介紹藥方

Kài-siāu io̍h-hng

文獻資訊

項目	資料
作者	O.P.E.
卷期	台灣教會公報
卷期	第581卷
日期	1933/8
頁數	7

白話字（原文數位化）

Kài-siāu io̍h-hng

(O.P.E. kì)

1933.08  581Koàn  p.7

Sū-giân

Put-châi m̄-sī i-seng, ia̍h m̄-sī io̍h-che-su, koh ia̍h m̄-sī io̍h-chéng-siong;chóng-sī beh kài-siāu io̍h-hng.

He̍k-chiá ū lâng beh piān-pok, nā-sī án-ni, lí thài-ū io̍h-hng thang kài-siāuah?Put-châi beh ìn i kóng, ū-ê sī tuì chó͘-thoân, ū-ê sī tuì chhin-chhek kap pêng-iú thoân-siū;só͘-í ū thang kài-siāu lah !

kiám-chhái ū lâng beh mn̄g, uī siáⁿ iân-kò͘, lí thài beh kài-siāu io̍h-hng ah?Beh ìn i kóng, m̄-sī uī-tio̍h be̍h kiû miâ-siaⁿ, ia̍h m̄-sī uī-tio̍h lī-lō͘; sī uī-tio̍h ài kiù lâng, hō͘ lâng khah lī-piān, khah keng-chè.

Sio̍k-gú kóng, ‘’uì tio̍h, bô uì-sio̍h.’’ iū-koh kóng, ‘’Sió-khoá chîⁿ , tī toā chèng;’’ ū sî bián khai-huì ia̍h bat tú-tio̍h. Bat tú-tio̍h chi̍t ê lē: Chiū-sī bat ū chèng-thâu, keng-koè chin-chē i-seng, khai-huì chē-chē kim-chîⁿ, chóng-sī bô siáⁿ kong-hāu. āu-lâi goá pò i ēng bó͘ io̍h-hng, kèng-jiân tio̍k-chhiú hoê-chhun( i liâm-piⁿ hó).

Ū lâng beh mn̄g, nā-sī án-ni , m̄ tō sī te̍k-hāu-io̍h lo͘h? Beh ìn i kóng, lūn te̍k-hāu chit nn̄g-jī, chin oh-tit kóng: In-uī ū-sî kiám-chhái chèng-thâu bô tuì; ū-ê sui-sī chèng-thâu ū tuì, m̄-ku phín-chit bô ha̍h. Phì-jū kin-á-hún lâi kóng, tuì koâⁿ-jia̍t-pēⁿ thong-chheng sī tek hāu io̍h; m̄-ku ū lâng sèng-chit bô ha̍h, lóng bē chia̍h-tit. Á-sī chio̍h-thoàⁿ-sng lâi kóng, chò goā-kho ê siau-to̍k-che chin hó ēng;kèng-jiân ū lâng lóng bē-oá-tit. Chóng lâi kóng i, nā ū tuì-chèng, toā to-sò͘ ê ēng-tit.

Chhin-chhiūⁿ í-siōng só͘ kóng, put-châi kì-jiân m̄-sī i-seng, ia̍h m̄-sī beh kiû bêng-lī;só͘-í kóng, kiám-chhái bô chiàu ha̍k-lí, á-sī put-ha̍p sî-sè, tàu-tí sī chīn put-châi chi̍t tiám ê gû-sêng. Bāng tāi-hong kun-chú goân-liōng goân-liōng.

Taⁿ thâu-chit pō͘, ài kài-siāu goā-kho ê io̍h-hng:-

Lūn goā-kho ū chin-chē chèng-thâu, chóng-sī só͘-beh kài-siāu--ê, chiū-sī goā-siong kap seⁿ lia̍p-á ê kuí-nā pō͘-hūn nā-tiāⁿ. Chhin-chhiūⁿ kòng--tio̍h,khok--tio̍h bô phoà phoê;kan-ta kui-luî, á sī o͘-chheⁿ kek-hoeh, í-ki̍p ū phoà-phoê lâu-hoeh, chit nn̄g khoán. Che sī tuì goā-hu ji̍p-to̍k, á-sī tuì hoeh-lāi bô chheng-khì ê me̍h lâi hoat-chhut--ê.(Thāi-sio̍k)

漢羅（Ùi原文改寫）

介紹藥方

(O.P.E.記)

1933.08  581卷  p.7

序言

不才毋是醫生，亦毋是藥劑師，閣亦毋是藥種商；總是欲介紹藥方。

或者有人欲辯駁，若是按呢，你太有藥方通介紹啊？不才欲應伊講，有的是對左傳，有的是對親戚佮朋友傳授；所以有通介紹啦！

檢采有人欲問，為啥緣故，你太欲介紹藥方啊？欲應伊講，毋是為著欲求名聲，亦毋是為著利路；是為著愛救人，予人較利便，較經濟。

俗語講，「畏著，無畏液。」又閣講，「小可錢，佇大眾；」有時免開費亦捌拄著。捌拄著一个例：就是捌有症頭，經過真濟醫生，開費濟濟金錢，總是無啥功效。後來我報伊用某藥方，竟然著手回春(伊連鞭好)。

有人欲問，若是按呢，毋就是特效藥囉？欲應伊講，論特效這兩字，真僫得講：因為有時撿彩症頭無對；有的雖是症頭有對，毋閣品質無合。譬喻kin-á-hún來講，對寒熱病通稱是特效藥；毋閣有人性質無合，攏袂食得。抑是石碳酸來講，做外科的消毒這真好用；竟然有人攏袂倚得。總來講伊，若有對症，大多數的用得。

親像以上所講，不才既然毋是醫生，亦毋是欲求名利；所以講，檢采無照學理，抑是不合時勢，到底是盡不才一點的愚誠。望大方君子原諒原諒。

今頭這部，愛介紹外科的藥方：-

論外科有真濟症頭，總是所欲介紹--ê，就是外傷佮生粒仔的幾仔部分若定。親像摃--著，硞--著無破皮；干焦規癗，抑是烏青激血，以及有破皮流血，這兩款。這是對外膚入毒，抑是對寫內無清氣的脈來發出--ê。(待續)