夏天佮人生
Hē-thiⁿ kap Jîn-seng
文獻資訊
| 項目 | 資料 |
|---|---|
| 作者 | 潘道榮 Phoaⁿ Tō-êng |
| 卷期 | 台灣教會公報 |
| 卷期 | 第581卷 |
| 日期 | 1933/8 |
| 頁數 | 1 |
白話字（原文數位化）
Hē-thiⁿ kap Jîn-seng
1933.08 581 p.1
Phoaⁿ Tō-êng
Hē-thiⁿ chi̍t-ē kàu, tāi-ke kám-kak chin joa̍h! Joa̍h-thiⁿ ê Tâi-oân, te̍k-pia̍t hián-bêng Siōng-tè thiàⁿ-thàng ê oân-choân. Chò Si ê sian-seⁿ kóng, Tang-thiⁿ Hē-thiⁿ lóng sī Siōng-tè só͘ tiāⁿ-tio̍h--ê(Si 74:17). Nā bô chhun-hē chhiu-tang sù-kuì ê sûn-khoân, chiū jîn-seng bô sím-mi̍h chhù-bī tī-teh. Lán ài thiaⁿ siōng-tè ê Siaⁿ, m̄-nā tio̍h ji̍t-ji̍t khîn tha̍k Sèng-keng nā tiāⁿ, koh tio̍h put-sî khoàⁿ siōng-tè só͘ chhòng-chō chū-jiân-kài ê hiān-siōng.
Joa̍h-thiⁿ chi̍t-ē kàu, kan-ta kám-kak chin joa̍h; che sī ke̍k bô ì-gī ê seng-oa̍h. Kî-si̍t Siōng-tè chiong Hē-thiⁿ joa̍h ê khì-hāu siúⁿ-sù lán, ū pó-poè ê kà-sī tī-teh. In-uī tuì chit ê joa̍h-thiⁿ sī chhin-chhiūⁿ teh chhoā lán ji̍p tī sin-sin suí-suí ê sè-kài:-
1)Thiàⁿ ê sè-kài. Ngó͘-kok teh hoat- io̍k bō͘-sēng, kiat-si̍t lóng tī chit ê joa̍h-thiⁿ ê sî. Te̍k-pia̍t tī lán jia̍t-tài-tē ū chhut chē-chē koé-chí, thang ha̍p lán joa̍h-thiⁿ sin-thé ê khiàm-ēng. iū-koh tī ē-po͘ sî siông-siông ū lo̍h sai-pak-hō͘, ke-thiⁿ liâng-léng, mê-kan hó-khùn. Che, kiám m̄-sī hián-bêng Siōng-tè chin toā ê thiàⁿ-thàng mah?
2) Chū-iû ê sè-kài. Koâⁿ-thiⁿ sî, lâng ài tiàm tī sio-lō ba̍t-ba̍t ê chhù-lāi.Kàu joa̍h-thiⁿ, chiū ài chhut-khì soaⁿ-kan hái-kîⁿ chū-jiân-kài ê só͘-chāi. Chin chū-iû, lóng bô sok-pa̍k. Lán lī-iōng chi̍t-ê hó ê sî-cheh, khui lîm-kan á-sī hái-piⁿ ê Hā-kî ha̍k-hāu, Hō͘ lâm-hū ló-iù thang chiap-chhiok toā chū-jiân ê sè-kài, hō͘ jio̍k-thé kap cheng-sîn lóng tit-tio̍h toā lī-ek.Khoài-lo̍k bô pí.Lâng eng-kai thoat-chhut e̍h-e̍h lī-kí chú-gī ê seng-oa̍h, lâi ji̍p tī chū-iû Sèng-ài ê sè-kài.
3) Khiam-pi ê sè-kài. Tang-thiⁿ sî lâng chhēng chē-chē saⁿ-á khò͘.Kàu joa̍h-thiⁿ chiū ài thǹg kng-kng. Lán ài kàu Siōng-tè ê bīn-chêng, tio̍h chiong jia-khàm lán lêng-hûn it-chhè ê choē-ok lóng thǹg--khí-lâi. Tio̍h sêng-si̍t jīn-choē, chiah ē tit-tio̍h Siōng-tè sià-bián(I Hān 1:9). Chí-ū chhiah-lō-lō, chiū-sī khiam-pi ê lâng, chiah ē tit-tio̍h Thiⁿ Pē chiok-hok(Lō͘ 18:13,14).
