長執訓興會
Tióng Chip Hùn-heng-hoē
文獻資訊
| 項目 | 資料 |
|---|---|
| 作者 | 紀溫柔 Kí Un-jiû |
| 卷期 | 台灣教會公報 |
| 卷期 | 第581卷 |
| 日期 | 1933/8 |
| 頁數 | 16 |
白話字（原文數位化）
Tióng Chip Hùn-heng-hoē
Kí Un-jiû
1933.08 581 Koàn p.16
I. Khui-hoē. Gō͘ goe̍h 18 hō téng-po͘ 10 tiám, Tâi-tiong Tiong-hoē tē-it khu Tióng-chip Hùn-heng-hoē chū-chi̍p tī Tâi-tiong pài-tn̂g. Chhut-se̍k-chiá 43 miâ. Ông Piān-lông Tiúⁿ-ló chú-lí, chhoā hoē-chiòng lé-pài ; tha̍k 1 Lîm 4:1-5, khoàn-bián hoē-chiòng tio̍h o̍h Sū-thê-hoán ê hi-seng, ēng hó iâⁿ pháiⁿ. Chhù-piⁿ ū bó͘ lâng khau-sé kóng, ‘’Pài Siōng-tè káu, kài pháiⁿ. ‘’ I ēng hó-ì ìn kóng, ‘’Kài koai.’’ āu-lâi i ka-tī pháiⁿ-sè, soà kap lán hó kau-poê. Só͘-í lán toè Chú tio̍h khek-kí, gâu thun-lún, kiâⁿ jîn-ài, chiū Thiⁿ-pē ê Sèng-miâ chiàⁿ ē khui-khoah tī tē-chiūⁿ.
II. Hùn-heng. Lâu Tiong-kian Bok-su ēng Kiàn-li̍p kàu-hoē, chò tê. I só͘ kóng ê tāi-iàu kì tī ē-bīn:-
1. Tāi-ke kam-goān uī Chú chò kang ê cheng-sîn. Kin-á-ji̍t kàu-hoē ê hiān-chōng sī toā khiàm cheng-sîn, m̄-sī khiàm bu̍t-chit. Chit ê hoē ǹg-bāng ta̍k nî ē tit khui chi̍t pái, tāi-ke saⁿ bián-lē, hō͘ sim-sîn khah oa̍h-tāng. Kàu-hoē nā ē kiàn-li̍p, lán chiàⁿ ū chin ê pêng-an kap khoài-lo̍k. Kàu-hoē beh kiàn-li̍p tio̍h ū kha-chhuí chê-pī, pí-phēng sî-cheng ta̍k hāng ki-khì chiâu-pī, kan-ta goā-bīn ê chiam kiám chi̍t ki chiū bē chún. Lán ū ha̍k-būn, châi-chêng oân-choân, nā m̄ uī Chú chò kang, kàu-hoē bē oa̍h.
Chá ū Má I-seng, Kam Bo̍k-su í-ki̍p chu sian-poê, hiān-sî chiū ū lán tāi-ke.
Hiān-sî tuì Se-iûⁿ ti̍t-ti̍t thoân-ji̍p pháiⁿ hong-sio̍k, nā bô hiah ê sian-poè lâi hi-seng, kin-á-ji̍t tek-khak bô kàu-hoē. Lán iā iáu tī choē-ok tiong, kai-chài kin-á-ji̍t ū lán tāi-ke. Chóng-sī lán ê chek-jīm sī hui-siông ê tāng, in-uī Tâi-oân 4 pah goā bān ê lâng, lóng sī lán ê chek-sêng. Só͘-í lán tio̍h ū kam-goān uī Chú chò kang ê cheng-sîn, kàu-hoē chiàⁿ ē thang khui-khoah kiàn-li̍p.
2. Tio̍h tit Sèng Sîn ê khuì-la̍t.
Chá 120 lâng tī Iâ-lō͘-sat-léng ê lâu-téng, choan-sim teh thèng-hāu tuì téng-bīn lo̍h-lâi ê khuì-la̍t. Sèng Sîn chi̍t-ē kàu, Sèng-hoē tuì án-ni heng-khí. Lán kin-á-ji̍t lâi, iā sī beh thèng-hāu téng-bīn lâi ê lêng-le̍k kàu, chiū ū thang the̍h-chhut tī ta̍k só͘-chāi chò kng-teng lâi kiù siā-hoē. In-uī sè-kan ê tì-sek, ha̍k-būn, tiat-ha̍k, kho-ha̍k oh-tit kiù lâng. Pí-tek hoán-hoé liáu, tit Sèng Sîn liáu-āu, teh thoân-tō, chi̍t ji̍t 3 chheng lâng hoán-hoé. Só͘-í lán beh chò Chú ê kang, tio̍h tit Sèng Sîn pang-chān, chiàⁿ ē tit kiàn-li̍p kàu-hoē.
