台中區ê思想
Tâi-tiong khu ê Su-siúⁿ
文獻資訊
| 項目 | 資料 |
|---|---|
| 作者 | 楊註 Iûⁿ Chù |
| 卷期 | 台灣教會公報 |
| 卷期 | 第582卷 |
| 日期 | 1933/9 |
| 頁數 | 19-20 |
白話字（原文數位化）
Tâi-tiong khu ê Su-siúⁿ
1933.09 (582koàn) P.19
Iûⁿ Chù
(Chiap téng-koàn 17 bīn)
(C) Chū-ióng. Bat kóng chek-li̍p ki-pún-kim, tuì Khu-gī-hoē ê sîchiū ū gī-tiāⁿ , kàu Tiong-hoē ê sî ia̍h ū kóng kuí-nā hoê : (1) Pún-tn̂g tio̍h chek-li̍p (Khu-gī-hoē ū gī-tiāⁿ). (2) Tiong-hoē tio̍h chek-li̍p-kim,í-keng phài Kí Un-jiû chò pō͘-tiúⁿ, N̂g Jîn-siū chò su-kì, Só͘ Chín-hui chò koè-kè. (3) Kok Tông-hoē ka-tī tam-tng it-chhè ê só͘-huì, chhiáⁿ bo̍k-su ia̍h hó,só͘-í 2,3 nî kú chhiáⁿ 10 miâ bo̍k-su. M̄-nā án-ni , suî-lâng ê Chi-hoē, Káng-gī-só͘ , Tông-hoē lóng siūⁿ beh ka-tī tam-tng só͘-huì. (uī-tio̍h án-ni , ki-pún-kim lia̍h-chò tē-jī iàu-kín nā-tiāⁿ). (4) Nā bē tam-tng ê Chi-hoē, sàng hō͘ Chiang-hoà ke chhiáⁿ Kí Un-jiû chò sûn-hoê Bo̍k-su. Koh nn̄g nî chiah kàu-jīm. (5) Nā-sī Káng-gī-só͘ bô lâng káⁿ hū-tam--ê,kui sin Soan-tō-hoē siat-hoat. Tiong-hoē Boán-chhan āu tio̍h hiàn-kim chò chit hāng ê lō͘-ēng.(6) Nā ū siū Kàu-sū-hoē ê pó͘-chō͘-kim , Chi-hoē--ê, kui Tiong-hoē ê koè-kè. Nā bē-tit pó͘-chō͘ ê sî, Chiang-hoà ê Tông-hoē kap sin Soan-tō-hoē tio̍h siat-hoat, kap Tiong-hoē chham-siông chìn-hêng hong-chiam.
(D) Chū-thoân. Chū-thoân ê ì-sù, m̄-sī hō͘ pa̍t lâng tàu siat-hoat, sī ka-tī tio̍h chò chú-lâng ê chek-jīm, lâi khoán-thāi èng-chia̍p ka-tī ê kang-jîn, í-ki̍p soan-kàu-su ê chīn-tiong phah-piàⁿ hùn-heng--ê, á-sī ûn-ûn-á tàu pò͘-tō--ê, lóng hó.
Só͘-í kóng si̍t-chāi, chú-lâng tio̍h khah tn̂g, lâng-kheh tio̍h khah té.Tek-khak ē án-ni , put-kò m̄-chai tn̂g--ê, tn̂g loā-kú (Kiám-chhái 10,000 nî nā-tiāⁿ). Té--ê, té loā-kú (kiám-chhái 1,000 nî nā-tiāⁿ). Si̍t-chāi bô chi̍t ê lâng ē chai ; to̍k-to̍k Pē chai nā-tiāⁿ.
Bat chū-thoân Iâ-so͘ ê ‘’chū-iû,pêng-téng, phok-ài, hi-seng, thoân-kiat.’’ Thoân-kiat nā tāi-seng chiū khak hó , ài toā-toā chù-ì. In-uī hoē-iú sī tuì chū-iû sǹg-khí, kàu boé-chām chiah thoân-kiat, si̍t-chāi chám-jiân khah bān.
(E) Chū-tī Bat kóng, ‘’Chiàu Khu-gī-hoē gī-koat ê chiap-soà, kàu Tiong-hoē ê sêng-li̍p. Hô-hoē chò ki-chhó͘, soà kàu Jīm-chit-choē, Sió-hoē, Tiong-hoē. M̄-sī kan-ta án-ni nā-tiāⁿ, tio̍h kait-liân Tāi-hoē, tio̍h kau-poê Bó-hoē, Tâi-oân Tāi-hoē.’’
