台中區的思想
Tâi-tiong khu ê Su-siúⁿ
文獻資訊
| 項目 | 資料 |
|---|---|
| 作者 | 楊註 Iûⁿ Chù |
| 卷期 | 台灣教會公報 |
| 卷期 | 第581卷 |
| 日期 | 1933/8 |
| 頁數 | 18 |
白話字（原文數位化）
Tâi-tiong khu ê Su-siúⁿ
(Iûⁿ Chù)
1933.08 581Koàn p.18
án-choáⁿ kiò-chò Tâi-tiong khu ê su-siúⁿ? Peh-nî chêng bô bo̍k-su, bô Khu-gī-hoē, bô Tiong-hoē,chiū bô su-siúⁿ ê bûn-tê?
Taⁿ pún Tiong-hoē, á Siông-siat-pō͘ só͘ gī-lūn ê , chiū-sī su-siúⁿ.
I. Tuì Siòng-tè. Bat kóng, lé-pài ê sî, beh kî-tó, tio̍h kióng-chhiú, tio̍h chē sì-chiàⁿ,m̄-thang khiû-kha, tio̍h kì-liām Iâ-so͘ koh oa̍h.
II. Tuì lâng. (1) Tuì Bó-hoē ê lâng tio̍h chhiáⁿ in lâi hù Tiong-hoē, hō͘ in pêⁿ-pêⁿ ū gī-bū, kéng in chò gī-tiúⁿ.
Khui tê-piáⁿ-hoē hoan-gêng Lâu Tiong-kian Bo̍k-su, i thê-sî.
Hoân-gêng Táng-sū, ū lâng kóng, tio̍h ēng Tâi-oân lé, ēng ga̍k-tuī, pàng toā phàu, chò chhut-thâu , ū lâng o-ló chin hó, ū lâng hiâm. Bo̍k-koài, o-ló á-sī hiâm lóng sī kà-sī, si̍t-chāi toā lī-ek, eng-kai seh-siā.
Bat gī-lūn kā lán I-seng chò seⁿ-ji̍t, put-chí lāu-jia̍t. Lân I-seng ū seh to-siā.
Bat gī-lūn Lân I-seng koh toà Chiang-hoà. Kàu-sū-hoē iā chàn-sêng.Khiok m̄-sī Tâi-oân lâng teh chú-ì, put-kò sī piáu-bêng Tiong-hoē sêng-sim.
Bat kóng tio̍h kèng-tiōng Soan-kàu-su, ū-sî in put-chí thé-thiap Tâi-oân lâng, bô ài siū hoan-gêng. Lūn in sī ēng thiàⁿ, gâu thé-thiap lán.
Bat kóng, tio̍h kià-phoe chhéng-an bat toà Tiong-pō͘ ê Soan-kàu-su, hiān-sî bô toà tī Tâi-oân--ê. In-uī 8 nî kú bô Eng-kok bo̍k-su tī-chia, goá ē kì-tit án-ni nā-tiāⁿ.
Káⁿ boē-bat sàng mi̍h kià khì chò kì-liām.
詩曰,非諂非驕為主人。散沙團結一番新。
祖先遺下台灣禮。心信耶穌答上賓。
(2) Tuì Tāi-hoē ê lâng bat kóng, tio̍h sūn-thàn, ho̍k-chiông só͘ gī-koat--ê. Lūn chò ia̍h-oân, tio̍h niū khah kīn Tâi-lâm--ê, m̄-sī lóng bô tàu chò, sī hū-tam khah-chió nā-tiāⁿ.
(3) Tuì pêng-poè, bô-lūn tuì tó-chi̍t khu ê Tiong-hoē, tāi-ke thoân-kiat, chū-iû pêng-téng. Bat kóng, tio̍h phài hoē-sù khì saⁿ kau-poê.
Bat kóng, tio̍h phài lâng khì Pak-pō͘ ê Tiong-hoē, Tâi-oân Ji̍t-pún ê Tiong-hoē, Loē-tē ê Tiong-hoē,Tiong-hoa ê Tiong-hoē sī-chhat.
(4) Tuì ka-tī. (A) ia̍h-oân, 8 nî í-siōng bô Eng-kok bo̍k-su tī Tiong-pō͘,só͘-í ia̍h-oân tio̍h lûn-liû chò: Lîm Kín-sīn, Lâu Chín-hong , Koeh Tiâu-sêng bat chò Phian-chhip Pō͘-tiúⁿ. Bat chhut-se̍k tī Tâi-lâm, Pîn-tong chò Tiong-pō͘ ê tāi-piáu.
Chiàu goán khoàⁿ, án-ni lûn-liû thang chiàu-kò͘ thoân-thé khah ē chìn-pō͘.