- Tio̍h tû-khì kò͘ ka-kī ê sim. Tng-sî kàu-hoē heng, só͘ ū ê mi̍h lóng kong-ke ēng, bô kò͘ ka-tī, gâu sio-thiàⁿ. Choè tē-it hāi, chiū-sī kò͘ ka-tī. Chá A-se-a 7 ê kàu-hoē kiàn-li̍p liáu, bē hiáu saⁿ chiàu-kò͘, kàu-hoē m̄-nā bē kiàn-li̍p soà hiám tó.
Choè kīn Bí-kok ê toā gîn-hâng, uī-tio̍h suî-ê kò͘ ka-tī kín niá tńg-khì. Lô-su-hok Tāi chóng-thóng kóng, só͘ ū ê chîⁿ lóng sī kok-ka ê, hān 20 ji̍t āu, nā lâng ū chi̍t-pah kho͘ tī chhù-lāi, beh hoa̍t kim chi̍t-bān kho͘. Tāi-ke kín the̍h chhut khì kià, gîn-hâng tuì án-ni koh khui, bē tó. Lán Tiong-hoē nā ta̍k ê kò͘ ka-tī, bô thang the̍h-chhut, ū toā guî-hiám, só͘-í lán lóng tio̍h the̍h-chhut. In-uī lán só͘ū ê châi-chêng, gîn-chîⁿ lóng sī Thiⁿ-pē thok lán só͘ ū ê châi-chêng, gîn-chîⁿ lóng sī Thiⁿ-pē thok lán koán-lí nā-tiāⁿ.
Bó͘ só͘-chāi ū chi̍t ê Ông Tiúⁿ-ló hó-gia̍h, m̄-kú kàu-hoē ê keng-huì chi̍t nî chhut 10 kho͘ nā-tiāⁿ. Ū chi̍t pái teh hoē-gī ê sî, goá kā i kóng, lí tio̍h chhut50 kho͘ iā bô koè-thâu. I hoaⁿ-hí, m̄- nā án-ni, í-āu goá kuí-nā pái siá phoe kā i kóng, kiò i kià-hù bó͘ só͘-chāi loā-chē, i lóng hoaⁿ-hí. án-ni Ông Tiúⁿ-ló tuì chit ji̍t khí, chîⁿ ū têng-thâu-siⁿ.
Lán put-sî ū ki-hoē thang chò Chú ê kang. Goá ê lāu-bó sī sàn-hiong, chóng-sī ū jia̍t-sim thiàⁿ lâng ê cheng-sîn. Koāⁿ nâ-á kàu ta̍k kháu-chàu khì khioh ke-nn̄g, bē lâi chò Soan-tō-hoē-huì. Só͘-í
(1) Lán tio̍h choan-bū Chú ê kà-sī, sim-chì chiàⁿ ē jia̍t. Goá tī Pak-pō͘ ê sî, siông-siông o-ló Lâm-pō͘ Kàu-hoē, taⁿ m̄-chai iáu ū bô? Tāi-ke tì-ì ū teh gián-kiù tō-lí, á-sī teh kóng êng-oē, chia̍h hun ?
(2) Lán ê só͘ chò tio̍h m̄-thang hō͘ kóng tō-lí ê lâng tú-tio̍h chhuì-that. Hiān-sî ta̍k só͘-chāi lóng sī pò-tò ê hó ki-hoē, só͘-í lán tio̍h kak-gō͘, bat tō-lí, hia̍p-le̍k, hó só͘ kiâⁿ, gâu sio-thiàⁿ, put-sî siūⁿ ài kiù lâng , kàu-hoē chiū ē kiàn-li̍p.