Bat kóng . ‘’Bó-hoē ê Kàu-sū-hoē, chiū-sī ti̍t-chiap ê Bó-hoē, ū tāi-chì m̄-bián tek-khak tuì Táng-sū pín, Koh in nā beh chānchîⁿ, chān kang tàu tī-lí, lóng bô the-sî.’’ Siat-sú in m̄-bián chān lán ê chîⁿ, kan-ta beh chān kang , tàu tī-lí , goá siūⁿ la̍h sī tio̍h toā-toā kā in siàu-liām,seh to-siā.
詩曰：自養自傳自治真。不宜奪主以隨賓。
雖然獨立有緣起。溯本尋源紀念恩。
自養自傳責任心。非拘種族別胸襟。
同胞困苦須當救。體主行仁報福音。
(5) Tuì iân-kò͘-chiá : Só͘ Bo̍k-su, i sī pún-khu ê chhut-sin-chiá, chin ài tī Tiong Tiong chò gī-bū ê kang. I kap Bo̍k-su-niû í-keng tńg-lâi tī Chiang-hoà, toà tī i ê lēng-lông Só͘ Sian-siⁿ ê Jîn-seng I-īⁿ. So͘ Bo̍k-su bē tit chhiâng-chāi toà chiang-hoà, ū-sî tio̍h khì Pîn-tong sûn hoē-iú, kiâⁿ tián-lé. Koh chò Ko-hiông Tiong-hoē ê Gī-tiúⁿ.
Sui-jiân sī án-ni, nn̄g nî chêng chiū ū būn-tê tī pún-khu ê Siông-siat-pō͘.
Kàu kin-á-ji̍t iáu-kú teh siūⁿ. Chiū-sī i ài lâi chò gī-būn kang, Siông-siat-pō͘ tio̍h án-choáⁿ-iūⁿ siat-hoat.
Goá bat thê-gī tī Siông-siat-pō͘,hō͘ tāi-ke siūⁿ:─
(A) Lán tio̍h án-choáⁿ lâi kap kuí-nā hong-bīn táⁿ-ha̍p ? (1) I kap Bo̍k-su-niû, hiān-sî tī in ê I-īⁿ. (2) Só͘ Bo̍k-su làng goe̍h tio̍h khì Pîn-tong sûn hoē-iú á-sī kā lâng ha̍p-hun, kiâⁿ tián-lé, chò kang. (3)iū chò Ko Tiong ê Gī-tiúⁿ, ū-sî tio̍h khì khui-hoē,pān-sū.
Thèng-hāu téng-bīn hit (1), (2), (3) lóng soah, chiah lâi phah-sǹg. Hé! m̄-thang. (a) Kiaⁿ-liáu siuⁿ-bān. (b) (1)I-īⁿ chū-jiân bô soah. Bo̍k-su-niû tio̍h toà i-īⁿ. Nā bô, í chiū iáu tī Pîn-tong. Kiám-chhái ē koh toà kàu-hoē chò bo̍k-su. Nā ē, chiū bô oh siūⁿ. To sī So͘ Bo̍k-su ū seng-bêng kóng, M̄ hō͘ lâng chhiáⁿ khì toà chi̍t ê kàu-hoē chò bo̍k-su, beh chò sì-kè khì sûn-hoê ê gī-bū bo̍k-su. Sûn-liáu chiū tńg-khì i-īⁿ, á-sī lēng-goā siok-sià. Bô tek-khak sûn chi̍t uī chiū tńg-lâi. Chiàu i khì Pîn-tong toà chiaⁿ goe̍h-ji̍t chiah tńg-lâi, chîⁿ chhut-chāi Pîn-tong sàng. Chit pang i só͘ khai chin séⁿ, Bo̍k-su-niû bô kap i khì, khai sì-kho͘ goā-gîn , chhia-huì bô sǹg chāi-lāi. Nā án-ni chin hó, m̄-kú Tāi-hoē tio̍h koh siūⁿ kui-kí.
(B) Hit-sî Siông-siat-pō͘ í-āu, bo̍k-su tōng-iô, í-keng kiám-chió. Taⁿ chhun bô kuí ê, só͘-í hán-tit koh chham-siâng, kàu Tiong-hoē ê sî khoàⁿ án-choáⁿ? Kui-chek nā siūⁿ hó-sè, tāi-ke chàn-sêng, iáu ū lâng beh khoàⁿ iūⁿ. ǹg-bāng hit-sî khah ū lō͘.
Chhun 5 ê bo̍k-su, chi̍t ê tńg-khì in chhù, teh pī-pān beh khì Bí-kok liû-ha̍k. iáu 4 ê, kā goá kóng beh sî-jīm. Tī Siông-siat-pō͘ ia̍h ū sió-khoá kóng-khí.Put-kò Chháu-tun Koeh Bo̍k-su āu-nî chiah choán-jīm.