4) Chún-pī ê sê-kài. Káu-hiā kàu Hē-thiⁿ sî, chiū ē-hiáu pī-pān (Chim-giân 30:25). Lán m̄-thang khah-su káu-hiā. Tioh gâu Pó-sioh kong-im,ho̍k-sāi Chú ēng jia̍t-sim. Tì-ì pī-pān, ū chi̍t ji̍t beh tńg-khì kìⁿ Pē. Chhun-thiⁿ, chiū-sī siàu-liân sî-tāi;Hē-thiⁿ, chiū-sī chòng-liân sî-tāi ; Chhiu-thiⁿ, chiū-sī ló-liân sî-tāi;Tang-thiⁿ,chiū sī beh lîm-chiong ê sî-tāi . Ū Hē-thiⁿ chiū-ū Tang-thiⁿ ê sî, ū chhut-sì chiū-ū sí ê ji̍t. Lô͘ Phek-lō͘ Sian-seⁿ kóng,’‘Sim-chōng teh tín-tāng,nā chhiūⁿ teh chhiùⁿ chìn-hêng-khek kàu tī bōng-á po͘.’’ Sè-kan m̄-sī chó͘-ke, thiⁿ sī goá tau.
5)oa̍h-miā ê sè-kài. Sù-kuì, sī chhin-chhiūⁿ Siōng-tè só͘ siá ê 4 pún chheh. Chhun-thiⁿ ê tāi-piáu, chiū-sī Hoe;Hē-thiⁿ tāi-piáu, chiū-sī Chuí; Chhiu-thiⁿ ê tāi-piáu, chiū-sī Goe̍h; Tang-thiⁿ ê tāi-piáu, chiū-sī sng-seh.
Joa̍h-thiⁿ sî, lâng chin ài lim chuí; in-uī put-sî chhuì-ta. Ki-tok ê hok-im,chiū-sī oa̍h-miā chuí.’‘Iau chhuì-ta hiâm him-bō͘ gī ê lâng ū hok-khì.’’ Chú-ah! Lí ê pó-poè tī tó-lo̍h? In-uī lí sī chò goá oa̍h-miā ê goân-thâu (Sài 49:10).
6) Kéng-kò ê sè-kài (Khó 13:28).Ki-tok chài-lîm ê sî kīn lah, lí ū sìn bô?M̄-thang ngē lí ê sim, tio̍h thiaⁿ Ki-tok kéng-kò ê siaⁿ-im. Tī 20 nî chêng, Eng-kok só͘ chè-chō hit chiah sè-kài tē-it ê toā chûn, miâ ‘’Tâi-nî-khek,’’ thâu-pái chhut-hái chiū kòng-phoà. Kè-kiōng ū sí 1500 goā lâng. Siáⁿ-sū án-ni ? In-uī ū pa̍t chiah chûn khoàⁿ-tio̍h tuì-bīn ū toā peng-soaⁿ teh lâu--lo̍h-lâi, chai ū guî-hiám, chiū kóng bô soàⁿ-tiān pò in chai. Khó-sioh Tâi-ni-khek chûn-lāi koán bô soàⁿ-tiān ê kī-su, m̄-ài thiaⁿ hiâm kiáu-jiáu. uī-tio̍h án-ni, kap hit tè toā peng-soaⁿ saⁿ-tōng-tio̍h, tì-kàu chûn phoà tîm lo̍h-hái, lâng sòng-sit hiah chē. ‘’Lâng tng teh kóng pêng-an ún-tàng ê sî, chai-ē hut-jiân kàu tī in’‘(I Thiap 5:3). ‘’Boa̍t-kî í-keng kàu, bô koh khoan-iông sià-bián’‘(Mô͘ 8:2).
