黃Hián-chiong君的行述
N̂g Hián-chiong kun ê hêng-su̍t
文獻資訊
| 項目 | 資料 |
|---|---|
| 作者 | 蔡椪 Chhoà Phòng |
| 卷期 | 台灣教會公報 |
| 卷期 | 第582卷 |
| 日期 | 1933/9 |
| 頁數 | 11 |
白話字（原文數位化）
N̂g Hián-chiong kun ê hêng-su̍t
1933.09(582Koàn) p.11
Chhoà Phòng kì
Hián-chiong kun sī 21 hoè, hiòng-chì iú-bōng ê chhêng-liân. I ê lāu-pē N̂g En̂g sàng, sī chò pè Ē Tiong-chiu kàu-hoē hiān-jīm ê Tiúⁿ-ló.
Tī Chiau-hô 7 nî 4 goe̍h, ū ji̍p Tang-kiaⁿ Tiong-iong Tāi-ha̍k ê Hoat-ha̍k kho. Tú tha̍k chi̍t ha̍k-kî liáu, soà-jiám-tio̍h pēⁿ. āu-lâi tńg-lâi, khì ji̍p Tâi-lâm Sin-lâu Pēⁿ-īⁿ. Tiàm 6 goe̍h poàⁿ ji̍t kú, chám-jiân ū kong-hāu. Jiân-āu chhut-īⁿ tńg-khì chhù-ni̍h ( chiū-sī Toā-thâm) tiau-ióng ; tāi-seng khiok pêng-siông; chóng-sī kàu tī 4 goe̍h 19 hō, hut-jiân koh khí-pēⁿ hoat-jia̍t, tuì án-ni ji̍t-ji̍t tîm-tāng. Kàu tī 5 goe̍h 1 hō ngó͘-āu 9 tiám, chin-chiàⁿ tit-tio̍h Chú tháu-pàng i khó͘-thàng ê kat, an-jiân seng-thian tńg-khì Thiⁿ Pē tau.
Beh lîm-chiong ê sî, lūn i ê thài-tō͘ kap só͘ kóng ê oē, chin thang kám-kek lâng.
Hit-sî sim-chōng sui-jiân bô sím-mi̍h la̍t, iáu-kú chin chhut-la̍t kiû-kiò Chú, jīn-choē, thó͘-khuì kóng, ‘’ Goá chū-sè koè-thâu hù-kuì, kin-á-ji̍t eng-kai siū-tio̍h chit khoán.’’ Koh kóng, ‘’Kho-ha̍k bô lō͘-ēng, lóng sī ké--ê, to̍k-to̍k Siōng-tè sī chin--ê.’’ Ì-sù sī chiàu i-seng só͘ pò, khah sím-mi̍h ko-kuì io̍h to ū ēng--tio̍h, chóng-sī boē-oē i i ê pēⁿ.
āu-lâi chhiat-chhiat kî-tó kóng, ‘’Chú ah ! Lí nā lâu goá ê sèⁿ-miā, goá tek-khak beh chò Lí ê kan-chèng; chóng-sī nā chhut tī Lí ê chí-ì, kiû Lí khoài-khoài hō͘ goá lī-khui sè-kan.’’ Koh kóng, ‘’ Chú ah, goá ū hoān-choē tī Lí, Lāu-pē ah , goá iā ū tī lí, tio̍h sià-bián goá.’’ Lāu-bó teh iu-būn, tuì i kóng, ‘’M̄-thang háu , iā m̄-thang hoân-ló , tio̍h chiàu-kò͘, goá nn̄g ê sió-tī; chai-poê hō͘ in kàu-toā sêng-kong, goá iā beh pang-chān i.’’
Chiah ê oē kóng soah, chiū gîm tek-sèng ê Chàn-bí-koa, siang-chhiú kia̍h koân chiū tiām--khì. Si̍t-chāi chin hēng-hok lah！I ê pē-bó khoàⁿ-kìⁿ an-nì,sim toā-toā siū an-uì. Kàu chhe 3 ē-pō͘ kú-hêng kò-pia̍t-sek; chò sek ê sî, chin giâm-siok. Hoē chòng-chiá pah goā miâ, tāi-ke chin m̄-kam. Goān Siōng-chú si-in kian-kò͘ in ê ka-cho̍k !!!
漢羅（Ùi原文改寫）
黃Hián-chiong君的行述
1933.09 582卷 p.11
蔡椪 記
Hián-chiong君是21 歲，向志有望的青年。伊的老爸黃榮sàng，是做pè Ē中洲教會現任的長老。
佇昭和7年4月，有入東京中央大學的法學科。拄讀一學期了，紲染著病。後來轉來，去入台南新樓病院。踮6月半日久，嶄然有功效。然後出院轉去厝裡(就是大潭) 調養；代先卻平常；總是到佇4月19號，忽然閣起病發熱，對按呢日日沉重。到佇5月1號午後9點，真正得著主敨放伊苦痛的結，安然升天轉去天父兜。
欲臨終的時，論伊的態度佮所講的話，真通感激人。
彼時心臟雖然無啥物力，窈閣真出力求叫主，認罪，吐氣講，「我自細過頭富貴，今仔日應該受著這款。」閣講，「科學無路用，攏是假--的，獨獨上帝是真--的。」意思是照醫生所報，較啥物高貴藥就有用--著，總是袂會醫伊的病。
後來切切祈禱講，「主矣 ！你若留我的性命，我的確欲做你的干證；總是若出佇你的旨意，求你快快予我離開世間。」閣講，「主矣，我有犯罪佇你，老爸矣 ，我也有佇你，著赦免我。」老母咧憂悶，對伊講，「毋通吼，也毋通煩惱，著照顧，我兩个小弟；栽培予in到大成功，我也欲幫贊伊。」
遮的話講煞，就吟得勝的讚美歌，雙手舉懸就恬--去。實在真幸福啦！伊的父母看見按呢，心大大受安慰。到初3下晡舉行告別式；做式的時，真嚴肅。會葬者百外名，大家真毋甘。願上主施恩堅固in的家族！！！