理想的教會
Lí-sióng ê Kàu-hoē
文獻資訊
| 項目 | 資料 |
|---|---|
| 作者 | 潘道榮 Phoaⁿ Tō-êng |
| 卷期 | 台灣教會公報 |
| 卷期 | 第580卷 |
| 日期 | 1933/7 |
| 頁數 | 1 |
白話字（原文數位化）
Lí-sióng ê Kàu-hoē
Chú-pit:Phoaⁿ Tō-êng
1933.07 580 Koàn P.1
Hiah-kú tī Lâm-pō͘ Tâi-oân ū toā khòng-hān ! Choè-kin(goân-bûn) hut-jiân lo̍h chin toā ê hō͘-chuí ; lâng kóng sī lo̍h n̂g-kim : Si̍t-chāi bô chhò. Ta̍k-hāng ê chhiū-ba̍k ngó͘-kok lóng chheⁿ-chhuì, ho̍k-tò sêng -tióng ê oa̍h-miā;bān peh-sèⁿ iā tit-tio̍h chhiu-chhìn koh sóng-khoài,ke-thiⁿ khuì-la̍t thang oa̍h tāng.
Koh chi̍t hong-bīn lâi siūⁿ , tī lêng-kài ū toā khiàm-khoeh Sèng Sîn ê hō͘-chuí. Koè khì 6 goe̍h thâu-chi̍t lé-pài sī Sèng Sîn kàng-lîm cheh, m̄-chai ū loā-chē kàu-hoē teh kì-liām?Tàu-tí chit ê Goō-sûn cheh kap lán ū siáⁿ koan-hē tī-teh? Chhiáⁿ tāi-ke koh chim-chiok siūⁿ!!Su-tàn-lé Phok-sū kóng,’‘Kì-liām Sèng Sîn ê kàng-lîm , pí Kì-liām kiù-chú Sèng-tàn,m̄-thang khah su. In-uī Kiù-chú Sèng-tàn , sī hián-bêng Siōng-tè kap lán saⁿ-kap tī-teh , iā Sèng Sîn kàng-lîm , sī hián-bêng Siōng-tè ū tiàm tī lán tiong-kan.’’
Chèng Ki-tok-tô͘ ah! Tio̍h chai lán tuì hoán-hoé sìn Ki-tok, jīn I chò lán ê kiù-chú , chiū ta̍k lâng ū tit-tio̍h Sèng Sîn (Hēng 2:38); chóng-sī lán tio̍h koh chìn chi̍t pō͘; chiū-sī tio̍h oân-choân hâng-ho̍k Ki-tok, sêng-jīn I chò lí ê Ông, chiū ē tit-tio̍h Sèng Sîn ê toā chhiong-moá(Lô 6:13,19,22).
Lán kiám m̄-sī chin him-bō͘ lán ê kàu-hoē,chiâⁿ-chò lí-sióng ê kàu-hoē ?Nā án-ni , kiám m̄-tio̍h siū Sèng Sîn ê chhiong-moá? Kó-jiân ū siū Sèng Sîn toā chhiong-moá,chì-chió ū hián-bêng 4 hāng ê chèng-kù tī-teh:—
1)Chàn-bí ê Kàu-hoē(Sài 65:14;Hut4:19). Sui-jiân tī bu̍t-chit seng-oa̍h bô sím-mi̍h hù-jū,iáu-kú tī i ê sim-sîn , chin khoài-lo̍k ài o-ló Siōng-tè.’‘Goá ê sîn-hûn ah! Lí tio̍h o-ló Iâ-hô-hoa;sim-lāi só͘ ū--ê,tio̍h o-ló I ê sèng-miâ’‘(Si phian 103:1). ‘’Goá ê sim chun-kèng chú chò toā,goá ê sîn, in-uī kiù-goá ê Siōng-tè lâi hoaⁿ-hí’‘(Lō͘-ka 1:46,47). ‘’Siōng-tè sī goán ê khuì-la̍t, tio̍h toā-siaⁿ chhiùⁿ-koa o-ló I’‘(Si-phian 81:1).Ki-tok-kàu te-it suí ê gē-sut, chiū-sī Ki-tok-tô͘ ū chàn-bí kám-siā ê seng-oa̍h.
2)Kî-tó ê Kàu-hoē (Iû-tāi 20 chat).Chàn-bí kap Kî-tó, chit nn̄g hāng sī éng-oán bē-thang saⁿ pun-lī ê koan-hē.Pó-lô ê kî-tó, thang chò lán chin hó ê bô͘-hoān. Tī Í-hut-só͘ 1:15-23, i kiû Siōng-tè hō͘ sìn-tô͘ ê khah bat chú;iā tī 3:14-19, i kiû Siōng-tè hō͘ in ē gâu thiàⁿ chú.
Ná-su Iok-hān thiàⁿ i ê pún-kok , chiū tuì Siōng-tè kiû kóng,’‘Chhiáⁿ chiong So͘-kek-lân siúⁿ-sù goá; nā bô,lêng-khó͘ hō͘ goá sí’’ Lán nā ū thé-thiap Chú ê sim--ê , iā beh Kî-tó kóng, ‘’ Siōng-tè ah, kiû Lí chiong Tâi-oân hō͘ goá;nā bô, lêng-khó hō͘ goá lī-khui sè-kan.’’