Lûn-tun Sió-hoē 10 ê tiúⁿ-ló lóng sī sit-gia̍p-chiá, chiàu lí sī bē thang koh pang-chān Tâi-oân, uī-tio̍h thiàⁿ Chú, iû-goân koh oān-chō͘. Só͘-í Tióng-chip nā bô koan-sim tī kàu-hoē, bô hoaⁿ-hí hù-hoē, hiàn-kim, chò kang, kan-ta chò bêng-ū ê . Tio̍h ka-tī kín sî-chit, m̄-thang tìn-uī, nā beh chò, tio̍h chīn-tiong, kàu-hoē chiàⁿ ē kiàn-li̍p. Sim só͘ goān.
Koh ū kuí-uī bo̍k-su kóng kuí-kù kám-sióng ê bián-lē, jiân-āu thêng-tàu, siū Tâi-tiong Kàu-hoē ê hō͘-thāi, soà seh-siā.
III. Kek-lē. Ē-po͘ ū So͘ Io̍k-châi Bo̍k-su káng-ián, jīm-chit-chiá ê thian-chit kap chek-jīm, lâi kek-lē tāi-ke.
(1) Jīm-chit-chiá ê thian-chit. Sī chin ko-siōng êng-kng, thiⁿ só͘ siúⁿ-sù. Siōng-tè te̍k-pia̍t kéng-tiàu lâi chò Thian-kok ê khim-chhe. Thé-thian soan-hoà ê Sèng-po̍k.
(2) Jīm-chit-chiá ê chek-jīm. Tio̍h thoân Hok-im. Chhin-chhiūⁿ Iâ-lī-bí kóng, ‘’Bô thoân Iâ-hô-hoà ê oē tòng-bē-tiâu, sim-koaⁿ chhin-chhiūⁿ hoé-to̍h.’’ ‘’Pó-lô kóng, bô thoân Hok-im ū chai-ē.’’ Só͘-í jīm-chit-chiá ta̍k-ê tio̍h gâu chò kang tī Siōng-tè ê kok. Koh tio̍h ū tâng-sim, ài chò hó-sū ê cheng-sîn, chiàⁿ bē ko͘-hū Siōng-chú ê in-tián.
IV. Thó-lūn. (1) Kàu-hoē ê chó͘-chit kap kó͘-bú. Hong-hoat nā hó, ta̍k hāng beh chìn-hêng chin khoài. Kàu-hoē sī ēng lâng, hoat, mi̍h lâi chó͘-chit--ê. Tāi-seng ū hoē-iú, kui-tēng hoat-tō͘, kéng lâng tng-chit. Hoē-iú tio̍h la̍p î-chhî-huì. Tāi-ke m̄-chai ū lóng bêng-pe̍k, ū chiàu án-ni tek kiâⁿ, teh kó͘-bú á-bô ?
(2) Chheng-liân-hoē ê chó͘-chit. Ū só͘-chāi sī tuì Sió-hoē seⁿ-chhut kap jīm-chit-chiá ha̍p-chok. Ū só͘-chāi sī chheng-liân ka-tī hoat-khí, kap jīm-chit-chiá, Sió-hoē khah bô liân-lo̍k. Chit nn̄g khoán lóng sī uī Chú, chóng-sī tāi-ke saⁿ liân-lok khah hó.
(3) ǹg-bāng Sîn-ha̍k-hāu thêng-tō͘ kái khah koân, hō͘ ha̍k-seng chhut-gia̍p chiū ū kàu-su ê chu-keh, hō͘ kàu-hoē piān-piān thang chhiáⁿ chò bo̍k-su, ǹg-bāng bô kú, lóng bô kip-huì seng.
(4) Tio̍h chiat-khiām. Hiān-sî sī sè-kài-tek ê pháiⁿ kéng-khì, ta̍k hāng siok-sió, tio̍h ū ha̍p-lí-hoà ê seng-oa̍h, chhin-chhiūⁿ Song-hí-sū, hiān-sî khah chē chin lōng-huì, sī hō͘ lán keng-chè khùn-lân ê goân-in, nā ē-tit kan-tan, chhia-chhí-huì : Phèng-kim hoè-chí sī chin hó, kè-chhoā chū-tōng-chhia nn̄g-tâi. Song-sū bián liân-tek. Moâ-saⁿ ēng kì-hō;kīn--ê, chia̍h-pá chiah khì hoē-chòng; hn̄g--ê; chiah kiâm-moê. Nā án-ni kàu-hoē iā khah bē kan-khó͘.
(5) Hiān-sî chiū-chit kap seng-oa̍h lân. Hi-hong thoân-kàu-chiá, iā tio̍h chù-ì tàu oān-chō͘ hoē-iú ê seng-oa̍h būn-tê.
