我聽耶穌的聲講明
Goá thiaⁿ Iâ-so͘ ê siaⁿ kóng-bêng
文獻資訊
| 項目 | 資料 |
|---|---|
| 作者 | 明有德 Bêng Iú-tek |
| 卷期 | 台灣教會公報/芥菜子 |
| 卷期 | 第580卷 |
| 日期 | 1933/7 |
| 頁數 | 22 |
白話字（原文數位化）
Goá thiaⁿ Iâ-so͘ ê siaⁿ kóng-bêng
Bêng Iú-tek
1933.7 Koà-Chhài-Chí Tē 90 Hō p.22
Horatius Bonar, chit siú ê chok-chiá, sī so͘-kek-lân ê Bo̍k-su ; chhut-sì tī Edinburgh, i ê ka-chok tī so͘-kek-lân ê kàu-hoē chin chhut-miâ, in-uī tī nn̄g-pah nî ê tiong-kan,m̄-bat chit pái bô chit ê sìⁿ Bonar choè Bo̍k-su tī hit ê kàu-hoē ê kài-hān ê kài-hān lāi; chiū-sī ta̍k tāi ū choè bo̍k-su.
I ê lāu-pē sī hái-koan ê koaⁿ; chin ū ha̍k-būn ê lâng , i ta̍k hong-biān ū chhù-bī, ia̍h jia̍t-sim tī kàu-hoē.
Bonar Edinburgh tha̍k Tiong Ha̍k-hāu, Tāi-ha̍k kap Sîn Ha̍k-hāu. Chhut-gia̍p liáu ū hō͘ Edinburgh, sèng Ngá-kok ê kàu-hoē, chhiáⁿ i choè thoân-tō lâi pang-chān in ê bo̍k-su.
Jī-káu hè ê sî , ū hō͘ pa̍t-uī Kelso ê Kàu-hoē, chhiáⁿ i khì choè in ê bo̍k-su.
Saⁿ-cha̍p-gō͘ hè, hit ê kàu-hoē liân-ha̍p ê sî, i ū lī-khui kū so͘-kek-lân ê Kàu-hoē lâi sio̍k tī chū-iû tiúⁿ-ló Kàu-hoē, chóng-sī bô lī-khui Kelso ê só͘-chāi.I iáu-kú choè bo̍k-su tī-hia.
sì-cha̍p-gō͘ hè ê sî, tuì Aberdeen Sîn Ha̍k-hāu tit-tio̍h Sîn-ha̍k Phok-sū ê ha̍k-uī.
Goō-cha̍p-poeh hè ê sî, Edinburgh Chalmers Kàu-hoē, chhiáⁿ i khìchoè in ê bo̍k-su.
I 75 hè, ū hoō Soō-kek-lân ê Kàu-hoē kéng i choè Chóng-hoē ê Gī-tiúⁿ.
Chiàu Bonar Bo̍k-su ê su-siúⁿ, gîm-si choè chin toā pang-chān tī kèng-pài Siōng-tè ê si. Só͘ siá--ê, ū chham tī 7 pún Sèng-si. Hiah-ê chheh-miâ ū hō chhin-chhiūⁿ chit khoán ê toê-ba̍k:-
‘’Tiàm tī khòng-iá lâi ēng ê si’’
‘’Pang-chan tha̍k Sèng-keng ê si ‘’
‘’sìn-gióng kap ǹg-bāng ê si’’
‘’Sio̍k tī lâng siū sin chhòng-chō lâi ê si’’
Tī i ê si ê tiong-kan, ū-ê sī tuì Hi-lī-nî kap Lô-má-oē hoan-e̍k--ê. I ài thiaⁿ khah-chá ê kàu-hoē sim-sîn ê im-ga̍k. Tuì hoan-e̍k in ê si, ū hoat-tō͘ thang tit-tio̍h in ê cheng-sîn. Hit khoán ê si,ū toā pang-chān So͘-kek-lân ê Kàu-hoē.