3)Pêng-hô ê Kàu-hoē (Í-hut-só͘ 5:22-6:9). Kàu-hoē sī chi̍t ê toā Ka-têng. Tī lán suî-lâng ê sió ka-têng :hu-hū, pē-kiáⁿ,chú-po̍k ê jîn-lûn eng-kai tio̍h chīn ; pêⁿ-pêⁿ chhin-chhiūⁿ án-ni, tī lán tī lán ê toā Ka-têng(Kàu-hoē),iā tio̍h án-ni lâi thoân-kiat.Só͘-í lán tio̍h kèng-uì Ki-tok lâi saⁿ sūn-ho̍k (Hut 5:22),chiū ē chiâⁿ-chó bí-boán pêng-hô ê Kàu-hoē.’‘Iûⁿ-ko hun-in ê kî í-keng kàu,I ê sin-niû í-keng ka-tī pī-pān hó lah’‘(Khé-sī-lio̍k 19:7)
4) Sèng-chiàn ê Kàu-hoē (Í-hut-só͘ 6:10-20). Ki-tok-tô͘ ah! Lí ū chham-ka tī sîn-kok ê ūn-tōng bô?Lâm-pō͘ siat-kàu 70 chiu-nî Chiok-hō-hoē teh-beh kàu lah ; lí it-seng ū ín-chhoā kuí ê lâng lâi kuí-oá Chú?’‘Bô chiàn-cheng chiū bô sèng-lī; bô sèng-lī . chiū bô bián-liû .’’ Chhut-la̍t kap Mô͘-kuí chiàn-cheng!
Pún-goe̍h 10 hō kàu 20 hō,chiah ê Thoân-kàu-su beh chū-chi̍p tī Tâi-lâm khui Siu-ióng-hoē , chiū-sī ài chhiok-chìn hō͘ chèng kàu-hoē chiâⁿ-chó ‘’Lí-sióng ê Kàu-hoē.’’ Goán lia̍t-uī hiaⁿ-ché kap goán tâng-sim , chiū-sī pêⁿ-pêⁿ ǹg chit ê bo̍k-phiau lâi chìn-chêng.Chhiáⁿ bô-lūn tī Tó-lāi Tó-goā ê chèng sìn-tô͘,poah lín kuì-tiōng ê sî-kan thè goán kî-tó.
‘’Goān Lí miâ sèng, lâng lâng lâi kèng; Thian -kok lîm-kàu ,Sèng-chí èng-hāu; Tī tē-bīn-chiūⁿ, ná thiⁿ chit-iūⁿ.’’
漢羅（Ùi原文改寫）
理想的教會
主筆：潘道榮
1933.07 580卷 p.1
遐久佇南部台灣有大炕旱！最近忽然落真大的雨水；人講是落黃金：實在無錯。逐項的樹木五穀攏青翠，ho̍k-tò成長的活命；萬百姓也得著秋凊閣爽快，加添氣力通活動。
閣一方面來想，佇靈界有大欠缺聖神的雨水。過去6月頭一禮拜是聖神降臨節，毋知有偌濟教會咧紀念？到底這个五旬節佮咱有啥關係佇咧？請大家閣斟酌想！！Su-tàn-lé博士講，「紀念聖神的降臨，比紀念救主聖誕，毋通較輸。因為救主聖誕，是顯明上帝佮咱相佮佇咧，也聖神降臨，是顯明上帝有踮佇咱中間。」
眾基督徒啊！著知咱對反悔信基督，認伊做咱的救主，就逐人有得著聖神(行 2：38)；總是咱著閣進一步；就是著完全降服基督，承認伊做你的王，就會得著聖神的大充滿(羅 6：13，19，22)。
咱敢毋是真欣慕咱的教會，成做理想的教會？若按呢，敢毋著受聖神的充滿？果然有受聖神大充滿，至少有顯明4項的證據佇咧：—
1)讚美的教會(賽65：14；弗4：19)。雖然佇物質生活無啥物富裕，猶閣佇伊的心神，真快樂愛呵咾上帝。「我的神魂啊！你就呵咾耶和華；心內所有的，著呵咾伊的聖名」(詩篇 103：1)。「我的心尊敬主做大，我的神，因為救我的上帝來歡喜」(路加1：46，47)。「上帝是阮的氣力，著大聲唱歌呵咾伊」(詩篇81：1)基督教第一suí的藝術，就是基督徒有讚美感謝的生活。
2)祈禱的教會(猶大20節)。讚美佮祈禱，這兩項是永遠袂通相分離的關係。保羅的祈禱，通做咱真好的模範。佇以弗所1：15-23，伊求上帝予信徒的較捌主；也佇3：14-19，伊求上帝予in 會 gâu疼主。
Ná-su約翰疼伊的本國，就對上帝求講，「請將蘇格籣賞賜我；若無，寧可予我死」咱若有體貼主的心的，也欲祈禱講，「上帝啊，求你將台灣予我；若無，寧可予我離開世間。」
3)平和的教會(以弗所5：22-6：9)。教會是一个大家庭。佇咱隨人的小家庭：夫婦，父囝，子伯的靈魂應該著盡；平平親像按呢，佇咱佇咱的大家庭(教會)，也著按呢來團結。所以咱著敬畏基督來相順服(弗5：22)，就會成做美滿平和的教會。」羊羔婚姻的期已經到，伊的新娘已經家己備辦好啦」(啟示錄19：7)
4)聖戰的教會(以弗所6：10-20)。基督徒啊！你有參加佇神國的運動無？南部設教70週年祝號會咧欲到啦；你一生有引chhoā幾個人來歸倚主？」無戰爭就無勝利；無勝利。就無冕旒。」出力佮魔鬼戰爭！
本月10號到20號，才會傳教師欲聚集佇台南開修養會，就是愛促進予眾教會成做「理想的教會。」阮列位兄姊佮阮同心，就是平平向這个目標來進前。請無論佇島內島外的眾信徒，撥恁貴重的時間替阮祈禱。
「願你名聖，人人來敬；天國臨到，聖旨應效；佇地面上，那天這樣。」