Kéng Tiúⁿ-ló kuí-nā-ê chò Siông-siat pō͘-oân.
詩曰，胃肝首腦一身同。作崇侏儒歎不公。
自信中中無此輩。揚人抑巳更生風。
Bat ū lâng kóng, tio̍h khah chong-giâm, khah thóng-it lè, só͘-í kin-nî chhiáⁿ Hùn-heng-ka Lâu Tiong-kian Bo̍k-su chò Gī-tiúⁿ, hō͘ i thang pān-sū hùn-heng, chong-giâm thóng-it. Chhì-khoàⁿ 10 nî kú, i chiū 70 hoè, i iā chin ài. Nā bô, sī tāi-ke lâng-lâng ji̍p Tiong-hoē ê Sū-bú-só͘, kèng-khiân thoân-kiat.
(B) Hoē-kui. Chêng ka-tī ū chhòng Khu-gī-hoē ê kui-chek hó ēng, in-uī m̄-bat lâng hoān-tio̍h, teh kiâⁿ ū sūn-sū.Ū Tióng-chip, Thoân-tō-su chham teh kiâⁿ, jia̍t-chhiat, oa̍h-tāng,hô-khì.
Tāi-hoē ê Hoat-kui ū lâng kóng, ké-soeh khah ài sio-chèⁿ, kiaⁿ-liáu khah bē pêⁿ-tháⁿ. Khiok ū teh chìn-hoà, m̄-kú chió lâng chai-iáⁿ.
詩曰：規弱由人難秉公。規良人弱煽無風。
人良規弱神恩庇。規善人良慶大圖。
漢羅（Ùi原文改寫）
台中區的思想
(楊註)
1933.08 581卷 p.18
按怎叫做台中區的思想？百年前無牧師、無區議會、無中會，就無思想的問題？
今本中會，á Siông-設部所議論的，就是思想。
I.對上帝. 捌講，禮拜的時，欲祈禱，著kióng-chhiú，著坐四正，毋通khiû-跤，著紀念耶穌閣活。
II.對人.(1)對母會的人著請in來赴中會，予in平平有義務，揀in做議長。
開茶餅會歡迎劉忠堅牧師，伊thê-sî。
歡迎董事，有人講，著用台灣禮，用樂隊，放大炮，做出頭，有人呵咾真好，有人嫌。莫怪，呵咾抑是嫌攏是教示，實在大利益，應該說謝。
捌議論共咱醫生做生日，不止鬧熱。藍醫生有說多謝。
捌議論蘭醫生閣蹛彰化。教士會也贊成。卻毋是台灣人咧主意，不過是表明中會誠心。
捌講著敬重宣教師，有時in不止體貼台灣人，無愛受歡迎。論in是用疼，gâu體貼咱。
捌講，著寄批請安捌蹛中部的宣教師，現時無蹛佇台灣--的。因為8年久無英國牧師佇遮，我會記得按呢若定。
敢袂捌送物寄去做記念。
詩曰，非諂非驕為主人。散沙團結一番新。
祖先遺下台灣禮。心信耶穌答上賓。
(2)對大會的人捌講，著順趁，服從所議決--的。論做役員，著量較近台南--的，毋是攏無鬥做，是負擔較少若定。
(3)對平輩，無論對佗一區的中會，大家團結，自由平等。捌講，著派hoē-sù去相交陪。
捌講，著派人去北部的中會，台灣日本的中會，內地的中會，中花的中會視察。
(4)對家己。(A)役員，8年以上無英國牧師佇中部，所以役員著輪流做：林謹慎，劉振芳，郭朝成捌做編輯部長。捌出席佇台南，屏東做中部的代表。
照阮看，按呢輪流通照顧團體較會進步。
揀長老幾仔个做Siông-siat部員。
詩曰，胃肝首腦一身同。作崇侏儒歎不公。
自信中中無此輩。揚人抑巳更生風。
捌有人講，著較莊嚴，較統一咧，所以今年請hūn-heng家劉忠堅牧師做議長，予伊通辦事hūn-heng，莊嚴統一。試看10年久，伊就70歲，伊也真愛。若無，是大家人人入中會的事務所，敬虔團結。
(B)會規。前家己有創區議會的規則好用，因為毋捌人患著，咧行有順序。有長執，傳道師參咧行，熱切，活動，和氣。
大會的法規有人講，解說較愛相爭，驚了較袂pêⁿ-tháⁿ。卻有咧進化，毋過少人知影。
詩曰：規弱由人難秉公。規良人弱煽無風。
人良規弱神恩庇。規善人良慶大圖。