(6) Ki-kim ê būn-tê, iàu-kín Kàu-hoē, Tiong-hoē, Tāi-hoē lóng tio̍h siat-tì. In-uī Tâi-oân ê Soan-tō-hoē, iā-sī tuì goā-kok ê ki-pún lâi siat.
(7) Chá, Kàu-hoē Ki-tok-hoà, sim hiòng-siōng, hoān-sū saⁿ-thiàⁿ, khek-kí, hiàn-kim sī hiàn só͘ boē thàn--ê. Hiān-sî kàu-hoē, siā-hoē-hoà, sim ǹg sè-kan, thiàⁿ-chêng thè, hiàn-kim sī hiàn só͘ ū chhun--ê, ū ê liân só͘ ū chhun--ê ā m̄-kam hiàn. Kam-goān hō͘ kiáⁿ-sun chò lōng-tōng-chú phoà-huì, ū-iáⁿ á-bô?
Chhiáⁿ tāi-ke siūⁿ khoàⁿ lè.
(8) Kap hoē-goā ê lâng kè-chhoā. Hiān-sî chē-chē chò pē-bó ê lâng, bô teh chù-ì, chiong lú-jî kè hō͘ bô sìn Chú ê lâng , lâi hō͘ m̄-bat chin-lí ê ta-ke kà-sū, si̍t-chāi tuī-lo̍h, oán-jiân sī sit-bī ê iâm. Bó͘ tiúⁿ-ló kóng, i ê cha-bó͘-kiáⁿ, chiū nā chhī teh chò kō͘-pô, iā m̄ -goān kè hō͘ hoē-goā ê lâng, in-uī chi̍t-ê lêng-hûn tit-tio̍h kiù, iâⁿ-koè tit-tio̍h choân sè-kài. Khah chē lóng sī tham sè-kan ê but-chit, khoài-lo̍k, chiah ē kè hoē-goā ê lâng. Kiat-kio̍k khah chē bô hó. Goān tāi-ke chù-ì chhim-siūⁿ. Pì-hoē.
漢羅（Ùi原文改寫）
長執訓興會
紀溫柔
1933.08 581卷p.16
I.開會.五月18號頂晡10點，台中中會第一區長執奮興會聚集佇台中拜堂。出席者43名。王Piān-lông長老主理，chhoā會眾禮拜；讀1 Lîm 4：1-5，勸勉會眾著學司提反的犧牲，用好嬴歹。厝邊有某人剾洗講，「拜上帝káu，改歹。『伊用好意應講，』蓋乖。」後來伊家己歹勢，紲佮咱好交陪。所以咱綴主著khek-kí，gâu吞忍，行仁愛，就天父的聖名正會開闊佇地上。
II.奮興.劉忠堅牧師用建立教會，做茶。伊所講的大要記佇下面：-
1.大家甘願為主做工的精神。今仔日教會的現狀是大欠精神，毋是欠物質。這个會向望逐年會得開一擺，大家相勉勵，予心神較活動。教會若會建立，咱chiàⁿ有真的平安佮快樂。教會欲建立著有跤手齊備，比並時鐘逐項機器齊備，干礁外面的 chiam kiám一支就袂準。咱有學問，châi-tsîng完全，若毋為主做工，教會袂活。
早有馬醫生，甘牧師以及諸先輩，現時就有咱大家。
現時對西洋直直傳入歹風俗，若無遐的先輩來犧牲，今仔日的確無教會。咱也猶佇罪惡中，佳哉今仔日有咱大家。總是咱的責任是非常的重，因為台灣4百外萬的人，攏是咱的責成。所以咱著有甘願為主做工的精神，教會chiàⁿ會通開闊建立。
2.著得聖神的氣力。
早120人佇耶路撒冷的樓頂，專心咧聽候對頂面落來的氣力。聖神一下到，聖會對按呢興起。咱今仔日來，也是欲聽候頂面來的能力到，就有通提出佇逐所在做光燈來救社會。因為世間的智識、學問、哲學、科學學得救人。彼得反悔了，得聖神了後，咧傳道，一日3千人反悔。所以咱欲做主的工，著得聖神幫贊，chiàⁿ 會得建立教會。