廢會
天國由天來
福音任意栽
牧師遷位去
自治云乎哉
誤會
自治未多財
無師眾莫哀
基金當積立
道禮佈全台
建會
受託共通財
基金救急災
瑪門遜上帝
生命勝全台
漢羅（Ùi原文改寫）
台中區的思想
1933.09 582卷p.19
楊註
(接頂卷17面)
(C)自養、捌講積立基本金，對區議會的時就有議定，到中會的時也有講幾若回：(1)本堂著積立(區議會有議定)。(2)中會著積立金，已經派紀溫柔做部長，黃仁壽做書記，蘇振輝做會計。(3) 各同會家己擔當一切的所費，請牧師亦好，所以2，3年久請10名牧師。毋若按呢，隨人的支會，講義所，同會攏想欲家己擔當所費。(為著按呢，基本金掠做第二要緊爾爾)。(4)若袂擔當的支會，送予彰化加紀溫柔做巡迴牧師。閣兩年才到任。(5)若是講義所無人敢負擔的，歸新宣道會設法。中會晚餐後著獻金做這項的路用。(6)若有受教師會的補助金，支會的，歸中會的會計。若袂得補助的時，彰化的同會佮新宣道會著設法，佮中會參詳進行方針。
(D)自傳、自傳的意思，毋是予別人湊設法，是家己著做主人的責任，來款待迎接家己的工人，以及宣教師的盡忠拍拚奮興的，抑是勻勻仔湊佈道的，攏好。
所以講實在，主人著較長，人客著較短。的確會按呢，不過毋知長的，長偌久(kiám-chhái 10，000年爾爾)。短的，短偌久(kiám-chhái 1，000年爾爾)。實在無一个人會知；獨獨父知爾爾。
捌自傳耶穌的「自由、平等、博愛、犧牲、團結」。團結若代先就較好，愛大大注意。因為會友是對自由算起，到尾站才團結，實在嶄然較慢。
(E)自治捌講，「照區議會議決的接續，到中會的成立。合會做基礎，紲到任職會，小會，中會。毋是干焦按呢爾爾，著結連大會，著交陪母會，台灣大會。」
捌講，「母會的教師會，就是直接的母會，有事志毋免的確對董事稟，閣in若欲贊錢，贊工湊治理，攏無推辭。」設使in毋免贊咱的錢，干焦欲贊工，湊治理，我想啦是著大大共 in數念，說多謝。
詩曰：自養自傳自治真。不宜奪主以隨賓。
雖然獨立有緣起。溯本尋源紀念恩。
自養自傳責任心。非拘種族別胸襟。
同胞困苦須當救。體主行仁報福音。
(5)對緣故者：蘇牧師，伊是本區的出身者，真愛佇中中做義務的工。伊佮牧師娘已經轉來佇彰化，蹛佇伊的另郎所先生的人生醫院。蘇牧師袂得常在蹛彰化，有時著去屏東巡會友，行典禮。閣做高雄中會的議長。
雖然是按呢，兩年前就有問題佇本區的常設部。
到今仔日猶閣咧想。就是伊愛來做義務工，常設部著按怎樣設法。
我捌提議佇常設部，予大家想：─
(A)咱著按怎來佮幾若方面táⁿ-合？(1)伊佮牧師娘，現時佇in的醫院。(2)所牧師閬月著去屏東巡會友抑是共人合婚，行典禮，做工。(3)又做高中的議長，有時著去開會，辦事。
聽候頂面彼(1)，(2)，(3)攏煞，才來拍算。Hé！毋通。(a)驚了傷慢。(b) (1)醫院自然無煞。牧師娘著帶醫院。若無，伊就猶佇屏東。撿彩會閣蹛教會做牧師。若會，就無僫想。都是蘇牧師有聲明講，毋予人請去蹛一个教會做牧師，欲做四界去巡迴的義務牧師。巡了就轉去醫院，抑是另外宿舍。無的確巡一位就轉來。照伊去屏東蹛整月日才轉來，錢出在屏東送。這班伊所開真省，牧師娘無佮伊去，開四箍外銀，車費無算在內。若按呢真好，毋過大會著閣想規矩。
(B)彼時常設部以後，牧師動搖，已經減少。今chhun無幾個，所以罕得閣參詳，到中會的時看按怎？規則若想好勢，大家贊成，猶有人欲看樣。向望彼時較有路。
Chhun 5个牧師，一个轉去in厝，咧備辦欲去美國留學。猶4个，共我講欲辭任。佇常設部亦有小可講起。不過草屯郭牧師後年才轉任。
廢會
天國由天來
福音任意栽
牧師遷位去
自治云乎哉
誤會
自治未多財
無師眾莫哀
基金當積立
道禮佈全台
建會
受託共通財
基金救急災
瑪門遜上帝
生命勝全台