Khah choē ê, sī i ka-kī choè--ê. Gián-kiù Sèng-keng ê sî, nā khoàⁿ chi̍t chām choè i lêng-hûn chin hó ê bí-niû, sim-koaⁿ tit-tio̍h boē-kìm-tit ê hoaⁿ-hí chhut-lâi. Tuì kî-tó lâi siá--ê. Só͘-í thang kóng, toā pō͘-hūn sī tī īⁿ-siōng-tiong choè--ê.
Khoàⁿ chit siú si thang chai i ê sìn-gióng ū kàu loā chhim. Khoàⁿ tē-it chat thang chai Iâ-so͘ si̍t-chāi sī choè i ê Chú.I tē-it ài kì-liām--ê,chiū-sī Iâ-so͘ siōng lō͘-bé mî kap I ê ha̍k-seng saⁿ-kap kau-poê ê sū. Boán-chhan ū hō͘ Bonar Bo̍k-su, chhin-chhiūⁿ’‘Eńg tiàm Iâ-so͘ sin-piⁿ.’’
Khoàⁿ tē 2 chat thang chai i siūⁿ Chú ê kám-tōng ê khoán-si̍t. Chú sī chhin-chhiūⁿ oa̍h-oa̍h ê chuí;i lim ê sî, khah bô koh-chài chhuì-ta.
Khoàⁿ tē 3 chat chiū chai i ê sìn-gióng ê khoán-sit. I ê sim-lāi sī chhin-chhiūⁿ kiàⁿ , tī hit lāi-bīn thang khoàⁿ i ê Chú ê siōng bêng bêng tī-teh.
漢羅（Ùi原文改寫）
我聽耶穌的聲講明
明有德
1933.7 芥菜子第90號p.22
Horatius Bonar，這首的作者，是蘇格蘭的牧師；出世佇Edinburgh，伊的家族佇蘇格蘭的教會真出名，因為佇兩百年的中間，毋捌這擺無這个姓Bonar做牧師佇彼个教會的界限的界限內；就是逐代有做牧師。
伊的老爸是海關的官；真有學問的人，伊逐方面有趣味，亦熱心佇教會。
Bonar Edinburgh讀中學校，大學佮神學校。出業了有予Edinburgh，聖雅各的教會，請伊做傳道來幫贊in的牧師。
二九歲的時，有予別位Kelso的教會，請伊去做in的牧師。
三十五歲，彼个教會聯合的時，伊有離開舊蘇格蘭的教會來屬佇自由長老教會，總是無離開Kelso的所在。伊猶閣做牧師佇遐。
四十五歲的時，對Aberdeen神學校得著神學博士的學位。
五十八歲的時，Edinburgh Chalmers教會，請伊去做in的牧師。
伊75歲，有予蘇格蘭的教會揀伊做總會的議長。
照Bonar牧師的思想，吟詩做真大幫贊佇敬拜上帝的詩。所寫的，有參佇7本聖詩。遐的冊名有號親像這款的題目：-
‘’踮佇曠野來用的詩‘’
‘’幫贊讀聖經的詩‘’
‘’信仰佮向望的詩‘’
‘’屬佇人受新創造來的詩‘’
佇伊的詩的中間，有的是對希利尼佮羅馬話翻譯的。伊愛聽較早的教會心神的音樂。對翻譯in的詩，有法度通得著in的精神。彼款的詩，有大幫贊蘇格蘭的教會。
較濟的，是伊家己做的。研究聖經的時，若看一站做伊靈魂真好的米糧，心肝得著未禁得的歡喜出來。對祈禱來寫的。所以通講，大部分是佇異象中做的。
看這首詩通知伊的信仰有夠偌深。看第一節通知耶穌實在是做伊的主。伊第一愛記念的，就是耶穌上路尾暝佮伊的學生相佮交陪的事。晚餐有予Bonar牧師，親像「恩典耶穌身邊。」
看第2節通知伊想主的感動的款式。主是親像活活的水；伊啉的時，較無閣再嘴乾。
看第3節就知伊的信仰的款式。伊的心內是親像囝 ，佇彼內面通看伊的主的像明明佇咧。