3.著除去顧家己的心。當時教會興，所有的物攏公家用，無顧家己，gâu相疼。做第一害，就是顧家己。早亞西亞7个教會建立了，袂曉相照顧，教會毋但袂建立紲險倒。
最近美國的大銀行，為著誰的顧家己緊領轉去。羅斯福大總統講，所有的錢攏是國家的，限20日後，若人有一百箍佇厝內，欲罰金一萬箍。大家緊提出去寄，銀行對按呢閣開，袂倒。咱中會若逐个顧家己，無通提出，有大危險，所以咱攏著提出。因為咱所有的才情，銀錢攏是天父託咱所有的才情，銀錢攏是天父託咱管理若定。
某所在有一個王長老好額，毋過教會的經費一年出10箍若定。有一擺咧會議的時，我共伊講，你著出50箍也無過頭。伊歡喜，毋但按呢，以後我幾仔擺寫批共伊講，叫伊寄赴某所在偌濟，伊攏歡喜。按呢王長老對這日起，錢有重頭生。
咱不時有機會會通做主的工。我的老母是sàn-hiong，總是有熱心疼人的精神。汗籃抑到逐口灶去拾雞卵，袂來做宣道會費。所以
(1)咱著專務主的教示，心志chiàⁿ會熱。我佇北部的時，常常呵咾南部教會，今毋知猶有無？大家致意有咧研究道理，抑是咧講閒話，食薰？
(2)咱的所做著毋通予講道理的人拄著喙塞。現時逐所在攏是報到的好機會，所以咱著覺悟，捌道理，協力，好所行，gâu相疼，不時想愛救人，教會就會建立。
倫敦小會10 个長老攏是失業者，照理是袂通閣幫贊台灣，為著疼主，猶原閣援助。所以長執若無關心佇教會，無歡喜赴會，獻金，做工，干礁做名譽的。著家己緊辭職，毋通鎮位，若欲做，著盡忠，教會chiàⁿ會建立。心所願。
閣有幾位牧師講幾句感想的勉勵，然後停晝，受台中教會的候待，紲說謝。
III.激勵.下晡有蘇Io̍k-châi牧師講演，任職者的天職佮責任，來激勵大家。
(1) 任職者的天職。是真高尚榮光，天所賞賜。上帝特別揀召來做天國的欽差。體-thian soan-hoà的聖po̍k。
(2) 任職者的責任。著傳福音。親像耶利米講，「無傳耶和華的話擋袂牢，心肝親像火著。」「保羅講，無傳福音有災厄。」所以任職者逐个著gâu做工佇上帝个國。閣著有同心，愛做好事的精神，chiàⁿ 袂辜負上主的恩典。
IV.討論.(1)教會的組織佮鼓舞。方法若好，逐項欲進行真快。教會是用人，法，物來組織--的。代先有會友，規定法度，揀人當職。會友著納維持費。大家毋知有攏明白，有照按呢德行，咧鼓舞抑無？
(2)青年會的組織。有所在是對小會生出佮任職者合作。有所在是青年家己發起，佮任職者，小會較無連絡。這兩款攏是為主，總是大家相連絡較好。
(3) 向望神學校程度改較懸，予學生出業就有教師的資格，予教會便便通請做牧師，向望無久，攏無給費生。
(4)著節儉.現時是世界的的歹景氣，逐項縮小，著有合理化的生活，親像喪喜事，現時較濟真浪費，是予咱經濟困難的原因，若會得簡單，奢侈費：聘金廢止是真好，嫁娶自動車兩台。喪事免連的。麻衫用記號；近--的，食飽才去會葬；遠--的；才鹹糜。若按呢教會也較袂艱苦。
(5)現時就這佮生活難。Hi-hong傳教者，也著注意鬥援助會友的生活問題。
(6) 基金的問題，要緊教會，中會，大會攏著設置。因為台灣的宣道會，也是對外國的基本來設。
(7)早，教會基督化，心向上，凡事相疼，khek-kí，獻金是獻所未趁--的現時教會，社會化，心向世間，疼情退，現金是獻所有偆--的，有的連所有偆--的抑毋甘獻。甘願予囝孫做浪蕩子破費，有影抑無？
請大家想看咧。
(8)佮會外的人嫁娶。現時濟濟做父母的人，無咧注意，將女兒嫁予無信主的人，來予毋捌真理的大家教示，實在墮落，宛然是失味的鹽。某長老講，伊的查某囝，就若飼咧做姑婆，也毋願嫁予會外的人，因為一个靈魂得著救，嬴過得著全世界。較濟攏是貪世間的物質，快樂，才會嫁會外的人。結局較濟無好。願大家注意深想。閉會。