lâng teh chhah, chò tû-khì thâu-pho͘ ê lō͘-ēng, hit hō. M̄-sī Káu-thâu phû-iông), tuî iù-iù, gô Tê-á-iû. Gô kàu Phû-iông-hio̍h lo͘-lo͘ uî-tō͘.
Gô hó, chiah chham chi̍t-sut-á iâm, lā hō͘ i chiâu, chiū phâng khí--lâi. Thèng-hāu kàu la-lun-sio (m̄-thang kàu léng-léng), chiah ēng chheng-khì ê ke-mn̂g,á-sī sin-pit kā i chhéng. Nā beh koh boah, tio̍h koh un sio.
Tîⁿ-sin choâ ê khoán-sit (chèng-chōng), chhin-chhiūⁿ Hoé-nâ-toâⁿ, put-kò chhin-chhiūⁿ Káu-kha-jiah , âng-kha, chiām-chiām chìn-hêng, teh tîⁿ seng-khu. ia̍h chiūⁿ , ia̍h thiàⁿ , koh sio-jia̍t.
- Thàu-chiúⁿ choâ. ēng Saⁿ-kha-pih ê hio̍h(Tiong-pō͘ kiò-chò Saⁿ-kha-hó͘. Sī soan-tîn, m̄-sī khiā châng. Muí-gím 3 hio̍h. Ta̍k hio̍h hóng-hut chhin-chhiūⁿ pih, só͘-í kiò-chò Saⁿ-kha-pih), hô jiō, chhò͘, chiú hiâⁿ kún chhut ian (cheng-khì) lâi hahN. HahN kàu chí thiàⁿ, chiah hô͘ hiah ê hio̍h khí-lâi tuî iù-iù kā i kô͘.
Bô lūn chhiú á-sī kha ê Thàu-chhiúⁿ-choâ, lóng ē-ēng--tit.
Thàu-chiúⁿ ê ì-sù, chiū-sī kha-poâⁿ á-sī chhiú-chiúⁿ siⁿ lia̍p-á nng-pêng sio-thàu. Ū-sî bat tì-kàu chéng-thâu-á lut-chat, iû-goân hó ēng.
- Têng-chi̍h choâ (= Tī chi̍h ê ē-bīn koh siⁿ chi̍t ê sè-sè ê chi̍h, ti̍t-ti̍t chhiūⁿ Iam-ke-lâ, chìn-hêng thàu ji̍p nâ-âu). ēng chiuⁿ-chû-chháu (Pia̍t-miâ Pìn-thio-á-chháu, káu-boé-chháu, Hīⁿ-kau-á chháu, Jiàu-bīn hông) ê hio̍h joê-iâm, ēng joa̍h-pò͘ (á-sī ga-jeh) lâi pau kui-lia̍p, chiah chìm bí-chhò͘ , chìm kàu chhò͘ chhim-ji̍p , chiah the̍h khí-lâi kâm. Kâm liáu ē lâu-noā, lóng tio̍h phuì hiat-ka̍k. Nā kâⁿ chhuì-ta, á-sī kâⁿ sàu, chiū ēng thâu, hô chuí choaⁿ chò tê thang lim.
漢羅（Ùi原文改寫）
介紹藥方
(O. P. E. 記)
1933.10 583卷 P.6
(接續582卷，9月8，第7面)
外科
-
纏身蛇。用芙蓉仔葉(是婦人人咧插，做除去頭部的路用，彼號。毋是狗頭芙蓉)，捶幼幼，熬茶仔油。熬到芙蓉葉lo͘-lo͘ uî-tō͘。熬好，才摻一屑仔鹽，抐予伊齊，就捧起來。聽候到拉圇燒 (毋通到冷冷)，才用清氣的雞毛，抑是新筆共伊筅。若欲閣抹，著閣溫燒。纏身蛇的款式(症狀)，親像Hoé-nâ-toâⁿ，不過親像狗腳跡，紅跤，漸漸進行，咧纏身軀。亦癢，亦疼，閣燒熱。
-
透掌蛇。用三跤鱉的葉(中部叫做三跤虎。是旋藤，毋是徛叢。每gím 3葉。逐葉彷彿親像鱉，所以叫做三跤鱉)，熬尿，醋，酒燃滾出煙(蒸汽)來熁。熁到止疼，才撈遐的葉起來捶幼幼共伊糊。無論手抑是跤的透掌蛇，攏會用得。透掌的意思，就是腳盤抑是手掌生粒仔兩爿相透。有時捌致到指頭仔黜節，猶原好用。
-
重舌蛇(=佇舌的下面閣生一个細細的舌，直直像閹雞蜊，進行透入嚨喉)。用螿蜍草(別名Pìn-thio-á-草，狗尾草，耳鈎仔草，抓面黃)的葉挼鹽，用熱布 (抑是ga-jeh)來包規粒，才浸米醋，浸到醋深入，才提起來含。含了會流瀾，攏著呸 hiat-ka̍k。若含嘴乾，抑是含嗽，就用頭，撈水煎做茶通啉。
(待續)