Goán kèng-ài ê hiaⁿ-tī chí-moē, tī chit ê Hē-thiⁿ joa̍h ê khì-hāu, gâu pó-tiōng lín ê lêng-hûn kap seng-khu. Chin-chiàⁿ ta̍k-lâng chhim-chhim teh siūⁿ oán-jiân chhin-chhiūⁿ ji̍p tī sin ê sè-kài teh thiaⁿ Siōng-tè sîn-pì ê khé-sī. Joa̍h-thiⁿ ah!Lí sī goán ê hó pêng-iú kap lí khan-chhiú, lâi ji̍p tī Thiàⁿ-thàng, chū-iû, khiam-pi, chún-pī oa̍h-miā, kéng-kò ê sin sè-kài.
漢羅（Ùi原文改寫）
夏天佮人生
1933.08 581卷 p.1
潘道榮
夏天一下到，大家感覺真熱！熱天的台灣，特別顯明上帝疼痛的完全。做詩的先生講，冬天夏天攏是上帝所定著的(詩74：17)。若無春夏秋冬四季的循環，就人生無甚物趣味佇咧。咱愛聽上帝的聲，毋若著日日勤讀聖經若定，閣著不時看上帝所創造自然界的現象。
熱天一下到，干焦感覺真熱；這是極無意義的生活。其實上帝將夏天熱的氣候賞賜咱，有寶貝的教示佇咧。因為對這个熱天是親像咧chhoā咱入佇新新媠媠的世界：-
1)疼的世界。五穀咧咧發育茂盛，結實攏佇這个熱天的時。特別佇咱熱帶地有出濟濟果子，通合咱熱天身體的欠用。又閣佇下晡時常常有落西北雨，加添涼冷，暝間好睏。這，敢毋是顯明上帝真大的疼痛mah？
2)自由的世界。寒天時，人愛踮佇燒烙密密的厝內。到熱天，就愛出去山間海墘自然界的所在。真自由，攏無束縛。咱利用這个好的時節，開林間抑是海邊的夏季學校，予男婦老幼通接觸大自然的世界，予肉體佮精神攏得著大利益。快樂無比。人應該脫出狹狹利己主義的生活，來入佇自由聖愛的世界。
3)謙卑的世界。冬天時人穿濟濟衫仔褲。到熱天就愛褪光光。咱愛到上帝的面前，著將遮蓋咱靈魂一切的罪惡攏褪起來。著誠實認罪，才會得著上帝赦免(I 翰1：9)。只有赤裸裸，就是謙卑的人，才會得著天父祝福(路18：13，14)。
4)準備的世界. 狗蟻到夏天時，就會曉備辦(箴言30：25)。咱毋通較輸狗蟻。就gâu保惜光陰，服事主用熱心。致意備辦，有一日欲轉去見父。春天，就是少年時代；夏天，就是壯年時代；秋天，就是老年時代；冬天，就是欲臨終的時代。有夏天就有冬天的時，有出世就有死的日。盧 Phek-lō͘先生講，「心臟咧振動，若像咧唱進行曲到佇墓仔埔。」世間毋是祖家，天是我兜。
5)活命的世界.四季，是親像上帝所寫的4本冊。春天的代表，就是花；夏天代表，就是水；秋天的代表，就是月；冬天的代表，就是霜雪。
熱天時，人真愛啉水；因為不時喙乾。基督的福音，就是活命水。「Iau嘴乾嫌欣慕義的人有福氣。」主啊！你的寶貝佇佗落？因為你是做我活命的源頭(賽49：10)。
6)警告的世界(可13：28)。基督再臨的時近啦，你有信無？毋通硬你的心，著聽基督警告的聲音。佇20年前，英國所製造彼隻世界第一的大船，名「Tâi-nî-khek，」頭擺出海就摃破。計共有死1500外人。啥事按呢？因為有別隻船看著對面有大冰山咧流落來，知有危險，就講無線電報in知。可惜Tâi-nî-khek船內管無線電報的機師，毋愛聽嫌攪擾。為著按呢，佮彼塊大冰山相撞著，致到船破沉落海，人喪失遐濟。「人當咧講平安穩當的時，災厄忽然到佇in」(I帖 5：3)。「末期已經到，無閣寬容赦免」(摩 8：2)。
阮敬愛的兄弟姊妹，佇這个夏天熱的氣候，gâu保重恁的靈魂佮身軀。真正逐人深深咧想宛然親像入佇新的世界咧聽上帝神秘的啟示。熱天啊！你是阮的好朋友佮你牽手，來入佇疼痛，自由，謙卑，準備活命，警告的新世界。