數念熱心的女徒
Siàu-liām jia̍t-sim ê Lú-tô͘
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會公報/芥菜子 |
| 卷期 | 第579卷 |
| 日期 | 1933/6 |
| 頁數 | 30 |
白話字（原文數位化）
Siàu-liām jia̍t-sim ê Lú-tô͘
-
- 579 koàn, pp. 30
Chan Loā--sī Bi̍t, sī Koe-lâng Kàu-hoē Chip-sū Chan Thian-lâi ê hu-jîn. Tuì 10 goā nî chêng kap i ê tiōng-hu tâng-sim lâi sìn tō-lí, ho̍k-sāi Siōng-tè chin khiân-sêng, lé-pài, tû-khì phoà-pīⁿ í-goā, hán-tit bô hù, tì-ì kî-tó. Tī kin-nî phoà-pīⁿ ê sî, goán nā khì kā i kî-tó, i chiū chin hoaⁿ-hí, kóng i ê pīⁿ ta̍k pái khah khoàⁿ-oa̍h, chóng-sī khó-sioh i ê pīⁿ lóng bô khah hó. āu-lâi ū khì Má-kai I-īⁿ ji̍p-īⁿ, 4 ge̍h 20 hō téng-po͘ 5 tiám soà tī pīⁿ-īⁿ pia̍t-sè. I ê cha-bó͘-kiáⁿ kap kiáⁿ-sài chin hoân-ló, chin m̄ kam-sim, ū-soàn ài beh ūn-koan tńg-lâi chit chhù chòng-sek, goá ū kap Chip-sū chham-siông, nā ū chit khoán ê sim, put-jû tio̍h toà Siang-liân Pài-tn̂g choè chòng-sek, lâi chiat-iok tām-po̍h keng-huì lâi choè ū lō͘-ēng ê tāi-chì, Chip-sū chin hoaⁿ-hí, chiū siat3-hoat tī Siang-liân choè kò-pia̍t-sek.
Chit ji̍t ū chhiáⁿ Tân chheng-gī Bo̍k-su lâi soat-kàu ; Tiuⁿ Kim-pho Bo̍k-su kóng i ê lí-le̍k ; Ia̍p Kim-bo̍k Bo̍k-su choè su-hoē. Chit ji̍t ū tit-tio̍h Siang-liân Kàu-hoē kap Má-kai I-īⁿ ê chit-oân, khàn-hō͘-hū, ko͘-niû chin-choē lâi hoē-chòng, chin ài kā in kám-siā. I ū Y15.00 kià-hù Má-kai I-īⁿ, Y5.00 kià-hù Siang-liân Kàu-hoē, kià-hù Y15.00 tī Koe-lâng Kàu-hoē. Tuì tī in ê jia̍t-sim, Koe-lâng Kàu-hoē chin m̄ kam-sim, chiū tī 4 ge̍h 26 hō pài 3 àm, tī Chip-sū ê chhù choè Tui-tō-hoē lâi siàu-liām i. Chip-sū khoàⁿ-tio̍h só͘ keng-kè ê chōng-hóng, tī hoân-ló tiong soà siū an-uì, si̍t-chāi thang choè hó ê bô͘-hoān. Goān Siōng-chú ê Sîn an-uì Chip-sū kap i ê ke-lāi toā-soè, ǹg-bāng in keng-kè chhì-liān nā kian-kò͘, ke-thiⁿ in ê sìn-gióng. À-bēng.
漢羅（Ùi原文改寫）
數念熱心的女徒
1933.06. 579卷，pp.30
曾賴--氏蜜，是基隆教會執事曾天來的夫人。對10外年前佮伊的丈夫同心來信道理，服事上帝真虔誠，禮拜，除去破病以外，罕得無赴，致意祈禱。佇今年破病的時，阮若去共伊祈禱，伊就真歡喜，講伊的病逐擺較快活，總是可惜伊的病攏無較好。後來有去馬偕醫院入院，4月20號頂晡5點紲佇病院別世。伊的查某囝佮囝婿真煩惱，真毋甘心，預算愛欲運棺轉來這次葬式，我有佮執事參詳，若有這款的心，不如著toà雙連拜堂做葬式，來節約淡薄經費來做有路用的代誌，執事真歡喜，就設法佇雙連做告別式。
這日有請陳清義牧師來說教；張金波牧師講伊的履歷；葉金木牧師做司會。這日有得著雙連教會佮馬偕醫院的職員，看護婦，姑娘真濟來會葬，真愛共in感謝。伊有Y15.00寄付馬偕醫院，Y5.00寄付雙連教會，寄付Y15.00佇基隆教會。對佇in的熱心，基隆教會真毋甘心，就佇4月26號拜3暗，佇執事的厝做追悼會來數念伊。執事看著所經過的狀況，佇煩惱中紲受安慰，實在通做好的模範。願上主的神安慰執事佮伊的家內大細，向望in經過試煉若堅固，加添in 的信仰。À-bēng。